Izimpelasonto ezimbili zilandelana, oFakazi BakaJehova bamemezele ukukhululwa kwamaBhayibheli ayisithupha. NgoJulayi 4, 2020, kwakhululwa i-Nguqulo Yezwe Elisha YemiBhalo Engcwele ngesiBislama nesi-Oromo. Ngosuku olulandelayo, ngoJulayi 5, kwakhululwa i-Nguqulo Yezwe Elisha ngolimi lwesiLatvian nesiMarathi, kwabuye kwakhululwa i-Nguqulo Yezwe Elisha YemiBhalo YamaKristu YesiGreki ngesiBengali nesiKaren (S’gaw). La maBhayibheli akhululwa ngohlelo lwezobuchwepheshe ngezinkulumo ezaziqoshiwe. Abamemezeli bathamela lesi simiso ngezinto zobuchwepheshe futhi bajabula kakhulu ukuthola lezi zipho ezingokomoya.

Umfowethu uMark Sleger, oyilingu leKomiti Yegatsha YaseFiji, wakhulula i-Nguqulo Yezwe Elisha ebukeziwe ngesiBislama. Abamemezeli baseVanuatu baxhunywa esimisweni esasinikezwa ngolimi lwesiBislama, sihunyushelwa nasoLimini Lwezandla LwaseBislama.

Umsebenzi wokuhumusha leli Bhayibheli owawenziwa amaqembu amabili abahumushi, wathatha isikhathi esingaphezudlwana kweminyaka emithathu. Omunye umhumushi wathi: “Abafowethu bazoyithanda le Nguqulo Yezwe Elisha ebukeziwe ngoba ifundeka kalula kanti futhi namagama abhalwe ngendlela yesimanje, okuyindlela yokukhuluma yansuku zonke. Lizosisiza sonke siliqonde ngokucace kakhudlwana iqiniso.”

Siyaqiniseka ukuthi leli Bhayibheli elibukeziwe lizobasiza abamemezeli abakhuluma isiBislama abangaphezu kuka-700 lapho benza isifundo somuntu siqu nalapho besenkonzweni.

UMfoweth’ uDelroy Williamson, oyilungu leKomiti Yegatsha Yase-Ethiopia, wakhulula i-Nguqulo Yezwe Elisha ngesi-Oromo. Kwaba nengqikithi yabafowethu nodadewethu abangu-12 548 ababethamele lo mhlangano owawuqhutshwa ngezinto zobuchwepheshe, kuhlanganise nabamemezeli abangu-2 000 abakhuluma isi-Oromo.

Ngenxa yokuntuleka kwezinto zobuchwepheshe, iNdikimba Ebusayo yagunyaza ukuba isimiso esiqoshiwe sisakazwe esiteshini seTV. Abamemezeli babekwazi nokulalela lo mhlangano besebenzisa ucingo.

Abahumushi abahlanu bachitha iminyaka emihlanu behumusha. Leli Bhayibheli lizoba usizo kubafowethu nodadewethu abakhonza ensimini enkulu yolimi lwesi-Oromo.

Ngemva kweminyaka engu-12 yokusebenza kanzima, i-Nguqulo Yezwe Elisha yakhululwa ngesiLatvian. Wonke amabandla olimi lwesiLatvian nawolimi lwesiRussia aseLatvia ayemenyiwe ukuba abukele isimiso.

UMfoweth’ uJouni Palmu, oyilungu leKomiti Yegatsha YaseFinland, wanikeza inkulumo yokukhulula iBhayibheli. Wathi: “Siyajabula ukwethula le nguqulo yeBhayibheli yosuku lwanamuhla nefundeka kalula kubafundi besiLatvian. Sithemba ukuthi izokwandisa injabulo yokutadisha nokuzindla ngeZwi likaNkulunkulu.”

Lapho amalungu eqembu labahumushi ephawula ngezingxenye zokwenza ucwaningo ezifakiwe kule nguqulo, athi: “Le nguqulo yeBhayibheli entsha ifana ‘nomshini wobuchwepheshe’ ongokomoya okunika amathuba amangalisayo okuba nesifundo esijulile somuntu siqu nawokuzindla.”

I-Nguqulo Yezwe Elisha yolimi lwesiMarathi yakhululwa emhlanganweni owawuthanyelwe yiwo wonke amabandla olimi lwesiMarathi e-India. UMfoweth’ uPuneet Aggarwal, oyilungu leKomiti Yegatsha Yase-India, nguye owamemezela ukukhululwa kwaleli Bhayibheli.

Abahumushi abayisithupha basebenza iminyaka emithathu behumusha le nguqulo yesiMarathi. Elinye ilungu leqembu labahumushi lathi: “Le nguqulo izosiza ikakhulukazi abazali lapho befundisa izingane zabo nalabo abaqhuba izifundo zeBhayibheli lapho befundisa labo abafuna ngempela ukwazi iqiniso elifundiswa yiBhayibheli.”

Omunye umhumushi yena wathi: “Kwanelisa kakhulu ukwazi ukuthi leli Bhayibheli libuyisele igama likaNkulunkulu elithi Jehova, ezindaweni elalivela kuzo emibhalweni yolimi lokuqala. Abafundi bazokwazi ukuhlangana negama likaJehova cishe kuwo wonke amakhasi ale nguqulo, futhi igama likaJehova lizothola udumo olufanele.”

Bangaphezu kwezigidi ezingu-83 abantu abakhuluma isiMarathi enkabeni ye-India.

UMfoweth’ u-Ashok Patel, oyilungu leKomiti Yegatsha Yase-India, wakhulula ImiBhalo YamaKristu YesiGreki ngesiBengali. Bangaphezu kuka-1 200 abamemezeli ababethamele lesi simiso, base-India nabaseBangladesh.

Bangaphezu kwezigidi ezingu-265 abantu abakhuluma isiBengali, okuwulimi lwesikhombisa ngobukhulu ezilimini ezikhulunywa abantu abaningi emhlabeni wonke. Ukuze kukhishwe inguqulo eqondakala kalula kubantu abaningi, iqembu labahumushi abavela ezindaweni ezihlukahlukene kwelaseNdiya naseBangladesh basebenza ngokubambisana iminyaka emithathu ukuze benze lo msebenzi.

Enkulumweni yakhe, uMfoweth’ uPatel waphawula wathi: “IsiBengali siphakathi kwezilimi zokuqala zaseNdiya okwahunyushelwa kuzo iBhayibheli. Inguqulo ephelele yemiBhalo YamaKristu YesiGreki yashicilelwa ngo-1801. Into eyenza iBhayibheli lokuqala lesiBengali laba namandla ukusebenzisa kwalo igama likaNkulunkulu, elithi Jehova. Nokho, ezinguqulweni zanamuhla, igama likaNkulunkulu selikhishiwe kwathi esikhundleni salo kwafakwa isiqu esithi ‘Nkosi.’ INguqulo Yezwe Elisha YemiBhalo YamaKristu YesiGreki izogcwalisa isidingo senguqulo enembile neqondakala kalula.”

Omunye wabahumushi wathi: “Le nguqulo iwubufakazi bokuthi uJehova uNkulunkulu uthanda abantu bazo zonke izigaba zokuphila nokuthi umema bonke ukuba bafunde ngaye nangendodana yakhe, uJesu Kristu.”

UMfoweth’ uHiroshi Aoki, oyilungu leKomiti Yegatsha YaseMyanmar, wakhulula ImiBhalo YamaKristu YesiGreki ngolimi lwesiKaren (S’gaw). Kwaba nengqikithi yabangu-510, abasemabandleni ayisithupha namaqembu amane ababethemele lesi simiso.

Umsebenzi wokuhumusha isiKaren (S’gaw) wathatha isikhathi esingaphezudlwana nje konyaka. Omunye wabahumushi wathi: “Abafowethu nodadewethu kanye nabantu ensimini bazokujabulela ukufunda le nguqulo yesiKaren (S’gaw) ngoba ibuyisele igama likaJehova endaweni yalo futhi isebenzisa ulimi olujwayelekile lwanamuhla. Icacile, inembile futhi iqondakala kalula. Siyambonga uJehova ngalesi sipho esimangalisayo esizosisiza sisondele kuye ngolimi esaluncela.”

Omunye umhumushi waphawula wathi: “INguqulo Yezwe Elisha ibhalwe ngolimi olujwayelekile olusetshenziswa nsuku zonke, ngakho izobasiza abafundi ukuba bayiqonde indlela ababezizwa ngayo abantu okukhulunywa ngabo eBhayibhelini, bacabange ngezimo ababebhekene nazo, balingise nokholo lwabo.”

Sijabula kanye nabafowethu nodadewethu abathole la maBhayibheli. Siyaqiniseka ukuthi ukukhululwa kwala maBhayibheli kuzosiza abamemezeli abakhuluma lezi zilimi ukuba baqhubeke besondela kuJehova nokuba baxoxele abanye amaqiniso.—Johane 17:17.