JULY 27, 2015
ERUSSIA
IRussia Ivala Ingosi Engokomthetho YoFakazi BakaJehova
Ngo-December 2, 2014, iNkantolo Ephakeme YaseRussia yathi ingosi engokomthetho yoFakazi BakaJehova, i-www.pr418.com, iyeqisa. Kulo lonke elaseRussia, zonke izinkampani ezihlinzeka nge-Internet ziyayivimba le ngosi, futhi kuyicala ukukhuthaza noma ukugqugquzela ukusetshenziswa kwayo kuleli zwe. Izwe laseRussia yilona kuphela emhlabeni wonke elivale i-jw.org.
Izenzakalo Ezandulele Ukuvalwa Kwe-JW.ORG
OFakazi BakaJehova eRussia babengazi ukuthi iziphathimandla zedolobha laseTver zase ziqale ukuyithathela izinyathelo ezingokomthetho ngesinyenyela le ngosi ngo-2013. UMshushisi Wasedolobheni LaseTver wamangala eNkantolo Yesifunda SaseTsentralniy efuna kuvalwe i-jw.org ngoba inezincwadi ezimbalwa zenkolo zoFakazi BakaJehova okwathiwa ziyeqisa esinqumweni esakhishwa yinkantolo yaseRussia ngaphambilini. * Ngo-August 7, 2013, inkantolo yesifunda yenza ngokwesicelo somshushisi ngaphandle kokwazisa oFakazi BakaJehova futhi yathi i-jw.org iyeqisa.
Lapho oFakazi bezwa ngalesi sinqumo kwabezindaba bendawo ngemva kwenyanga, badlulisa icala futhi bazikhipha engosini yaseRussia izincwadi okuthiwa akufanele zifundwe. Ngo-January 22, 2014, iNkantolo Yesifunda YaseTver yasihoxisa isinqumo senkantolo ephansi, yathi le nkantolo ibingenaso isisekelo esingokomthetho sokuvala i-jw.org futhi bekufanele ibize umniniyo ukuba aziphendulele lapho kuthethwa icala.
Enganelisekile ngesinqumo senkantolo yesifunda, uS. G. Kekhlerov, iSekela Lomshushisi-jikelele, wadlulisela icala eNkantolo Ephakeme YaseRussia. OFakazi abatshelwanga ngendlela efanele ngokuthethwa kwecala. Noma kunjalo, ngo-December 2, 2014, iNkantolo yaqhubeka nokuthetha icala engekho ummangalelwa.
Le Nkantolo Ephakeme yaqinisekisa ukuthi oFakazi bazikhipha izincwadi ngemva nje kwesinqumo senkantolo sango-August 2013 kodwa yanamathela kwelokuthi lezo zincwadi zingase ziphinde zivele engosini nakuba ingavezanga zizathu. Ngenxa yalokho, le Nkantolo yahoxisa isinqumo senkantolo yesifunda yabe isiphinde ibuyisela isinqumo esithi i-jw.org iyeqisa. * OFakazi BakaJehova badlulisela leli cala eNkantolo Ephakeme bephikisana nalesi sinqumo, kodwa le Nkantolo yenqaba. Sebelidlulisele nakuSihlalo weNkantolo Ephakeme, futhi basalindile.
Isinqumo Esisongela Inkululeko Engokwenkolo
OFakazi BakaJehova bathi isinqumo seNkantolo Ephakeme asinabulungisa futhi asinasisekelo ngoba azikho izincwadi zenkolo okwathiwa ziyeqisa eziye zatholakala kuyi-jw.org eRussia kusukela ngo-September 2013. Ngenxa yaleso sinqumo, iziphathimandla zaseRussia ziyale izinkampani ezihlinzeka nge-Internet ukuba ziyivale i-jw.org eRussia. Lokhu kwenza ukuba abantu bangakwazi ukufinyelela iBhayibheli ngezilimi ezingaphezu kuka-130 nezincwadi ezisekelwe eBhayibhelini ngezilimi ezingaphezu kuka-700, ezihlanganisa ulimi lwesiRussia noLimi Lwezandla LwaseRussia. Noma ubani eRussia okhuthaza noma ogqugquzela ukusetshenziswa kwale ngosi uzocindezelwa noma aboshelwe ukwephula umthetho ngoba wenza into okuthiwa ukweqisa. Ngenxa yalokhu kuvinjelwa, oFakazi BakaJehova abangaphezu kuka-170 000 sebelahlekelwe umthombo wento ebalulekile ekukhuleni kokholo lwabo nasekukhulekeleni kwansuku zonke.
Isinqumo seNkantolo Ephakeme sinikeza ezinye izikhulu zikahulumeni elinye ithuba lokucindezela imisebenzi enokuthula yenkolo yoFakazi BakaJehova. Uma nje ezinye iziphathimandla zisaphikelela ekusebenziseni kabi uMthetho WaseRussia Ovimbela Imisebenzi Eyeqisayo, inkululeko engokwenkolo eRussia izoqhubeka ivinjelwa futhi isongelwa. OFakazi BakaJehova bethemba ngobuqotho ukuthi iziphathimandla ezinobulungisa zizowavikela amalungelo abantu ayisisekelo okukhulekela ngokukhululekile nawokuquliswa icala ngendlela enobulungisa, njengoba kuqinisekiswa izivumelwano ezenziwa iRussia namanye amazwe noMthetho-sisekelo wayo.
^ isig. 4 Ngo-June 1, 2015, zase zingu-78 izincwadi zoFakazi BakaJehova okuthiwa ziyeqisa ezinkantolo zaseRussia. OFakazi bayasiphikisa lesi sinqumo ezinkantolo zaseRussia naseNkantolo YaseYurophu Yamalungelo Abantu.
^ isig. 7 Isekela likamshushisi lafaka isicelo sokuba kucutshungulwe umthetho, uMkhandlu Wokwahlulela Wezindaba Zemibango ENkantolo Ephakeme wakhipha isahlulelo.
Okunye Ongase Ukuthande
EZISANDA KUKHISHWA
Inkantolo Okudluliselwa Kuyo Amacala ERussia Ishintsha Isinqumo Sokwenqabela Ukusetshenziswa Kwe-JW.ORG
INkantolo Yesifunda SaseTver eRussia ishintshe isinqumo senkantolo encane sokuba ingasetshenziswa i-jw.org, ingosi engokomthetho yoFakazi BakaJehova.
EZISANDA KUKHISHWA
Icala Elidluliselwe ENkantolo Yesifunda YaseRostov—Ingabe INkantolo Izobakhipha Phambili Noma Izobagweba OFakazi BakaJehova?
Ngo-December 11, 2014, iNkantolo izolalela icala elidluliselwe kuyo oFakazi abangu-16 eTaganrog, eRussia. Babekwe amacala obugebengu okuthiwa awomsebenzi oyingozi.
EZISANDA KUKHISHWA
INkantolo YaseTaganrog Ibeka OFakazi BakaJehova Icala Ngenxa Yemisebenzi Yabo Yenkolo
Lokhu kubekwa icala kuzoyibeka engozini inkululeko engokwenkolo yoFakazi BakaJehova abangu-160 000 eRussia.
EZISANDA KUKHISHWA
INkantolo YaseYurophu Yamalungelo Abantu Ivikela Ilungelo LoFakazi BakaJehova BaseRussia Lokuhlangana Ukuze Bakhulekele
I-ECHR iphinde yabeka iRussia icala lokuthi yephula amalungelo oFakazi BakaJehova, kuhlanganise nelungelo labo lokukhulekela ngaphandle kwesiphazamiso.
EZISANDA KUKHISHWA
INkantolo Ephakeme YaseRussia Ivale Inhlangano Engokomthetho YoFakazi ESamara—Yini Ezolandela?
Isinqumo seNkantolo Ephakeme sibeka engcupheni inkululeko yoFakazi BakaJehova abangaba ngu-180 000 eRussia. Iziphathimandla zingase zisebenzise lesi sinqumo ukuze zishushise oFakazi.