Yebo, ngomqondo wokuthi uyasishintsha isimo sakhe sengqondo lapho abantu beshintsha indlela abaziphatha ngayo. Ngokwesibonelo, lapho uNkulunkulu ekhipha isahlulelo kubantu bakwa-Israyeli wasendulo, wathi: “Mhlawumbe bayolalela babuye, yilowo nalowo endleleni yakhe embi, bese ngizisola ngenhlekelele engicabanga ukuyikhipha phezu kwabo ngenxa yobubi bezenzo zabo.”​—Jeremiya 26:3.

Izinguqulo zeBhayibheli eziningi zihumusha leli vesi ngokuthi uNkulunkulu “angaphenduka” enhlekeleleni abeyihlosile, okunganikeza umqondo wokuthi usuke enze iphutha. Nokho, igama lesiHebheru lokuqala lingasho “ukushintsha umqondo noma inhloso.” Esinye isazi sabhala: “Ukushintsha kwendlela umuntu aziphatha ngayo, kushintsha isahlulelo sikaNkulunkulu.”

Nokho, ukuthi uNkulunkulu angawushintsha umqondo wakhe akusho ukuthi uphoqelekile ukuba awushintshe. Cabanga ngezimo iBhayibheli elibonisa kuzo ukuthi uNkulunkulu akawushintshanga umqondo:

• UNkulunkulu akamvumelanga uBhalaki ukuba amenze ashintshe umqondo waKhe futhi aqalekise isizwe sakwa-Israyeli.​—Numeri 23:18-​20.

• Lapho uSawulu, iNkosi yakwa-Israyeli, egxila ekwenzeni okubi uNkulunkulu akazange awushintshe umqondo waKhe wokumenqaba njengenkosi.​—1 Samuweli 15:28, 29.

• UNkulunkulu uzosifeza isithembiso sakhe sokwenza iNdodana yakhe ibe umpristi phakade. UNkulunkulu ngeke awushintshe umqondo waKhe.​—IHubo 110:4.

Yebo, iBhayibheli licaphuna uNkulunkulu ethi: “NginguJehova; angizange ngishintshe.” (Malaki 3:6) Ngokufanayo, iBhayibheli lithi uNkulunkulu ‘akashintshashintshi njengokuphenduka kwethunzi.’ (Jakobe 1:​17) Nokho, lokhu akuphikisani nalokho okushiwo iBhayibheli ngokushintsha kukaNkulunkulu umqondo. UNkulunkulu akashintshi ngomqondo wokuthi ubuntu bakhe nezimiso zakhe zothando nobulungisa azilokothi zishintshe. (Duteronomi 32:4; 1 Johane 4:8) Noma kunjalo, anganika abantu iziqondiso ezihlukahlukene ngezikhathi ezingafani. Ngokwesibonelo, uNkulunkulu wanika iNkosi uDavide iziqondiso ezingafani mayelana nokulwa izimpi ezimbili ezazilandelana, nokho zombili lezi zindlela zaphumelela.​—2 Samuweli 5:​18-​25.

Cha, kodwa uyazisola ngokuthi abantu abaningi abamnaki futhi bayamenqaba. Lapho lichaza izimo zangaphambi kukaZamcolo wosuku lukaNowa, iBhayibheli lithi: “UJehova wadabuka ngokuthi wayebenzile abantu emhlabeni, futhi wezwa ubuhlungu enhliziyweni yakhe.” (Genesise 6:6) Kuleli vesi, igama elithi “wadabuka” livela egameni lesiHebheru elingase lisho “ukushintsha umqondo.” UNkulunkulu washintsha umqondo ngeningi labantu abaphila ngaphambi kukaZamcolo ngoba base bebabi. (Genesise 6:​5, 11) Nakuba kwamdumaza ukuthi bakhetha ukwenza okubi, akazange ashintshe indlela asibheka ngayo sonke isintu. Eqinisweni, walondoloza abantu kuZamcolo ngoNowa nomndeni wakhe.​—Genesise 8:​21; 2 Petru 2:​5, 9.