EFORT LAUDERDALE, eFla.—Ngo-November 14, 2014, oFakazi BakaJehova baqala ukuthuthela iqembu labo labahumushi boLimi Lwezandla LwaseMelika eFort Lauderdale, eFlorida, besuka e-Watchtower Educational Center esePatterson, eNew York. OFakazi bebelokhu behumushela amaBhayibheli nezincwadi ezisekelwe eBhayibhelini oLimini Lwezandla LwaseMelika ezakhiweni zase-Patterson kusukela ngo-1995. Ezinyangeni ezimbalwa ezidlule, oFakazi bebelungisa kabusha indawo yaseFort Lauderdale bakha namahhovisi amasha nezindawo zokuqopha. Kusukela ngo-May 2015, ihhovisi labahumushi boLimi Lwezandla LwaseMelika loFakazi selisebenza ngokugcwele.

OFakazi benza ukuba ama-video abo oLimi Lwezandla LwaseMelika atholakale kuyi-Internet ku-jw.org nangama-DVD. Babuye bawafake njalo emihlanganweni yabo yamasonto onke eqhutshwa emabandleni angaphezu kuka-500 emhlabeni wonke nasezenzakalweni eziqhutshelwa ezindaweni ezinkulu, ezihlanganisa imihlangano yesigodi eqhutshwa kabili ngonyaka neyesifunda eqhutshwa kanye ngonyaka.

UJonathan Galvez, ongumxhumanisi weqembu labahumushi boLimi Lwezandla LwaseMelika eFlorida, uthi: “Umgomo wethu uwukuqinisekisa ukuthi ama-video ethu aqondakala kalula kubantu abasebenzisa uLimi Lwezandla LwaseMelika, kungakhathaliseki ukuthi bavelaphi nokuthi lingakanani izinga labo lemfundo.” Uyanezela: “ULimi Lwezandla LwaseMelika lusetshenziswa emazweni angaba ngu-45 futhi, njengoba kunjalo nangezilimi ezikhulunywayo, abantu abayizithulu bakhuluma ngendlela ehlukile kuye ngezigodi. Manje njengoba sesithuthele eFort Lauderdale, abahumushi bethu sebengene phakathi edolobheni elinabantu abaningi abahlukahlukene abavela emhlabeni wonke abasebenzisa uLimi Lwezandla LwaseMelika.”

Ngo-2014, uFrank Bechter, oneziqu zobudokotela kuyisayensi yezenhlalo neyezilimi, waya emhlanganweni wesifunda woFakazi BakaJehova woLimi Lwezandla LwaseMelika owawuseRichmond, eVirginia, eyokwenza ucwaningo lwakhe ngezilimi nenhlalo yabantu oluphathelene nolimi lwezandla nabantu abayizithulu. UDkt. Bechter uyaphawula, “Ukuzinikela kwenhlangano yenu ekuhumusheni nasekukhiqizeni izinto zoLimi Lwezandla LwaseMelika zezinga eliphezulu bekucacile impela kulesi senzakalo ebesiseRichmond, ikakhulukazi ngenxa yokusetshenziswa ngokuphindaphindiwe kwama-video enu enziwe kahle ahumusha amavesi eBhayibheli.” Ngithole ukuthi uLimi Lwezandla LwaseMelika olukuwo ludla ubhedu.” Uyaqhubeka, “Ngiyayazisa imizamo yoFakazi yokuhumushela iBhayibheli oLimini Lwezandla LwaseMelika, ngoba liyincwadi ebaluleke kakhulu emphakathini wethu nasemlandweni wezwe. Futhi ngikholelwa ukuthi abantu abayizithulu, njengabo bonke abanye, kufanele bakwazi ukuzifinyelela kalula izincwadi ezibalulekile eziye zathinta umhlaba.”

Amaqembu abahumushi oFakazi BakaJehova emhlabeni wonke aye akhiqiza futhi asakaza mahhala izincwadi eziningi ezingama-video ngezilimi zezandla ezingaba ngu-80. OFakazi BakaJehova baye bakhiqiza ne-JW Library Sign Language, i-app eyenza kube lula ukudawuniloda ama-video ezilimi zezandla kuyi-jw.org, ukuwahlela nokuwadlala.

Abezindaba:

Emhlabeni-jikelele: uJ. R. Brown, Ihhovisi Lokwaziswa, ucingo +1 718 560 5000