EMexico naseMelika Ephakathi, abahumushi abangaba ngu-290, abahlala emazweni ayisithupha, bahumusha izincwadi ezisekelwe eBhayibhelini ngezilimi ezingaphezu kuka-60. Kungani bezikhandla kangaka? Kungenxa yokuthi lapho abantu bethola izincwadi zokufunda iBhayibheli ngolimi abaluqonda kalula, ngokuvamile zibathinta izinhliziyo.—1 Korinte 14:9.

Ukuze umsebenzi wabo wokuhumusha ube sezingeni eliphakeme, abanye abahumushi ababesebenzela ehhovisi legatsha loFakazi BakaJehova edolobheni laseMexico bathuthela emahhovisi asezindaweni lapho izilimi abahumushela kuzo zikhulunywa khona. Kuye kwasiza ngani lokho? Abahumushi baxhumana njalo nabantu abaluncela ebeleni ulimi abahumushela kulo izincwadi, okwenza kube lula ngabo ukuhumusha ngendlela eqondakala kalula.

Abahumushi bazizwa kanjani ngalolu shintsho? UFederico, ohumushela olimini lwesiGuerrero Nahuatl, uthi: “Phakathi neminyaka ecishe ibe yishumi ngisebenzela edolobheni laseMexico, ngahlangana nomndeni owodwa vo okhuluma ulimi lwami. Kodwa manje, emadolobheni aseduze nehhovisi lokuhumusha, cishe wonke umuntu uyalukhuluma!”

UKarin, ohumushela olimini lwesiLow German ehhovisi lasesifundazweni saseChihuahua eMexico, uthi: “Ukuhlala lapha phakathi kwamaMennonite kuye kwangisiza ukuba ngihambisane nolimi alukhulumayo. Sihlala edolobheni elincane futhi sisebenzela khona. Kuye kuthi lapho ngilunguza ngefasitela ngibone abantu abazozuza ngomsebenzi wokuhumusha esiwenza lapha.”

UNeyfi, manje ohlala ehhovisi lokuhumusha eMérida, eMexico, uthi: “Lapho siqhuba izifundo zeBhayibheli ngesiMaya, sisheshe sizibone izinkulumo abantu abakhuluma isiMaya abangaziqondi kalula. Ngakho sifuna izindlela ezingokwemvelo zokubeka lezo zinkulumo lapho sihumusha.”

Bazuza kanjani labo abathola izincwadi ezihunyushiwe? Cabanga ngesibonelo esisodwa nje: Sekuyiminyaka engu-40 u-Elena, okhuluma isiTlapanec, eya njalo emihlanganweni yoFakazi BakaJehova. Kodwa njengoba imihlangano yayiqhutshwa ngolimi lweSpanishi, wayengaqondi ukuthi kuthiwani. Wathi: “Ngangifuna nje ukuba semihlanganweni.” Nokho, ngemva kokuba u-Elena efunde iBhayibheli ngosizo lwencwajana yesiTlapanec, uthando lwakhe ngoNkulunkulu lwakhula kangangokuba wagcina enikezele ukuphila kwakhe kuYe futhi wabhapathizwa ngo-2013. U-Elena uthi, “Ngiyambonga uJehova ngokungivumela ukuba ngiliqonde iBhayibheli.”