ENEW YORK—Ngo-June 20-22 nango-June 27-29, 2014, oFakazi BakaJehova bagcwala phama enkundleni yaseMetLife e-East Rutherford, eNew Jersey, bebuthanele uMhlangano Wezizwe onesihloko esithi “Qhubekani Nifuna Kuqala UMbuso!” owawuqhutshwa ngesiNgisi nangeSpanishi.

Isibalo sabo bonke ababekhona ngazo zombili lezo zimpelasonto safinyelela kubantu abangaphezu kuka-118 000 futhi lona kwaba umhlangano omkhulu kunayo yonke oFakazi abake baba nayo emadolobheni amakhulu aseNew York emashumini eminyaka edlule. Abangaphezu kuka-407 000 kwamanye amadolobha babukela ezinye zezinkulumo kuma-video, okwenza ukuba inani labantu ababa khona lifinyelele kubantu abangaphezu kuka-525 500.

Izingxenye eziningi zohlelo zazibonisa okwenzeka futhi zinama-video abonisa indlela esingakusebenzisa ngayo lokho okushiwo iBhayibheli. Ilungu leNdikimba Ebusayo yoFakazi BakaJehova elilodwa labeka inkulumo yokuphetha kuyo yomibili le mihlangano. UDavid Splane wayibeka ngo-June 20-22; uGeoffrey Jackson, ngo-June 27-29.

Emhlanganweni ngamunye kwaba khona ababhapathizwayo. Bangu-1 255 ababhapathizwa enkundleni, abanye abangu-2 930 babhapathizelwa kwezinye izindawo ezazixhunywe nge-video esimisweni, okwenza ukuba selilonke inani lababhapathizwa libe u-4 185.

Kwakukhona izihambeli ezazivela e-Argentina, e-Australia, eBelize, eBritain, eChile, eCosta Rica, e-El Salvador, eGermany, eGreece, eGuatemala, eHonduras, e-Italy, eMalaysia, eMexico, eNicaragua, ePanama, ePeru, eSpain, naseVenezuela.

UJ. R. Brown, okhulumela oFakazi BakaJehova, uthi: “Lesi senzakalo sikhumbuze abaningi bethu umhlangano owaba ingqopha-mlando eNew York emuva lé ngo-1958. Lowo mhlangano wawuphakathi kweYankee Stadium nePolo Grounds ngesikhathi isekhona, bangaphezu kuka-253 000 ababa khona. Ngokuqinisekile le mihlangano ebisenkundleni yaseMetLife kulo nyaka izobhekwa njengeyigugu emlandweni woFakazi BakaJehova.”