OFakazi BakaJehova balandela iseluleko seBhayibheli sokungaphenduli ngezinye izikhathi lapho kushiwo izinto ezingezinhle ngabo nalapho benziwa inhlekisa. Ngokwesibonelo, isaga seBhayibheli sithi: “Oqondisa umhleki wosulu uzithathela ihlazo.” (IzAga 9:​7, 8; 26:4) Kunokuzifaka ezimpikiswaneni ezingenasidingo nezingelona iqiniso, sigxila ekujabuliseni uNkulunkulu.​—IHubo 119:69.

 Kukhona “isikhathi sokuthula nesikhathi sokukhuluma.” (UmShumayeli 3:7) Siyabaphendula abantu abafisa ngempela ukuthola iqiniso, kodwa siyazigwema izimpikiswano ezingasizi ngalutho. Ngokwenza kanjalo silandela izimfundiso nezibonelo zikaJesu nezamaKristu okuqala.

•   UJesu akazange aphendule lapho emangalelwa ngamanga kuPilatu. (Mathewu 27:11-​14; 1 Petru 2:​21-​23) Waphinde wangaphendula nalapho kuthiwa uyisidakwa nesiminzi. Kunalokho, wavumela indlela yakhe yokuziphatha kwaba iyona enikeza ubufakazi ngokuvumelana nesimiso esithi: “Ukuhlakanipha kubonakaliswa kulungile yimisebenzi yako.” (Mathewu 11:19) Nokho, lapho izimo ziphoqa, wabaphendula ngesibindi labo ababemhlambalaza.​—Mathewu 15:​1-3; Marku 3:​22-​30.

   UJesu wafundisa abalandeli bakhe ukuba bangadumali lapho bebhecwa ngamanga. Wathi: “Niyajabula lapho abantu benihlambalaza, benishushisa futhi besho yonke inhlobo yento embi ngani, beniqambela amanga ngenxa yami.” (Mathewu 5:​11, 12) Nokho, uJesu wabuye wathi lapho izinsolo ezinjalo zivulela abalandeli bakhe ithuba lokuba bashumayele, wayezosifeza isithembiso sakhe esithi: “Ngiyoninika umlomo nokuhlakanipha, bonke abaphikisi benu behlangene abangeke bakwazi ukumelana nakho noma bakuphikise.”​—Luka 21:12-​15.

•   Umphostoli uPawulu weluleka amaKristu ukuba agweme izimpikiswano ezingasizi ngalutho nabaphikisi, echaza izimpikiswano ezinjalo ‘njengezingazuzisi futhi eziyize.’​—Thithu 3:9; Roma 16:17, 18.

•   Umpostoli uPetru wakhuthaza amaKristu ukuba avikele ukholo lwawo lapho izimo zivuma. (1 Petru 3:​15) Nokho, wayeqaphela ukuthi indlela engcono yokukwenza lokhu kwakungezenzo ezinhle kunangamazwi. Wabhala: “Ngokwenza okuhle [ningase] ninqande inkulumo yokungazi yabantu abangenangqondo.”​—1 Petru 2:​12-​15.