JUNI 8, 2017
ERUSSIA
UMongamel’UPutin Uklomelisa OFakazi BakaJehova Ngokukhulisa Kahle Izingane
ENEW YORK—NgoMeyi 31, 2017, kube nomcimbi eMoscow eKremlin lapho umongameli waseRussia uVladimir Putin enikeza uValeriy noTatiana Novik baseKarelia abangoFakazi BakaJehova umklomelo we-Order of “Parental Glory,” okuwumklomelo wokufakwa eQenjini “Labazali Abanconywayo,” ngenxa yokuthi bakhulise izingane ezingu-8.
Umcimbi owawuseKremlin ngosuku lwangaphambi kokugujwa koSuku Lwezingane Emhlabeni Wonke.
Leli Qembu “Labazali Abanconywayo” lasungulwa ngumongameli ngoMeyi 2008. Izwe laseRussia liwunika abazali abaye bakhulisa okungenani izingane ezingu-7 lo mklomelo. Kumelwe kube abazali abanakekele impilo nemfundo yezingane ngendlela ephawulekayo kuhlanganise nokukhathalela indlela ezikhula ngayo emzimbeni, ngokwengqondo nangokokuziphatha. Abazali abafakwa kuleli Qembu babhekwa njengezibonelo ezenza imindeni iqine.
UValeriy Novik, uyise wezingane ezingu-8 wamukela indondo kuMongameli uPutin emfaka eQenjini “Labazali Abanconywayo.”
UDavid A. Semonian, umkhulumeli woFakazi BakaJehova osendlunkulu yabo yomhlaba wonke, uthi: “Sibheka lo mklomelo njengendlela yokuvuma ukuthi imfundo yamahhala enikezwa oFakazi BakaJehova iyabasiza abazali nezingane zabo ukuba babe izakhamuzi eziwusizo, hhayi eRussia kuphela kodwa nasemhlabeni wonke. Sethemba ukuthi lo mklomelo owethulwe uMongameli uPutin uzokhunjulwa ngoJulayi 17, 2017, lapho iNkantolo Ephakeme ibhekisisa isinqumo sokuvala iSikhungo Sokuqondisa umsebenzi woFakazi BakaJehova eRussia.”
Abezindaba:
UDavid A. Semonian, Ihhovisi Lokwaziswa, +1-845-524-3000
Okunye Ongase Ukuthande
EZISANDA KUKHISHWA
IJalimane Liklomelisa Omunye WoFakazi BakaJehova Nge-Order of Merit
UMathilde Hartl unikezwe i-Order of Merit, umklomelo ophakeme kunayo yonke, eyinikezwa uNdunankulu waseBavaria.
IMIBUZO EVAME UKUBUZWA
Ingabe OFakazi BakaJehova Bayayibhidliza Imindeni Noma Bayayiqinisa?
Ngezinye izikhathi oFakazi BakaJehova basolwa ngokubhidliza imindeni. Kodwa ingabe ngempela oFakazi babangela izingxabano emindenini?