ENEW YORK—Ngemva komsebenzi wokulungisa wezinsuku eziyisithupha, oFakazi BakaJehova baphinde bayivula iStanley Theater edumile eJersey City, eNew Jersey, ngo-April 13, 2013. OFakazi bebelokhu besebenzisa lesi sakhiwo njengeHholo LeMihlangano emikhulu yeBhayibheli iminyaka engaba ngu-30. Umsebenzi abawenzile uye wayivuselela le ndawo yokuthola imfundo yeBhayibheli yamahhala.

Izihlalo ezintsha ezifakiwe zenze lesi sakhiwo sakulungela kangcono ukuthwala abantu abangaphezu kuka-250 000 ababa nemihlangano minyaka yonke lapha. Ihholo elikhulu namagumbi aligudlile afakelwe isimiso se-video sezinga eliphakeme esiklanyelwe ngokuyinhloko ukubonisa uLimi Lwezandla LwaseMelika.

Cishe wonke umsebenzi wokulungisa wenziwe oFakazi BakaJehova kuphela abavume ngokuzithandela ukuba basize. Lezi zisebenzi zokuzithandela zize zivela ezindaweni ezihlukahlukene ze-United States ukuze zizohlanganyela ekulungiseni lesi sakhiwo esidala esinomlando okhethekile.

IStanley Theater ibilokhu iseNew Jersey kusukela ngasekupheleni kwawo-1920. Yayingesinye sezikhungo zokubukela amabhayisikobho ezinkulu kunazo zonke ezazike zakhiwa e-United States. Kwadingeka ivalwe ngo-1978 kodwa ngo-1983, oFakazi BakaJehova basivuselela lesi sakhiwo esinomlando omude esase siwohlokile. OFakazi bebelokhu besisebenzisela ukufunda ngeBhayibheli kusukela ngesikhathi siphinde sivulwa ngo-1985.

UJ. R. Brown, umkhulumeli woFakazi BakaJehova, usho lokhu mayelana nokulungiswa kwalesi sakhiwo kwamuva: “Ngokuyinhloko iStanley Theater isebenza njengendlu yokukhulekela, lapho abantu bezilimi ezingaphezu kuka-15 beza khona ukuze bafunde iBhayibheli. Kodwa abantu baseNew Jersey bayithanda kakhulu, futhi inhlangano yethu iyakujabulela ukuyigcina isesimweni esihle.”

Media Contact(s):

International: J. R. Brown, Office of Public Information, tel. +1 718 560 5000