INkantolo Yedolobha LaseFurmanovsky eSifundeni Sase-Ivanovo ingase imemezele isinqumo sayo ngoJulayi 14, 2020, ecaleni likaMfoweth’ uYevgeniy Spirin. Umshushisi ucele ukuba uMfoweth’ uSpirin athole isigwebo seminyaka eyisikhombisa evalelwe ejele.

UMfoweth’ uSpirin, oneminyaka engu-34, ubekwe icala lokuhlela imisebenzi yenhlangano okuthiwa “iyingozi”. Wamangalelwa ngaleli cala ngoJanuwari 21, 2019, ngumseshi wesifunda wophiko lwezokuvikela iFederal Security Service (FSB). Ezinsukwini eziyisithupha kamuva, amalungu alolu phiko lweFSB agasela emzini kaMfoweth’ uSpirin nomkakhe, uNatalya. INkantolo YeSifunda I-Oktyabrsky yaseSifundeni Sase-Ivanovo yayala ukuba uMfoweth’ uSpirin avalelwe esitokisini okungenani izinyanga ezimbili ngaphambi kokuba avele enkantolo, ngenxa nje yokuthi unguFakazi KaJehova. Isikhathi ayesivalelwe saphinde selulwa.

Wakhululwa kuleso sitokisi ngoJulayi 5, 2019, wase eboshelwa endlini ngemva kokuchitha izinsuku ezingu-160 esejele. NgoDisemba 18, 2019, iNkantolo YeSifunda I-Oktyabrsky yaseSifundeni Sase-Ivanovo yayala ukuba uMfoweth’ uSpirin akhululwe nasemingceleni yokuboshelwa endlini ayebekelwe yona naphezu kwemizamo yabaseshi yokumelana naleso sinqumo senkantolo. Akukho mingcele aphinde wabekelwa yona.

Sithandaza sinokuqiniseka okukhulu kokuthi uBaba wethu wasezulwini onothando, uJehova, uzoqhubeka ebasekela bonke abafowethu baseRussia abashushiswayo ngenxa yokholo lwabo.—1 Petru 4:14.