NgoJulayi 13, 2020, amaphoyisa ahlome ngezibhamu ezinkulu athelekela imizi yabafowethu engu-110 eSifundeni saseVoronezh ezoyisesha, ngokombiko wezindaba osemthethweni. Lokhu kuseshwa kwemizi yoFakazi BakaJehova kukhulu kunakho konke okuye kwenziwa ngosuku olulodwa kusukela ngo-2017. Abafowethu ababili, u-Aleksandr Bokov noDmitrii Katyrov, bashaywa behliswa nesithunzi ngenxa yokwenqaba kwabo ukunikeza amaphoyisa ama-password amaselula abo.

INkantolo Yesifunda YaseLeninsky eVoronezh yiyona eyakhipha umyalo wokuba kuseshwe le mizi. Amaphoyisa asesha imizi emadolobheni nasemadolobhaneni angaba yisikhombisa kule ndawo. Idlanzana labafowethu lathathwa layiswa ehhovisi lendawo leKomiti Yophenyo ukuze liphenywe ngemibuzo.

Ngosuku olulandelayo, ngoJulayi 14, 2020, iNkantolo Yesifunda YaseLeninsky yakhipha isinqumo sokuba abafowethu abayishumi bavalelwe esitokisini kuze kube uSepthemba 3, 2020: u-Aleksei Antiukhin oneminyaka engu-44, uSergey Bayev oneminyaka engu-47, u-Iurii Galka oneminyaka engu-44, uValeriy Gurskiy oneminyaka engu-56, uVitalii Nerush oneminyaka engu-41, uStepan Pankratov oneminyaka engu-24, u-Igor Popov oneminyaka engu-54, u-Evgenii Sokolov oneminyaka engu-44, uMikhail Veselov oneminyaka engu-51 kanye no-Anatoliy Yagubov oneminyaka engu-51.

Nakuba umbiko okukhulunywe ngawo ngenhla wathi kwaseshwa imizi engu-110, kuze kube manje sithole isiqinisekiso emindenini yoFakazi engu-100 sokuthi imizi yabo nezinye izindawo zabo kwaseshwa. Leli nani lingase likhuphuke. Kunzima ukuxhumana nabo bonke abafowethu abathintekayo ngoba amafoni namakhompyutha abo kwashaqwa amaphoyisa ngesikhathi kuseshwa imizi yabo.

Imizi eminingi eyake yaseshwa ngosuku olulodwa esikhathini esidlule yayingu-50, lapho ngoFebhuwari 10, 2020, iziphathimandla zingena ngendlov’ iyangena emizini yoFakazi eNdaweni YaseTransbaikal. Kusukela ngesikhathi iNkantolo Ephakeme eyakhipha ngaso isinqumo sayo ngo-2017, sekuseshwe imizi yabafowethu engaphezu kuka-1 000.

Ngenxa yalokho okushiwo yisiprofetho seBhayibheli, alusimangazi lolu vivinyo olunjengomlilo abafowethu baseRussia nabakwamanye amazwe ababhekene nalo. Siyaqhubeka sibathandazela abafowethu, sazi ukuthi uJehova uzobanikeza umoya ongcwele abawudingayo ukuze bahlale bethembekile.—1 Petru 4:12-14, 19.