NgoJuni 7, 2022, iNkantolo YaseYurophu Yamalungelo Abantu (ECHR) ikhiphe isinqumo esimelene neLithuania ecaleni likaMfoweth’ uStanislav Teliatnikov, owanqaba ukuya empini ngenxa kanembeza. I-ECHR inqume ukuthi ilungelo lokunqaba ngenxa kanembeza liqinisekiswe yisiSiphakamiso 9 soMthetho-sisekelo Wamalungelo Abantu BaseYurophu, lesi Siphakamiso siphathelene nelungelo lenkululeko yokucabanga, inkululeko yokuzinqumela ngenxa kanembeza nangenxa yenkolo. Ngakho, iNkantolo YaseYurophu inqume ukuthi iLithuania yephule uMthetho-sisekelo, yathi mayikhokhele uMfoweth’ uStanislav imali engango-R56 567.

Cishe wonke amalungu oMkhandlu WaseYurophu anawo umsebenzi owehlukile onikezwa izakhamuzi ezingayi kwezempi (ACS) uma kudingeka. Lapho uStanislav kuthiwa makaye kwezempi, wacela i-ACS ngokuvumelana nomthetho waseYurophu. ILithuania ayinalo leli lungiselelo. Esinqumweni se-ECHR esimelene neLithuania nakwezinye izinqumo ezithi azifane ezimelene ne-Armenia, i-Azerbaijan neTurkey, i-ECHR iphinde yathi wonke amalungu oMkhandlu WaseYurophu kufanele anikeze umsebenzi owehlukile izakhamuzi ezingayi kwezempi, ongazijezisi noma uzicwase futhi oyobe ungahlanganise lutho nezempi.

I-Armenia isinalo uhlelo lokunikeza izakhamuzi ezingayi kwezempi umsebenzi owehlukile. Izinsizwa ezingayi kwezempi ngenxa kanembeza zinganikezwa umsebenzi wokusiza umphakathi.

Sithemba ukuthi iLithuania nayo izosilandela isiqondiso se-ECHR sokuba inikeze izakhamuzi ezingayi kwezempi umsebenzi owehlukile ngoba lokhu kuzosiza abafowethu kanye nomphakathi abahlala kuwo. Okwamanje, siyazi ukuthi uJehova uzoqhubeka ebanakekela abafowethu eLithuania, abaqondise futhi abasekele.—IsiLilo 3:25