•   ¿Ratzuitzni looy que stipnés guiniʼ diitznaa la?

  •  Yaca, nili radudi cuent; ma biaʼya racadiaga láani.

  •  Moda ratzuitzni naʼ, per diti labúu goni xitcal.

  •  Scú, ratzuitzgoluʼni naʼ; diti labúu rony guantary láani.

•   Rioʼ ór raniʼlo diitznaa, ¿né diti radudylo cuent la?

  •  Yaca.

  •  Rioʼ ór.

  •  Scú, xidal buelt.

•   ¿Nigolú mal láani la?

  •  Yaca, noʼ ni nac más mal.

  •  Scú, nigolú malni.

 ¿Nálo que ni guiniʼ buñ diitznaa nigolú malni la? «Nipa balaquien sigory ronylo pensary. Noʼ cós ni más mal. Ni nacni la, guirá buñ raniʼ láani». Per ¿nigolúni la?

 Ná diti gonylo crer, tipnés buñ rony xtem par diti guiniʼ diitznaa. Né ronybu pensary ló tipnés cós ro xidal buñ diti ragoʼ cuent. Por ejemplo:

•  Diitznaa diti nosi nacni diitz mal. Mod raniʼlo raslooyni ni noʼ lainy xcalnabanylo. Ni raniʼlo diitznaa raslooyni que diti ragoʼlo cuent mod rasac stipnés. Ronybu pensary: ¿nigolú scá naclo la?

   La Biblia ná: «Cós ni rareʼ roʼ buñ sieedni de galnabany» (Mateo 15:18).

•  Órni raniʼlo diitznaa raxinni mod rabiʼ buñ looy. Libro Cuss Control ná: «Mod raniʼlo raslooyni chú gac ximiglo, balac respet gap xfamilo looy né buñ ni ronynélo dxiin, ximod sadzaklo buñ, ximod sacnélo stipnés buñ, pal sadzelo dxiin o guicaʼlo toib puesto más xiroʼ ló xchiinlo». Libro reʼ láaca radudyni consej looy: «Gonabdiitz looy pal nadzaklo más galán ximiglo pal rasianlo raniʼlo diitznaa».

   La Biblia ná: «Diti guicadiéto rudx nili guininato stipnés» (Efesios 4:⁠31).

•  Diti raclo buñ chido órni raniʼlo diitznaa o diitz mal. Doctor Alex Packer rasetlaa ló libro xtuny ni laa, ¡Qué maleducado!, que buñ raxacladx buñ ni raniʼ diitznaa guirá ór, «que buñ ni raniʼ diitznaa diti labúu rioʼbu xalagary stipnés buñ nili naniʼ guic». Né láaca rasetlabu ndeʼ: «Pal diti raquiinlo xidal diitz, guiclo láaca scúca sacni».

   La Biblia ná: «Diti guireʼ roʼto ni toib diitz buidy» (Efesios 4:​29).

•  Gop toib meta. Buny por diti guiniʼlo diitznaa ti beʼo. Bicaʼ ló toib calendario ximod seelo. Par labúu gonylo ni ma goniʼlo, raquiin gonylo stipnés cós. Por ejemplo:

•  Diti gonylo galnakit ro raniʼ golúyibu diitznaa. La Biblia ná: «Pal toib buñ radzak buñ mal raxin mod tzaay ni nacbu» (1 Corintios 15:33). Ló versículo reʼ, ritlaa diitz ni radzak diti nosi radudyni diitz buñ láaca raguiñani películas, videojuegos né canción ni rabúno. Kenneth de 17 íz, ná: «Rioʼ ór rony cantarlo toib canción ni rioladxlo né diti radudylo cuent que letra ni ritlaa loni napni diitz yox. Nosi rioladxlo sonido ni napni».

•  Bislooy que naniʼ xcalrrienlo. Tipnés buñ raniʼ diitznaa nosi par guisacyibu que ma nigoxyibu. Per buñgox «nan xi ngú cós tzaay né xi ngú cós mal» (Hebreos 5:​14). Diti rasianyibu normas morales xtunyibu par guidziguiaʼ stipnés buñ layibu.

 Diitz yox nosi rony buidyni xpensarylo. Né ló Gudxlio reʼ ma bidza cós mal. Libro Cuss Control ná: «Diti guiniʼlo xomod raniʼyibu. Gocné par gac nayaa mod raniʼ buñ. Pal ronylo láani sasaclo sacró, né stipnés buñ láaca sasac sacró né looy».