¿Xigony Jesús laa xiin Dios?
Mod rabexa la Biblia láani
Guirá ór, la Biblia rasetlaa que Jesús nacbu «Xiin Dios» (Juan 1:49). Diitz «Xiin Dios» radudyni diitz que Dios Bisaʼ guirá cós ni noʼ né ronoʼbu ralainy vida, ndeʼ radudy diitz que láaca bisaʼbu Jesús (Salmo 36:9; Apocalipsis 4:11). La Biblia diti náni que Dios gopbu Jesús suusi rioʼ xiin buñgudxlio.
La Biblia ná que guirá ángeles nacyibu «Xiin Dios ni nigoluʼ» (Job 1:6). Láaca rasuidyni que primer buñguieeu Adán gócbu «Xiin Dios» (Lucas 3:38). Per la Biblia láaca náni que Jesús nacbu xiin Dios ni más rasac, portín láabu primerdiguieʼ ni bisaʼ Dios né diti goyoʼ ni gocné láabu.
¿Bibany Jesús lainy guibá antes ni ñalbu ló Gudxlio la?
Scú. Jesús gócbu toib espíritu ni goyoʼ lainy guibá. Láacabu goniʼbu que «bietjbu de guibá» (Juan 6:38; 8:23).
Jesús gócbu primerdiguieʼ ni bisaʼ Dios. Por ngú la Biblia ná:
Láabu «lagolbu ló guirá ni goyaʼ» (Colosenses 1:15).
Láabu ngú «ni nirdiguié bisaʼ Dios» (Apocalipsis 3:14).
Jesús buny cumplir toib profecía ni bisetlaa de toib ni bibany ma xidzú íz (Miqueas 5:2; Mateo 2:4-6).
¿Xí láani buny Jesús antes ni ñeedbu ló Gudxlio?
Gopbu toib dxiin ni rasac lainy guibá. Jesús bisetlabu de dxiinreʼ órni gonabbu Dios ndeʼ: «Bixiosa bunyxiroʼ naʼ cueʼlo susica bunyxiroʼlo naʼ cueʼlo antes de ñoʼ buñ ló gudxlio» (Juan 17:5).
Gocnébu Bixiosbu bisaʼbu guirá cós ni noʼ. Jesús toibsi buny dxiin né Dios «xomod toib mextra ni nan rasaʼ» (Proverbios 8:30). La Biblia rasetlaa ndeʼ de Jesús: «Por láabu guirá cós goyaʼni lainy guibá né ló gudxlio» (Colosenses 1:16).
Dios biquiimbu Jesús par bisaʼbu guirá cós ni noʼ, dada ángeles né guirá ni noʼ ló Gudxlio (Apocalipsis 5:11). Mod buny Dios dxiin né Jesús nacni xomod toib arquitecto né toib buñ ni rasaʼ yoʼ. Arquitecto cú raniʼ mod guiaʼanni né ni rasaʼ yoʼcu rony láani.
Gócbu diitz. Órni la Biblia rasetlaa de Jesús antes ni ñeedbu ló Gudxlio rabeʼni láabu «Diitz» (Juan 1:1). Ndeʼ radudy diitz que Dios biquiin xiin par naniné stipnés ángeles.
Raloyni que Dios láaca biquiimbu Jesús par naniné buñgudxlio. Láaca raloyni que Dios biquiin láabu par bidudybu instrucciones a Adán né Eva órni goyoʼyibu ló lagary móz ni góc laa Edén (Génesis 2:16, 17). Sigory Jesús góc ángel ni bisanés a israelitas órni godudyibu ló yoovich né láaca xtiitz ángel reʼ non nasob israelitas (Éxodo 23:20-23). a
a Jesús ni góc laa Diitz, diti nosi láabu biquiin Dios par naniné buñgudxlio. Por ejemplo, Jehová biquiimbu stipnés ángeles, diti nosi biquiimbu Xiin lagolbu, par nadudybu ley a guirá israelitas (Hechos 7:53; Gálatas 3:19; Hebreos 2:2, 3).
