NOVEMBA 9, 2018
E-UKRAINE
Ukwamukela Izivakashi Nobunye Okwabonakala Emhlanganweni Okhethekile E-Ukraine
NgoJulayi 6-8, 2018, oFakazi BakaJehova bamukela izinkulungwane zabafowabo nodadewabo ababeze emhlanganweni okhethekile owawuseLviv e-Ukraine. Izihambeli ezingaphezu kuka-3 300 ezivela emazweni angu-9 zathutheleka e-Ukraine ukuze zizozuza emhlanganweni okhethekile owawunesihloko esithi “Yiba Nesibindi”! Lezi zihambeli zaphinde zajabulela nokwamukelwa ngabafowethu base-Ukraine ngezandla ezifudumele.
Ukulungiselela lo mhlangano okhethekile kwaqala ngo-Ephreli 2017, futhi ezinyangeni ezingu-15 ezalandela oFakazi bendawo banikela ngesikhathi sabo ukuze basize ekwenzeni amalungiselelo nasekwamukeleni abazalwane ababeze kulo mhlangano. Izihambeli zalo mhlangano zajabulela ukubona izinto eziyingxenye yamasiko ase-Ukraine njengemidanso, umculo, nokudla kwakule ndawo. Kwaphinde kwahlelwa ukuba izivakashi ziboniswe amamnyuziyamu, imizi yakudala kanye nezintaba ezinhle ezibizwa ngokuthi ama-Carpathian. Okwaba kuhle nakakhulu ukuthi izivakashi zathola ithuba lokushumayela noFakazi base-Ukraine.
Umhlangano wawubanjelwe enkundleni enkulu yaseLviv, futhi kwakunezilaleli ezingaphezu kuka-25 000. Izingxenye eziyinhloko zalo mhlangano zasakazwa nakwezinye izinkundla ezingu-15 nasemaHholo OMbuso amaningana, okwenza isibalo esiphelele sabawulalela safinyelela ku-125 000 futhi kwabhapathizwa abangu-1 420.
U-Ivan Riher ongummeleli wehhovisi legatsha lase-Ukraine wathi: “Besisibheke ngabovu lesi senzakalo kanye nethuba lokwamukela abafowethu nodadewethu bakwamanye amazwe. Sikujabulele kakhulu ukwamukela abafowethu, futhi lesi senzakalo siqinise ubunye nesibindi esinaso njengabazalwane emhlabeni wonke.”—IHubo 133:1.
Ababekhona enkundleni yomhlangalo eLviv bafinyelela ku-25 489.
Omunye wabadala kakhulu kwabangu-1 420 ababhapathizwa.
Omunye wentsha eningi eyabhapathizwa kulo mhlangano.
Abamemezeli bahlanganiswa nezihambeli ukuze kumenye umphakathi ohlala edolobheni umhlangano owawuzoba kulo.
Igatsha laqasha i-Lviv Opera House enesiteji esikhulu kunazo zonke ezinye kuleli dolobha. Izihambeli zajabulela ukubona imidanso kanye nomculo wase-Ukraine. Ekuphetheni kwaculwa ingoma ethi “NguJehova Igama Lakho.”
OFakazi bendawo badansa umdanso wamaRomany endaweni okuthiwa iSvirzh Castle.
Lapho kuphela umhlangano, abamemezeli bendawo baphakamisa izingqwembe ezazinemibhalo ebonisa indlela ababathanda ngayo abafowabo nodadewabo.
Okunye Ongase Ukuthande
EZISANDA KUKHISHWA
Umhlangano Wesifunda Okhethekile Wokuqala ETbilisi, EGeorgia
Bekuqala ukuthi kube nomhlangano okhethekile eGeorgia. Kube nezinkulumo eziningi ezakhayo, izihambeli zamukelwe ngemfudumalo, futhi zaboniswa izinto ezihlobone namasiko nomlando waleli zwe.
IZENZAKALO EZIKHETHEKILE
Bamunye Othandweni—Umhlangano WaseFrankfurt, EGermany
Izinkulungwane zabantu abavela emazweni ahlukahlukene bahlangana ngobunye nangokuthula.
IZENZAKALO EZIKHETHEKILE
Asifuni Ukuba Kuphele
Bona uthando nobunye phakathi bakwabantu bezinhlanga ezingefani, izilimi namaqembu ezizwe kulo mhlangano okhethekile owawuseYangon, eMyanmar.