IBhayibheli lithi “uJehova ngeke abagodlele okuhle labo abahamba ngobuqotho.” (IHubo 84:11) Kusho ukuthini ‘ukuhamba ngobuqotho’? Kusho ukuphila ngendlela ebonisa ukuthi uyasigcina isithembiso owasenza kuJehova ngesikhathi uzinikezela kuye. (UmShumayeli 5:4, 5) Ungahamba kanjani ngobuqotho ngemva kokubhapathizwa?

Kulesi sihloko

•  Qhubeka ukhuthazelela izinkinga

•  Qhubeka umelana nezilingo

•  Qhubeka ukhulisa intshiseko yakho

 UmBhalo oyinhloko: “Kumele singene eMbusweni kaNkulunkulu ngezinsizi eziningi.”—IzEnzo 14:22.

 Incazelo: Uma sibhekana namaqiniso, wonke amaKristu azobhekana nezinkinga ekuphileni. Ezinye izinkinga ozobhekana nazo, njengokwenziwa ihlaya noma ukuphikiswa, zibangelwa ukuthi ungumKristu. Ezinye, njengezinkinga zemali noma ukugula, zingathinta bonke abantu.

 Ongakulindela: Izimo zakho zizobuye zishintshe, ngezinye izikhathi zizoshintsha ngezindlela ongazithandi. IBhayibheli lithi izinto ezimbi zingenzeka kunoma ubani—kumaKristu nakubantu abangewona amaKristu.—UmShumayeli 9:11.

 Ongakwenza: Njengoba wazi ukuthi ukuphila kwakho kuzoba nezinselele, ungazilungiselela ukubhekana nazo. Bheka izinselele njengethuba lokuqinisa ukholo lwakho, nelokunamathelana ngisho nakakhulu noJehova. (Jakobe 1:2, 3) Ngokuhamba kwesikhathi, nawe ungakwazi ukusho la mazwi njengomphostoli uPawulu: “Nginamandla azo zonke izinto ngenxa yalowo ongipha amandla.”—Filipi 4:13.

 Icebiso: Funda ngoJosefa. Ungafunda ngokuphila kwakhe kuGenesise izahluko 37 no-39 kuya ku-41. Cabanga ngalokhu: Yiziphi izinkinga ezingalindelekile ezaphakama, wabhekana kanjani nazo? UJehova wamsiza kanjani uJosefa?

 Ufuna okwengeziwe?

•   Funda:

   “Ngingabhekana Kanjani Nesenzakalo Esibuhlungu?”

   “Ngiphikelela Kangakanani?”

   “Indlela Yokubhekana Noshintsho”

•   Dawuniloda:

   “Lapho Umzali Egula”

 UmBhalo oyinhloko: “Yilowo nalowo ulingwa ngokuhehwa nangokuyengwa yisifiso sakhe.”—Jakobe 1:14.

 Incazelo: Sonke sibuye sibe nezifiso ezingasenzisa okungalungile uma zingalawulwa.

 Ongakulindela: Ngemva kobhapathizo, usazoba nazo ‘izifiso zenyama.’ (2 Petru 2:18) Ungaze ufise nokuya ocansini ungakashadi.

 Ongakwenza: Senze manje isinqumo—ngaphambi kokufika kwesilingo—ukuze ungavumeli izifiso nemizwa ukuba kukwenzele izinqumo. Ungakhohlwa ukuthi uJesu wathi: “Akekho ongakhonza amakhosi amabili.” (Mathewu 6:24) Ungazikhethela ukuthi ubani ozoba inkosi yakho. Akube uJehova. Kungakhathaliseki ukuthi leso sifiso esibi sinamandla kangakanani, unawo amandla okungakwenzi esikufunayo.—Galathiya 5:16.

 Icebiso: Funda ukubona izindawo onamandla kuzo nobuthakathaka kuzo. Khetha abangani abakwenza ube nezimfanelo ezinhle. Gwema abantu, izindawo nezimo ezenza kube nzima ukuba wenze okulungile.—IHubo 26:4, 5.

 Ufuna okwengeziwe?

•   Funda:

   “Ngingamelana Kanjani Nezilingo?”

   “Ngingakugwema Kanjani Ukucabangana Nocansi?”

   “Indlela Yokumelana Nokucindezela Kontanga”

   “Ingabe Uyayivumelanisa Imicabango Yakho NekaJehova?”

 UmBhalo oyinhloko: ‘Bonisani inkuthalo efanayo kuze kube sekupheleni, ukuze ningavilaphi.’—Hebheru 6:11, 12.

 Incazelo: Umuntu ongagxili emsebenzini wakhe kulula ukuthi ahudule izinyawo futhi avilaphe.

 Ongakulindela: Kungenzeka wawujabule nentshiseko yakho ivutha ngemva kokubhapathizwa. Wawumthanda kakhulu uJehova. Kodwa ngokuhamba kwesikhathi, kungase kube nzima ukuqhubeka ulalela uJehova kuzo zonke izinto, lokho kungakuqeda amandla, kunciphise nentshiseko yakho.—Galathiya 5:7.

 Ongakwenza: Ungayeki ukwenza into efanele, ngisho noma kubuye kungavumi ngezinye izikhathi. (1 Korinte 9:27) Sondelana noYihlo osezulwini ngokuthi ufunde ngaye, nangokuthi ukhulume naye njalo ngomthandazo. Zama ukuba ngabangani abakhulu nabantu abathanda ukukhonza uJehova.

 Icebiso: Khumbula ukuthi uJehova ukuthanda kakhulu nokuthi ukulungele ukukusiza. Ungavele ucabange ukuthi ukuthukuthelele ngenxa nje yokuthi usaphelelwe intshiseko okwesikhashana. IBhayibheli lithi: “Unika okhathele amandla abanike amandla aphelele labo abangenamandla.” (Isaya 40:29) Ngokuhamba kwesikhathi, uzoyibusisa imizamo oyenzayo ukuze uvuselele intshiseko yakho.

 Ufuna okwengeziwe?

•   Funda:

   “Basha—Qhubekani Nisebenzela Ukusindiswa Kwenu”

   “Ngingakwenza Kanjani Ukukhulekela UNkulunkulu Kujabulise?”

•   Buka:

   Okushiwo Ontanga Yakho—Ukuphila Okungcono Kakhulu

 Iphuzu elibalulekile: Uma uhamba ngobuqotho, uzokwenza inhliziyo kaJehova ijabule! (IzAga 27:11) Uzojabula ngenxa yokuthi ukhethe ukuba sohlangothini lwakhe, uzokunika konke okudingayo ukuze umelane nokuhlasela kukaSathane.