Guirádo ni nacdo testigos xtuny Jehová ronydo rutirigaʼlni lóodo par que xfamildo né xfamily stipnés buñ guiguaʼ toibsi. Par lóodo nigolú rasac family, portín nantzaydo que Dios gosaló láani (Génesis 2:21-24; Efesios 3:14, 15). Ló la Biblia, láabu raduidybu litz né láani ma gocnéni a buñ ni noʼ ló guidopy Gudxlio par labúu guiguaʼyibu toibsi ló galtzeʼel né tzoʼyibu nakit.

 Testigos xtuny Jehová ronydo por guisobdo ni sieed ló la Biblia, láani racnéni lóodo gandxiʼdo tzeeldo né xiindo (Proverbios 31:10-31; Efesios 5:22–6:4; 1 Timoteo 5:8). Né la Biblia láaca labúu gonyni que family guiguaʼ sacró ná diti nacyibu de toibsi religión (1 Pedro 3:1, 2). Guibiʼno xí raniʼ tipnés buñ órni tzeʼelyibu bidxin góc testigo xtuny Jehová:

•   «Órni cuaʼdo saʼdo godudydo xhoop íz ro guirási ór godíldo né diti bidzel xcalrriendo xí ni ñonydo. Per órni Ivete gócbu testigos xtuny Jehová, bitzaʼbu mod gócbu né gopbu más galnadxiʼ né gócbu buñ paseinys. Ni láabu bitzaʼbu mod gócbu bunyni que diti nasiando saʼdo» (Clauir, de gudx Brasil)

•   Toib buñgonaʼ goniʼ: «Órni tzeʼela , Chansa, gosaló bisuidy né guirá testigos xtuny Jehová, naʼ bidzutzi portín buni pensary que layibu rachílyibu galtzeʼel. Né conforma godudy dzú bidudi cuent que ni ná la Biblia ma gocnégoluʼni xcaltzeeldo.» (Agness, de gudx Zambia)

 Stoib mod ni lóodo racnédo buñ láani ngu órni rasuidydo buñ que xilitz la Biblia labúu gacné layibu ló stipnés galnagan ni rioʼ lainy family, xomod ni sieed lainy guet reʼ:

•   Ximod labúu guidzelo toib buñ ni natzaay xcalrrien par gac tzeʼel lo

•   Ximod labúu guicalólo galnagan ni rioʼ lainy galtzeʼel ló primer íz

•   Ximod labúu guidzaktzaylo suegralo

•   Ximod gonyto gaxt bidxiich

•   Xí láani gonyto par diti tíildiitzlo

•   Bisuidy guituidylo scásiʼ xcalkié stipnés

•   Ximod conéslo xiinlo

 Rioʼ ór racni scú. Toib informe xtuny empresa ni la Sofres ni bireʼ ló íz 1998 rasetlani que 1 de cada 20 galtzeʼel cualó xiroʼ galnagan órni toibtica de layibu bidxin góc testigo xtuny Jehová.

 Jesús goniʼ que buñ ni guicanal láabu sioʼ ór sacalóyibu galnagan lainy xfamilyibu (Mateo 10:32-36). Toib buñ ni racaʼ historia ni laa Will Durant goniʼbu que dzú goyoʼ Imperio romano goyoʼ ni goniʼ que «xtol buñ ni cuanal Jesús biʼbil galtzeʼel». a Né ló naareʼ láaca ragotzyibu dool testigos xtuny Jehová que rachílyibu galtzeʼel. Per, ¿nigolúpa testigos xtuny Jehová rachíl family la?

 Órni goyoʼ ni bigotz dool testigos xtuny Jehová que rachílyibu family, Tribunal Europeo de Derechos Humanos goniʼ que buñ ni diti nac testigos xtuny Jehová layibu ragoʼyibu galrradíil lainy family portín diti «racacuenyibu né diti rapyibu respet crenys ni nap xfamilbu por ni ma nacyibu de stoib religión». Tribunal reʼ láaca bisetlaa: «Galnagan reʼ racaló guirá family ni diti nac de toibsi religión; testigos xtuny Jehová láaca racalóyibu de clas galnagan reʼ». b Per ná rioʼ galrradíil, guirá testigos xtuny Jehová ronydo rutirigaʼlni lóodo por guisobdo litz reʼ: «Diti guidxigueto cós mal saʼto. [...] Pal labúuni, colgony rutirigaʼlni lóoto, colgac buñtzayxat né guirá buñ» (Romanos 12:17, 18).

 Guirá testigos xtuny Jehová rasobdo xilitz la Biblia ni ná que gonydo galtzeʼel nosi «né toib buñ ni rasob Señor»; ndeʼ raduidy diitz que gotzñado né buñ ni nac de xireligióndo (1 Corintios 7:39). Galmandary reʼ ni bixel Dios racnégoluʼni lóodo. Guibiʼno ximod, toib tema ni bireʼ ló revista Journal of Marriage and Family ló íz 2010 rasetlaa que «guirá galtzeʼel ni nac de toibsi religión né ni nap toibsi crenys» casi guirá ór raguaʼyibu sacró. c

 Per testigos xtuny Jehová diti raibyibu xhermanyibu que guisian tzeʼel ni diti nac Testigo portín la Biblia ná: «Pal toibtica hermano noʼ tzeʼel ni diti nap fe né buñgonaʼ reʼ noʼ de acuerdo cuesnébu hermano reʼ, buñguieeu reʼ diti guisiambu tzeelbu; né pal toib hermana noʼ tzeʼel ni diti nap fe né buñguieeu reʼ noʼ de acuerdo cuesnébu hermana reʼ, buñgonaʼ reʼ diti guisian tzeʼel» (1 Corintios 7:12, 13). Lóodo láaca rasobdo galmandary reʼ.