Emcimbini owawungoMeyi 7, 2018, ekamu lokuhlushwa osekugcinwa kulo izikhumbuzo ezingokomlando eDachau, kwembulwa itshe lesikhumbuzo likaMfoweth’ uMax Eckert owayeboshwe kuleli kamu iminyaka emibili ngaphambi kokudluliselwa kwelinye ikamu elidumile lase-Austria, iMauthausen. UMfoweth’ uMax Eckert wafela kulelo kamu. Leli tshe lesikhumbuzo lembulwa phambi kwezibukeli ezingaba ngu-200. Nakuba abantu abaningi babengamazi uMfoweth’ u-Eckert, manje sebeyazi ukuthi wayeyindoda enokholo nethembekile kuNkulunkulu.

Imibiko ephathelene nokuphila kukaMfoweth’ u-Eckert ibonisa ukuthi wahlala eqotho kuNkulunkulu. Ngo-1935, yena nomkakhe bahlawuliswa ngenxa yokuxoxa nabanye ngokholo lwabo. Kamuva walahlekelwa umsebenzi ngenxa yokwenqaba ukuphatha ifulege laseGermany, elalunophawu lwamaNazi. Ngo-1937, waba phakathi koFakazi BakaJehova abangaba ngu-600 ababeqinile okholweni, ababeboshwe ejele laseDachau. Ngemva kweminyaka emibili, wadluliselwa ejele laseMauthausen, okwafela kulo iziboshwa ezingaphezu kuka-90 000 ngenxa yempatho enesihluku. NgoFebhuwari 21, 1940, inkosikazi kaMfoweth’ u-Eckert yathola incwadi ephuthumayo, eyayibhalwe ngendlela eyayingabonisi nhlobo uzwela nothando, iyibikela ngokushona komyeni wayo. Yayithi: “Umyeni ushonele ekamu namuhla. Uma ufuna okwengeziwe, xhumana namaphoyisa.” U-Eckert wayeneminyaka engu-43.

Ngesikhathi ethula inkulumo yakhe kulo mcimbi, uDkt. Gabriele Hammermann ongumqondisi Wesikhungo Sezikhumbuzo Zasekamu Lokuhlushwa LaseDachau wathi: “Abafundi BeBhayibheli [okuyigama oFakazi BakaJehova ababaziwa ngalo ngaleso sikhathi] babephathwa kabi ngenxa yokuthi izinkolelo zabo zazingabavumeli ukuba babe amalungu anoma iyiphi inhlangano yamaNazi, badumise uHitler noma basebenze kwezempi.” Wanezela wathi: “Ezinye iziboshwa ezaziboshwe nabo zabancoma Abafundi BeBhayibheli ngokubambelela ngokuqinile enkolweni yabo, nokuhlale bekulungele ukusiza.”

UMfoweth’ uWolfram Slupina, ongumkhulumeli wenhlangano yoFakazi BakaJehova eGermany, waphawula ukuthi abaningi ababekhona kulo mcimbi babengamazi uMfoweth’ u-Eckert. Wathi: “Asinaso ngisho nesithombe sakhe.” Kodwa wabonisa ukuthi itshe lesikhumbuzo lalizosiza abaningi “babone indlela [uMfoweth’ u-Eckert] ayezimisele ngayo ukubambelela ngokuqinile enkolweni yakhe, ngisho noma lokho kwakusho ukufa.”

Asingabazi ukuthi uJehova uyalukhumbula ukholo nobuqotho bukaMax Eckert, nabanye oFakazi BakaJehova abafa ngenxa yokholo lwabo.—Hebheru 6:10.