Libro ni laa, Xi libriya ni rasuidy historia xtuny la Biblia bireʼni ló íz 2012 ló diitz pangasinán ni raniʼ buñ gudx Filipinas, né bireʼni órni merpa caquiin Departamento de Educación de gudxcú láani. Portín orcúpa bidxinyibu toib acuerdo que scuel primaria gacni ló diitz ni raniʼ guirá bimbiox de scuel reʼ. Ló naareʼ, xidal bimbiox caquiinyibu libro reʼ.

Ló gudx Filipinas raniʼyibu más de tigayoʼ diitz, né ma por xidal íz diti bidxinyibu toib acuerdo xi diitz guiquiinyibu par guisuidyibu bimbiox. Ló íz 2012 Departamento de Educación goniʼ que órni mextra rasuidy bimbiox «ló diitz ni raniʼyibu laniolidxbu ór cú rienyibu más naguel». Né desde ór cú buñchiin goloʼyibu toib programa ro bimbiox guisuidy xidal diitz né scuel reʼ non gacni ló diitz ni raniʼyibu laniolidxbu.

Layibu golúyibu diitz pangasinán par guisuidy bimbiox láani lainy yolayscuel. Director de yolayscuel cú goniʼbu que noʼyibu ló toib galrrasaʼ portín yadi libro ló diitz pangasinán par guisuidyibu bimbiox ló gudxcú. Libro ni laa, Xi libriya ni rasuidy historia xtuny la Biblia bireʼni órni merpa caquiinyibu láani, bireʼni ló samblia de tzón govitz ni rap testigos xtuny Jehová ni góc ló beʼo noviembre íz 2012.

Góc imprimir chii mil libros reʼ par guigaisni ló samblia. Bixios bimbiox né bimbiox nigolú bioladxbu órni bibiʼyibu libro ni noʼ ló xtiitzyibu. Toib galtzeʼel goniʼ: «Ximbioxdo nigolú rioladxyibu portín rientzaayibu láani».

Órni godudy samblia stipnés testigos xtuny Jehová goynéyibu libro ni laa, Xi libriya ni rasuidy historia xtuny la Biblia lainy toib yolayscuel de gudx Dagupan. Guirá mextra ni nigolú goniiny naca libro ni noʼ ló pangasinán nigolú bidziguiaʼyibu. Scuel de lagary reʼ gonab más de 340 libros, né ni maca biquiinyibu láani par guisuidyibu bimbiox gan goʼol ló xtiitzca.

Testigos xtuny Jehová rabaladx portín libro reʼ cayacnéni guisuidy bimbiox. Toib ni buñ traducir libro reʼ goniʼbu: «Ma xidzú nando que nigolú raquiin gony traducirdo libros né guiich ló diitz ni raniʼ buñ, né ni radxin lainy xcalnabanyibu. Por ngú testigos xtuny Jehová ronydo xtem par gony traducirdo la Biblia né libros né guiich ni rasuidy ni ná lá Biblia ló xidalgayoʼ diitz».