Phakathi nalesi sikhathi segciwane elihlasele umhlaba wonke, oFakazi BakaJehova bayaqhubeka bekhulula iBhayibheli ngezilimi ebelingakakhululwa ngazo. NgoJuni 28, 2020, i-Nguqulo Yezwe Elisha YemiBhalo Engcwele yakhululwa ngezilimi ezine: isiSwati, isiTsonga, isiZulu nesiChitonga. INguqulo Yezwe Elisha YemiBhalo YamaKristu YesiGreki nayo yakhululwa ngolimi lwesiKriol saseBelize nangesiTotonac. Imingcele ye-COVID-19 ayizange iyidambise injabulo yabafowethu nodadewethu abathola la maBhayibheli ngohlelo lwezinto zobuchwepheshe. Akhululwa ezinkulumweni ezaqoshwa kusengaphambili, kwase kuthi abamemezeli babukela isimiso ngevidiyo.

UMfoweth’ uGeoffrey Jackson, oyilungu leNdikimba Ebusayo, wakhulula i-Nguqulo Yezwe Elisha YemiBhalo Engcwele ngesiSwati kanye ne-Nguqulo Yezwe Elisha YemiBhalo Engcwele ebukeziwe ngesiTsonga nangesiZulu ngohlelo lwezinto zobuchwepheshe (bheka isithombe esisekuqaleni). Abamemezeli baseNingizimu Afrika nabaseSwatini baxhunywa ngezobuchwepheshe ukuze bathamele lo mhlangano okhethekile.

Ensimini yegatsha laseNingizimu Afrika, balinganiselwa ezigidini ezingu-18,5 abantu abakhuluma isiSwati, isiTsonga nesiZulu, okubalwa kubo nabamemezeli abangaphezu kuka-38 000.

UMfoweth’ u-Augustine Semo, oyilungu leKomiti Yegatsha YaseMalawi, wamemezela ukukhululwa kwe-Nguqulo Yezwe Elisha YemiBhalo Engcwele ephelele ngolimi lwesiChitonga (saseMalawi).

Iqembu labahumushi lasebenza iminyaka engaphezu kwemibili lihumusha leli Bhayibheli lesiChitonga. Omunye umhumushi wachaza: “Ulimi lwesiChitonga luhlukene kathathu. Abantu abahlala kwenye ingxenye yezwe basebenzisa amagama angajwayekile kwabahlala kwezinye izindawo. Sakhetha ngokucophelela amagama azoqondwa yiningi labafundi. Ngaphezu kwalokho, sasebenzisa imiBhalo yaphansi ukuze sicacise amagama angase angajwayeleki kwabanye abafundi.”

Omunye umhumushi wathi: “Abamemezeli bazokuthola kulula ukusebenzisa leli Bhayibheli enkonzweni noma emihlanganweni ngoba ulimi olusetshenzisiwe lulula futhi lucacile, okwenza lifundeke kalula, liqondakale nakalula.”

UMfoweth’ uJoshua Killgore oyilungu leKomiti Yegatsha YaseCentral America wakhulula i-Nguqulo Yezwe Elisha YemiBhalo YamaKristu YesiGreki ngesiKriol saseBelize. Bangaphezu kuka-1 300 ababebukele lesi simiso.

Iqembu labahumushi abayisithupha lasebenza izinyanga ezingu-16 ukuze liphothule lo msebenzi wokuhumusha. Ekhuluma ngezinzuzo zale nguqulo entsha, omunye wabo wathi: “Ekugcineni abafowethu nodadewethu sebenayo inguqulo yeBhayibheli enembile nabangayethemba. Izofana nesibani esibakhanyiselayo sibanike ukuqonda.”

Omunye umhumushi wathi, “Phakathi nalolu bhubhane lwe-COVID-19, abafowethu nodadewethu abakhuluma isiKriol saseBelize bazokwazi ukufunda imiBhalo ngolimi lwabo. Lokhu kuzoziduduza izinhliziyo zabo lapho zikhathazekile, kubasize nokuba babhekane kangcono novivinyo oluseza.”

EBelize, kunabamemezeli abangu-867 emabandleni angu-19 olimi lwesiKriol saseBelize. Kuphinde kube nabanye abamemezeli abangu-58 abakhonza ensimini yesiKriol saseBelize ese-United States.

UMfoweth’ uJesse Pérez, oyilungu leKomiti Yegatsha YaseCentral America, wakhulula i-Nguqulo Yezwe Elisha YemiBhalo YamaKristu YesiGreki ngesiTotonac. Balinganiselwa ku-2 200 ababexhunywe kulo mhlangano emabandleni angu-50 olimi lwesiTotonac ensimini yegatsha.

Iqembu labahumushi lathatha iminyaka engaphezudlwana kwemithathu lenza lo msebenzi wokuhumusha. Le nguqulo izoba yithuluzi eliwusizo lapho kushunyayelwa izindaba ezinhle kubantu abangaphezu kuka-250 000 abakhuluma isiTotonac eMexico.

Ngokungefani namanye amaBhayibheli esiTotonac, i-Nguqulo Yezwe Elisha YemiBhalo YamaKristu YesiGreki “isebenzisa ulimi olukhulunywa nsuku zonke,” kusho omunye umhumushi. Uqhubeka athi, “Manje, sekuzoba lula ukubachazela ngezindaba ezihlukahlukene zeBhayibheli abantu emphakathini wakithi.”

Omunye umhumushi wanezela wathi, “Abafowethu nodadewethu bebelokhu befisa ukuthola iBhayibheli elinjengaleli. Kuze kwaba muva nje, abamemezeli bezihumushela bona amavesi eBhayibheli bewayisa olimi lwesiTotonac bewasusela enguqulweni yeSpanishi ukuze bafeze izabelo emihlanganweni yaphakathi nesonto. Kodwa ngeke kusadingeka bakwenze lokhu uma becaphutha emiBhalweni YesiGreki.”

Enye into ebaluleke kakhulu ekule nguqulo entsha ukuthi imibhalo yayo yaphansi inikeza amagama ahlukile esikhundleni samagama athile asuke esevesini ngokwalo. Lawa amagama anomqondo ofanayo asetshenziswa abantu abakhuluma isiTotonac kwezinye izindawo, okwenza le nguqulo ikhange bonke abantu abakhuluma lolu limi.

Sijabula kanye nabo abafowethu nodadewethu abathole la maBhayibheli ngezilimi zabo zomdabu. Siyazi ukuthi ukholo lwabo luzoqina njengoba besebenzisa ‘inkemba yabo yomoya’ enkonzweni nasesifundweni somuntu siqu.—Hebheru 4:12.