JUNI 23, 2020
EGEORGIA
Ukukhulwa Kwe-Nguqulo Yezwe Elisha Ebukeziwe NgesiGeorgian
NgeSonto likaJuni 21, 2020, kwakhululwa i-Nguqulo Yezwe Elisha YemiBhalo Engcwele ebukeziwe ngesiGeorgian emhlanganweni okhethekile owaqhutshwa ngezobuchwepheshe bevidiyo. UMfoweth’ uGeoffrey Jackson, oyilungu leNdikimba Ebusayo, wakhulula leli Bhayibheli enkulumweni eyaqoshwa kusengaphambili. Kwaba nengqikithi yabantu abangu-19 521 abathamela lo mhlangano. Uhlelo olutholakala emishinini yobuchwepheshe lwale nguqulo ebukeziwe lwabe selutholakala ngaso leso sikhathi ukuba ludawunilodwe ku-jw.org.
Umsebenzi wokubukeza iBhayibheli lesiGeorgian wathatha iminyaka emine ukuba uphothulwe. Omunye umhumushi uthi, “Ulimi olulula lwenza ukuba imiBhalo iqondakale kalula kwabadala nabancane, ngakho ngithemba ukuthi imindeni izokuthokozela ukutadisha ndawonye.”
Omunye umhumushi wathi, “Umgomo wethu kwakuwukusiza bonke abafundi ukuba balithole kalula iphuzu, noma ngabe banemfundo engakanani.”
Siyaqiniseka ukuthi bonke abasebenzisa le nguqulo yeBhayibheli enembile necacile bayochichima ukumbonga uJehova ngenxa yalolu thando ababonise lona.—Jakobe 1:17.
Okunye Ongase Ukuthande
IMIBUZO EVAME UKUBUZWA
Ingabe OFakazi BakaJehova BaneBhayibheli Labo?
Ukusebenzisa izinguqulo ezihlukahlukene zeBhayibheli kungathuthukisa ukutadisha kwakho iBhayibheli. Kunamaphuzu amathathu ngokukhethekile enza INguqulo Yezwe Elisha YemiBhalo Engcwele ikufanelekela ukuba uyisebenzise lapho utadisha.