Inkulumo ethi “IJerusalema Elisha” ivela kabili eBhayibhelini, isho idolobha elingokomfanekiso elimelela iqembu labalandeli bakaJesu abazobusa naye eMbusweni kaNkulunkulu ezulwini. (IsAmbulo 3:12; 21:2) EBhayibhelini leli qembu liphinde libizwe ngokuthi umakoti kaKristu.

1. IJerusalema Elisha lisezulwini. Njalo lapho iBhayibheli likhuluma ngeJerusalema Elisha, kuthiwa lehla livela ezulwini lapho izingelosi zigade khona amasango aleli dolobha. (IsAmbulo 3:12; 21:2, 10, 12) Ubukhulu baleli dolobha buwubufakazi bokuthi akunakwenzeka ukuba libe semhlabeni. Kuthiwa kungadingeka uhambe amakhilomitha angu-2200 ukuze ulizungeze lonke. (IsAmbulo 21:16) Izinhlangothi zalo zicishe zibe amakhilomitha angu-560 ukuphakama, okusho ukuthi zingafinyelela emkhathini.

2. IJerusalema Elisha lakhiwa iqembu labalandeli bakaJesu, umakoti kaKristu. IJerusalema Elisha libizwa ngokuthi “umlobokazi, umka Wundlu.” (IsAmbulo 21:9, 10) Kule ncazelo engokomfanekiso, iWundlu libhekisela kuJesu Kristu. (Johane 1:29; IsAmbulo 5:12) “Umka Wundlu,” umakoti kaKristu, umelela amaKristu azoba noJesu ezulwini. IBhayibheli lifanisa ukuhlobana okukhona phakathi kukaJesu nala maKristu nobuhlobo obuphakathi kwendoda nenkosikazi. (2 Korinte 11:2; Efesu 5:23-25) Ngaphezu kwalokho, amatshe esisekelo seJerusalema Elisha abhalwe “amagama ayishumi nambili abaphostoli abayishumi nambili beWundlu.” (IsAmbulo 21:14) Ukwazi lokhu kuyasisiza sithole ukuthi liyini iJerusalema Elisha, ngoba amaKristu abizelwa ukuba ayophila ezulwini ‘akhiwe phezu kwesisekelo sabaphostoli nabaprofethi.’​—Efesu 2:20.

3. IJerusalema Elisha liyingxenye kahulumeni. IJerusalema lasendulo laliyinhloko-dolobha yakwa-Israyeli lapho iNkosi uDavide, indodana yakhe uSolomoni, nenzalo yabo babebusa khona “esihlalweni sobukhosi sikaJehova.” (1 IziKronike 29:23) IJerusalema, elalibizwa ngokuthi “umuzi ongcwele,” lalimelela ukubusa kukaNkulunkulu esebenzisa uhlu lozalo lukaDavide. (Nehemiya 11:1) IJerusalema Elisha nalo eliphinde libizwe ngokuthi ‘umuzi ongcwele,’ lakhiwa yilabo abazoba noJesu ezulwini “babuse njengamakhosi phezu komhlaba.”​—IsAmbulo 5:9, 10; 21:2.

4. IJerusalema Elisha lilethela abantu emhlabeni izibusiso. IJerusalema Elisha lichazwa ngokuthi ‘lehla livela ezulwini kuNkulunkulu,’ okubonisa ukuthi uNkulunkulu usebenzisa lona ukuze afeze intando yakhe emhlabeni. (IsAmbulo 21:2) Le nkulumo ihlobanisa iJerusalema Elisha noMbuso kaNkulunkulu, okuyiwona uNkulunkulu awusebenzisayo ukuze afeze intando yakhe ‘emhlabeni, njengasezulwini.’ (Mathewu 6:10) Intando kaNkulunkulu iwukuba abantu emhlabeni bathole lezi zibusiso ezilandelayo:

   • Ukuqedwa kwesono. “Umfula wamanzi okuphila” ugeleza uvela eJerusalema Elisha futhi unisela “imithi yokuphila” ‘engeyokwelapha izizwe.’ (IsAmbulo 22:1, 2) Lokho kwelapha kuzosusa isono futhi kwenze abantu bakwazi ukuba nokuphila okungenazinkinga njengoba uNkulunkulu ayehlosile ekuqaleni.​—Roma 8:21.

   • Ubuhlobo obuhle phakathi kukaNkulunkulu nabantu. Isono senze abantu baqhela kuNkulunkulu. (Isaya 59:2) Ukuqedwa kwesono kuzokwenza ukuba lesi siprofetho sigcwaliseke: “Itende likaNkulunkulu likanye nabantu, uyohlala nabo, babe ngabantu bakhe. UNkulunkulu ngokwakhe uyoba nabo.”​—IsAmbulo 21:3.

   • Ukuphela kokufa nokuhlupheka. Esebenzisa uMbuso wakhe, uNkulunkulu “uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona.”​—IsAmbulo 21:4.