¿Nhuxhe bxeʼlhee?

1 Dioʼsen benhe yabaʼan lhen Yellʼlhiun (Génesis 1:1).

2 Dioʼsen nzi tu lheʼe. Nha lhieʼe Jeoba (Salmo 83:18).

Jeoba zue yabaʼa. Nheke tu spiritw. Bi gake lheidchhunhe (Isaías 66:1; Juan 1:18; 4:24).

3 Dios Jeoban benhe zaʼn anglʼkaʼ yabaʼan. Lhenkze sjenheke spiritw. Tu lhas yugeʼ bsaʼke bene wuen. Kanhiʼte baleʼn bsaʼke ka bene Yellʼlhiu par yeseʼlheideʼ leʼe (Hebreos 1:7).

 4 Jeoba benhe beyixe kaʼa kanhiʼte, ka zeʼ gunhe benen (Génesis 1:25).

5 Jeoba benkse tu bene byu, lhieʼe Adaʼn, nha xhulhen, lhieʼe Eʼva (Génesis 1: 27).

Dioʼsen bnhiteleʼe tu ganheke wuen, o tu luʼu paraiʼso. Benhe tuze xhulhe Adaʼnanʼ. Naʼa kaʼa bene byun bzuʼlhenhe tuze xhulhe (Génesis 2:8, 21, 22, 24).

6 Benen nheke tu aʼlm (Génesis 2:7).

7 Beyixe kaʼa sjenhekeba aʼlm (Génesis 1:24).