«Guiráyibu biguaʼyibu toibsi xomod toib family.» Scá góc título xtuny toib periódico ni laa, Frankfurter Rundschau. Né guirá ni bidop cú goniʼyibu que scú gocni.

Karla ni nac de gudx Puerto Rico goniʼ: «Bunyibu que nasaca susica ñoʼya lidxi».

Sara ni nac de Australia bisetlaa: «Gocni susi niguena xfamila ni noʼ stiplad Gudxlio».

¿Xigony gosacyibu scú? Portín goyoʼyibu ló toib samblia internacional ni buny testigos xtuny Jehová, ni góc ló estadio de gudx Commerzbank-Arena de Fráncfort del Meno (Alemania) dzú 18 a 20 de beʼo july íz 2014, ro bidop gahxca 37.000 buñ.

Guirá buñ ni bidop cú bunyibu láani par guicadiagyibu ni rasuidy la Biblia. Ló samblia reʼ bíilyibu la Biblia, bíilyibu cánticos, gonabyibu lóo Jehová, goyoʼ chop drama né goyoʼ xidal discurs ni bisetlaa ni rasuidy la Biblia.

Testigos xtuny Jehová de gudx Alemania bidop lagarycu né bidxin sa 3.000 de stipnés gudxrop xomod Australia, Estados Unidos, Gran Bretaña, Grecia, Líbano, Serbia né Sudáfrica. Láaca bidxin 234 Testigos ni riodieʼ ló xchiin Jehová xomod misioneros, layibu bieedyibu de 70 gudxrop.

Tipnés discurs godudyni ló Internet ló 19 lagary de gudx Alemania né stipnés lagary de gudx Austria né Suiza. Guiránac buñ ni bibiʼ né bicadiag discurs gocyibu 204.046.

Ló gudx Fráncfurt, samblia reʼ gocni ló diitz alemán, inglés né griego. Ló stipnés lagary discurs góc traducirni órcuca ló 17 diitz ni raniʼ buñ, lad guirá diitzreʼ goyoʼ árabe, chino, tamil, turco né chop diitz gop.

Testigos ná gadzé diitz raniʼyibu né nacyibu de gadzé gudxrop né diti toibsi mod nacyibu, raguaʼyibu toibsi portín nadxiʼyibu saʼyibu (Juan 13:34, 35). Ragobioyibu saʼyibu suusi ñacyibu family.

Tobías ni nac de gudx Gran Bretaña goniʼ: «Por lóocano ma biduidyno cuent que noʼno ló guidopynac Gudxlio né diti noʼ ni racaa lóono».

Davianna ni nac de gudx Puerto Rico goniʼ: «Bimbuya Testigos de más de 20 gudxrop. Rientzaayni que ni rony que raguaʼno toibsi láani ngú galnadxiʼ ni napno Jehová né xhermanno».

Malcom ni nac de gudx Australia goniʼ: «Bidxina góca testigo xtuny Jehová lainy toib gudx mit, né guirási ór bíila né bibiʼya video ro rasetlaa ximod lóono raguaʼno toibsi ló guidopy Gudxlio. Per nigoreʼ ma bidudi cuent ximodpa rasac buñ ni noʼ lad family reʼ. Fe ni napa góc nadipni».

Testigos de 58 congregaciones de gudx Fráncfort né stipnés ni noʼ rolooni bunytzaayibu ni guiscadyibu né bunyibu toib galnakit par guirá ni bidxin ló samblia.

Cynthia ni nac de gudx Estados Unidos goniʼ: «Gocyibu buñtzay né godabioyibu lóodo. Dipa sialadxi galnadxiʼ, galrronladx né guirá ni bunyibu por lóodo».

Simon ni nac de gudx Alemania goniʼ: «Guirá lad goyoʼ galnadxiʼ, galrraxiich né biendxich ximod herman bislooy galrronladx lóodo. Bisuidydo xiroʼ de layibu».

Amy ni nac de gudx Australia goniʼ: «Galnakit ni goyoʼ por godzu bislooyni que lóono ni nacno testigos láaca rioʼ nakitno né que diti pórsi Biblia rioʼ ladxñano. Lóono nanno ximod gonyno galnakit ni natzaay».

Samblia ni góc gudx Fráncfort gocni toibtica de xidal samblia internacionales ni góc ló gaʼ gudxrop por guidopynac Gudxlio.

Órni goyoʼ ni gonabdiitz a toib ni goyee samblia reʼ ximod rasacbu, láabu cuapybu: «Bunysi xpensarylo ximod nasaclo pal nimbulo toib buchgolnélo, ni diti nanlo pal noʼ. Per órni rimbulo láabu ragobiobu looy riolidxbu né nigolú raslooybu que nadxiʼbu looy. ¿Nabaladxlo ja? Scúca gosaca órni ralooypani bidzela 37.000 buchgolnéya».