Umshini wokumba ulayisha inhlabathi elolini. Kuye kwambiwa kwase kususwa inhlabathi yasiwa kwenye indawo ukuze lesi siza silungele ukwakhiwa.

Labo abasebenza ngogesi babopha izintambo zama-computer esakhiweni sesikhashana. Lesi sakhiwo sizoba nehhovisi nendawo yokudlela yesikhashana phakathi nesikhathi sokwakhiwa kwehhovisi legatsha elisha eduze nalapha.

Uma ubuka le ndawo uphezulu, ubona umgwaqo omusha oyindilinga nendlela engena kuleli hhovisi legatsha. Indawo engakwesobunxele somgwaqo oyindilinga, ilungiselelwa ukuba ibe nengadi, idamu kanye nendawo izivakashi nabantu abahlala lapho abazokuma kuyo ukuze babuke lesi sakhiwo.

Ukhonkolo oqoqwe kulesi siza uyagaywa bese usetshenziselwa ukwakha imigwaqo ekulesi sakhiwo.

Kule ndawo esiyibona lapha, abantu abasebenza kulesi siza bakha imigwaqo yesikhashana nemigwaqo ezoqhubeka isetshenziswa. Zindlala indwangu emhlophe enezimbotshana lapho okuzokwakhiwa khona umgwaqo ukuze uqiniswe. Ngakwesokudla sesithombe, umshini wokugandaya ugandaya umgwaqo ngaphambi kokuba kundlalwe leyo ndwangu.

Amavolontiya anikezwa imininingwane komunye wemihlangano yesifundo engu-18 ehlelwe yiKomiti Yokwakha kulo lonke elaseBrithani nase-Ireland. KwakunoFakazi abangaphezu kuka-15000 kuleyo mihlangano, futhi abaningi bathembisa ukusiza emsebenzini wokwakha.

Abasebenza engadini bafaka umanyolo esihlahleni somyezane esisanda kutshalwa. Lesi esinye sezihlahla ezingaphezu kuka-700 ezitshalwe kule ndawo. Leli damu lenza kungagcwali amanzi yonke indawo ngemva kwemvula enamandla. Amanzi emvula angena lapho bese ephuma kancane kancane.

Kulolu suku olunenkungu, iyaqhubeka imishini ilungisa lesi siza njengoba lo msebenzi usuya emaphethelweni. Sekukonke, labo abasebenza kule ndawo bambe basusa inhlabathi namatshe okungaba ngama-cubic meter angu-160000​—la matshe nenhlabathi angagcwalisa amaloli okulayisha angaphezu kuka-10000!

Iqembu labasebenza engadini lilungisa inhlabathi ukuze litshale izihlahla zokubiya emaphethelweni engadi enezitshalo ezitholakala kuleyo ngxenye yezwe. Kule ngadi nakulo lonke igceke kutshalwe izihlahla ezihlukahlukene ezingaba ngu-11 nezitshalo ezihlukahlukene ezingaba ngu-16, konke okutholakala kuleyo ngxenye yezwe.

Ngakwesobunxele, umshini onensimbi ekwazi ukumba nokuthela ukhonkolo, umba umgodi okuzofakwa kuwo insika yefawundeshi yesakhiwo. Okokuqala, kufakwa insimbi imbe umgodi. Ngemva kwalokho, njengoba isiphuma ibe isithela ukhonkolo isebenzisa ipayipi elingaphakathi kwayo. Njengoba sibona maphakathi nalesi sithombe, umuntu osebenza kulesi sakhiwo uphetha ngokufaka izinsimbi kulo khonkolo othelwe emgodini ukuze kuqedelwe ifawundeshi. Sekufakwe izinsika ezingaphezu kuka-360 ukuze kwakhiwe ifawundeshi yezindawo zokuhlala.

Ekuseni ngosuku olunesithwathwa, osebenza ngamapayipi uxhuma amapayipi amanzi emahhovisi esakhiwo sesikhashana.

Umshini wokumba okwazi ukusebenza nasemanzini ukhipha udoti ogcwele edamini elisemaphethelweni alesi siza. Amaningi ala madamu ayesesimweni esibi, edinga ukulungiswa. Ukulungiswa kwendawo esosebeni lwamadamu kuzokwenza inhlabathi ingaguguleki, kunciphise nezikhukhula. Izinhlanzi engaphezu kuka-2500 zikhishwe ngokucophelela zayiswa kwamanye amadamu akuso lesi siza ngaphambi kokuba kulungiswe leli damu.

Yilokhu okubonayo uma ubuka le ndawo uphezulu ngasempumalanga. Lapha kusaqalwa ifawundeshi yezindawo ezimbili zokuhlala. Ngezansi ngakwesokudla, ziyabonakala izinsika zikakhonkolo. Ngezansi ngakwesobunxele, usutheliwe ukhonkolo wefawundeshi. Maphakathi, umshini uyaqhubeka umba futhi uthela ukhonkolo wezinsika zefawundeshi.

Omunye weqembu lalabo abenza umsebenzi wokuqedela, ulungisa isivalo seNdawo Yezivakashi ukuze sipendwe. Kule ndawo yezivakashi, izivakashi zizokwazi ukuma endaweni ephezulu ukuze zibone izithombe nemininingwane yomsebenzi wokwakha zibone nanokuthi usuhambe kangakanani.

Kufakwa insimbi eyindilinga eyenza umshini wokuphakamisa izinto ukwazi ukujikajika. Lo mshini onobude obungamamitha angu-40 ungakwazi ukuphakamisa into engama-metric ton angu-16.

Kusikwa izinsika zokhonkolo ukuze zibe sesilinganisweni esifanele. Lezi zinsimbi ezivela ezinsikeni zokhonkolo zizoboshwa lapho sekukhonkwa.

Abasebenza ngogesi bafaka elinye lamabhodi amabili abhalwe ukuthi JW.ORG kolunye lwezindonga ezihlotshiswe ngamatshe amnyama ezisohlangothini ngalunye endaweni yokungena kulesi sakhiwo.

Lapho ubuka uphezulu ubona umgwaqo ophithizelayo oyindilinga osuqediwe odlula esangweni elikhulu lalesi sakhiwo. Ngenhla ngakwesobunxele, kunamabhodi asanda kufakwa abhalwe ukuthi JW.ORG enza lesi sakhiwo segatsha sibonakale kahle. Lapho idamu elivimbela izikhukhula nengadi enezitshalo ezitholakala kuleyo ngxenye yezwe sekuphelile, kuzoyenza ibe yinhle le ndawo engenela kulesi sakhiwo.

Lo mshini onensimbi yokuphakamisa engamamitha angu-65, ukwazi ukufinyelela izindawo zokuhlala ezine kwezinhlanu ezizokwakhiwa lapho. Lapha sibona labo abasebenza esakhiweni bethela ukhonkolo endaweni okuzopakwa kuyo izimoto, engaphansi kwesinye sezakhiwo ezizoba indawo yokuhlala. Sezifakiwe izinsimbi zokuqinisa ukhonkolo ezizosetshenziswa ezindonga zangaphandle nangaphakathi.