Septhemba 2, 2020, * INkantolo YeDolobha LaseBerezovsky ESifundeni SaseKemerovo

Iminyaka eyisithupha nohhafu bedonsa ejele

USergey Britvin

• Wazalwa: 1965 (eSifundeni SaseKemerovo)

• Umlando omfushane: Wasebenza amashumi eminyaka eshayela imishini emikhulu ebizwa ngama-crane, aphinde ashayele namaloli amakhulu. Washeshe wathatha umhlalaphansi ngenxa yezinkinga zempilo. Uyazithanda ezemidlalo

• Ngo-1992, washada noNatalya. Waqala ukutadisha iBhayibheli ngo-1995 ngemva kokuzwa ngesithembiso sikaNkulunkulu sokuvuswa kwabantu ekufeni. Eminyakeni eminingana kamuva, uNatalya naye wanquma ukutadisha iBhayibheli. Wahlatshwa umxhwele ukholo lukaSergey nendlela olwamsiza ngayo ukuba enze izinguquko ezinhle

UVadim Levchuk

• Wazalwa: 1972 (eSifundeni SaseKemerovo)

• Umlando omfushane: Wakhulela emndenini okwakungasontwa kuwo. Wasebenza emayini iminyaka engu-14

• Ngo-1992, waqala ukutadisha iBhayibheli. Washada noTatiana ngo-1997. Unamadodana amabili. Wonke umndeni wakhe uyalihlonipha iBhayibeli. Bathanda nemidlalo kanye nezinye izinto ezenziwa ngaphandle

NgoJulayi 22, 2018, aboPhiko Lwezokuvikela iFederal Security Service (FSB) batheleka emizini engu-8 yabafowethu edolobheni laseBerezovsky. Ngenxa yalokho, uMfoweth’ uBritvin noLevchuk baboshwa base bephenywa ngemibuzo. Ngemva kwalokho, iNkantolo Esenkabeni YeSifunda SaseKemerovo yayala ukuba bobabili bavalelwe esitokisini ngaphambi kokuthethwa kwamacala abo. Bahlala isikhathi esicishe sibe unyaka nohhafu bevalelwe. NgoDisemba 25, 2019, laba bafowethu bakhishwa esitokisini base beboshelwa emakhaya abo, futhi kusenjalo namanje.

UMfoweth’ uBritvin noLevchuk bangababili kubafowethu abahlanu eSifundeni saseKemerovo ababekwe amacala ngenxa yokholo lwabo. Sihlale sibakhumbula emithandazweni yethu bonke abafowethu nodadewethu ababoshiwe eRussia. Kunjengoba eyamaHebheru 13:3 isikhumbuza: “Hlalani nibakhumbula labo abasejele, njengokungathi niboshwe kanye nabo, nalabo abaphathwa kabi, njengoba nani ngokwenu nisemzimbeni.”