La Biblia diti rasuidy guienno dioxh falz. Nosi Dios non guininéno né non gonyno láani ló laa Jesús. Jesús góoch xpiin: «Lóoto non guininéto Dios scareʼ: Bixiosdo ni noʼ guibá, gac nayaa laalo» (Mateo 6:9). Jesús dipa goniʼbu que non guixixipno nisló toib bidaʼ, toib ángel o stoib buñ. Nosi gony adorarno Dios.

 Jesucristo láaca goniʼ ndeʼ: «Naʼ ngú néz, rasudi ni nigolú né radudi galnabany tipzó. Ni toib labúu guidxin ronoʼ Bixiosa pal diti nacni por naʼ» (Juan 14:6). Nosi Jesús nap galmandary par guidxin nisló Dios né guiniʼ por lóono (Hebreos 7:25).

¿Labúu guininéno Dios né láaca non guixixipno nisló dioxh la?

 Ló toibtica de Chii Mandamientos, Dios goniʼ ndeʼ: «Naʼ, Jehová Dios xtunylo, naca toib Dios ni ranab que nosi naʼ guienlo» (Éxodo 20:5). ¿Xigony ranab Dios guienno láasibu? Ló toib nota ni sieed ló Biblia de América rabexa versículo reʼ scareʼ: «Diti noʼ stoib dioxh ni rigaʼl láabu, ni toib dioxh [...] sioʼ xalagarybu». Dios ranab lóono gony adorarno láasibu, né toibtica mod ni rony adorarno Dios láani ngú órni raninéno láabu (Isaías 48:11).

 Pal raninéno o raxixipno nisló stoib dioxh, ná pal nacni toib ángel o toib bidaʼ, sasioʼobno xcalnabany Jehová. Libro ni laa Apocalipsis rasetlani que órni apóstol Juan bixixip nisló toib ángel par ñembu ángelcu, ángelcu góoch láabu: «Diti gonylo nga, naʼ láaca roni xchiin Dios xomodca looy, xomodca xhermanlo ni raniʼ xtiitz Jesús. Nosi Dios non gony adorarlo» (Apocalipsis 19:10).