Ló gudx España, testigos xtuny Jehová riguen 68 press né rasuidyibu 600 buñ ni noʼ lagarycu.

Lad Testigos ni riee riguen guirá buñ ni noʼ lachquiip noʼ Miguel, láabu láaca goyoʼbu lachquiip doce íz antes de nadxin ñacbu testigo xtuny Jehová. Nigoreʼ guirá xomal rieebu press ro goyoʼbu nírcu. ¿Xigony rieebu cú? Par que stipnés buñ ni nayeg lainy lachquiip guitzaʼ mod nabany, xomod láabu.

Ma de goló xhoon íz, Miguel casuidy ni ná la Biblia a xidal buñ ni noʼ press. Láabu nábu: «Naʼ rabaladxi gacnéya buñ ni noʼ press ro goyoʼya. Rasaca sacró órni rabiʼya que nainy layibu guisianyibu cós mal ni noʼ ló Gudxlio reʼ».

Dzú Miguel pénsa tap íz nap, toib buñ ni casoch bicaʼ camión bixiosbu né bigaity bixiosbu. Xinaʼbu bunygoluʼ dxiin par nadxinaʼ ni ñooyibu.

Miguel né buch guiropcayibu bisianyibu scuel né gosaló goyoʼyibu lidx buñ né bixalyibu xcamión buñ par cuannyibu. Pénsa doce íz nap Miguel ma nacbu buñ gobáan. Órni gopbu 15 íz buny ganarbu xiroʼgolu bidxiich por ni bitoʼbu drogas. Per ná scú diti rigaʼlni láabu par siʼbu heroína né cocaína par guiquimbu né por ngú guirá ór golambu. Órni ma napbu 16 íz, biabbu lachquiip xidal buelt, né nagudx góc xcalnabanybu. Miguel rasetlaa: «Par naʼ ma reti bidxina, pal lachquiip diti nagaity naʼ, drogas ñony láani. Góca xomod toib bilasy ni ma biab ló xtoʼ bidxiʼ».

Ló íz 1994, órni Miguel noʼ lachquiip toibtica ximigbu ni noʼ cú, gonab toib testigo xtuny Jehová naxel toib guiich lóbu. Ló guiich reʼ Testigo cú golexabu que Dios raniiny láabu gonybu Gudxlio reʼ toib lagary móz né pal nainy láabu guibanybu cú non guitzaʼbu mod nabanybu. Miguel goniʼ scareʼ: «Ni bicaʼbu ló guiich bidxinni lainy xcalnabani. Desde dzúcu bitzaʼya mod ni naca. Biduidy xtiidza guisudi la Biblia ná nagann ñacni par naʼ».

Scú bunybu pensary portín diti labúu rabanybu sin cobbu gues né guisiambu drogas né diti góc nagann nadzelbu lainy lachquiip. Xcompañerbu ni goyonébu lainy lachquiip, guirá dzú bikíil láabu par guiquimbu drogas. Per Miguel gonabgoluʼ lóo Dios guiduidy fuers láabu par guisiambu drogas, bidxin ór bunybu láani.

Godudy tzón beʼo, Miguel gosaló goniʼ ni casuidy né stipnés buñ ni noʼ lachquiip. Godudy toib íz né ór cú bireʼbu press né goyonisbu xomod toib testigo xtuny Jehová. Bidxin dzú bimbubu toib mbioxhlas gonaʼ né bunybu puext par ñonyibu galtzeʼel. Per órni ma nosi cayatz ti beʼo par gonyibu galtzeʼel bireʼ loguiaʼ stoib galnagan portín bixelcaʼ tribunal láabu por xidal cós mal ni bunybu nírcu, né buñchiin goniʼ que tzeebu lachquiip saa chii íz. Per ló tzón íz gorol bireʼbu portín ma nacbu toib buñ ni natzaay xcalrrien né ór cú ma labúu bunybu galtzeʼel. Miguel ma dipa biabbu ló cós mal stoib.