LECCIÓN 13
¿Bi shlueide Biblia gake che religión kaʼ?
1. ¿Yuge religión kaʼ sjanheken de wen?
Lhau yuge religión kaʼ lle bene sjanhake bene wen nha bene nhexjʼlhalle. Nha nheken wen shnezdchhu dek sjasake par Dios nha dek nzu yichje leʼ. Per, yashekze nheken, zanhe ba bezechinhe religión par dzunhe de malh (2 Corintios 4:3, 4; 11:13-15). Shnhezdchho dek zan religión bach besechiz chie lhen terrorismo, ga chheseinitʼlhawe bene zan, udile nha bale axtu dzunhe de ka sejen lhen bixkuide. ¡Nhaktek yashelhaz nheken par benen chheyilje Dios du yichj dulhalle! Blhab Mateo 24:3-5, 11, 12.
Ka nheke religión de tuli chhunxhenhen Jeoba. Nha klelhe ka denhi, religión de wenlalle shnen zban chie, denhi shlueiden de wenlalle che Dios nha che benen ba gut, nha bi de yoblhe de bit za lhau Biblia. Per Jeoba zelhalle dek benen gumbie de tuli che leʼ. Blhab Romanos 6:23; 1 Timoteo 2:3-5.
2. ¿Bixde gake che religión kaʼ?
Dios bit txuayage por benen chhesenhe dek tzekde chie, per kun chhesenhen le tzekde che yellʼlhiu che Dexiwe (Santiago 4:4). Biblia nsin yuge religión de wenlalle ka Babilonia la Grande o «leka ciuda blao». Ka bzi tu yell de bchhe kanhite gan bxhe religión de wenlalle ka beyush yejʼ wzio den guke lla che Noé. Ba zu galze, kunkse llin lla kate Dios yenitlhawe yuge religión den chhesexuayag nha chiayin benach. Blhab Apocalipsis 17:1, 2, 5, 16, 17; 18:8.
Naʼ, Jeobá nzu yichje bene wen kaʼ nhaselaz lhau religión de wenlalle den lle lhau yellʼlhiu nha chhetupe chheshage leʼ. ¿Nhakxhe lla? Shlueide leʼ den nheke de tuli. Blhab Juan 6:45.
3. ¿Bi chheyale gun benen chheyilje Dios dulhalle?
Religión de tuli chhunhen ga benen nite txen
Jeoba nzu yichje bene chhekde che de tuli nha tzaklhalle sunhe de wen. Por len shtipʼlhalle leʼ yesebej yichje religión de wenlallen. Shi deliʼ dzekde chie, nha sunhe gazelhauze yeseshe yelemban chie par yesepeide Jeoba. Blhab Apocalipsis 18:4.
Lhau siglo nech, zan bene besezenhage den beselhueide apóstoles kaʼ nha bzunhe kaʼ. Jeoba blhueide bene ki tu yelemban de kube ga yesenhite mbalhaz, de sejeden nha yesebeze tu de wen. Ka bene ki, lekseka chhio chheyale uzenhagchho ka den shna lhau Xtille Dios de uzuchho Jeoba de nech lhau yelemban chechhon. Blhab 1 Tesalonicenses 1:8, 9; 2:13.
Jeoba chhebeide shgu lhau nheʼe bene chhechhoj lhau religión de wenlalle nha tzake txen de tulin. Yuge chheseizibanheze sjanheke xmigw Dios, site tzekde che ljwelle nha sjanhunhe lhez yesebanhe tushize. ¿Chhaklhallo zio banhez yuge deki? Blhab Marcos 10:29, 30; 2 Corintios 6:17, 18.
4. ¿Bide gun Dios par suʼ benen binlo nha mbalhaz lhau dulhu yellʼlhiu?
Kate Jeoba yenite religión de wenlalle, benachen yezue mbalhaz. Bit siyechhen benach nha yuge yesenhite txen. Yuge benach sunxhenhe tuze Dios tuli. ¿Nheken tu dille wen par lhe? Blhab Apocalipsis 18:20, 21; 21:3, 4.
