Joweli 3:1-21
3 “Ngoba, bheka! ngalezo zinsuku nangaleso sikhathi,+ lapho ngibuyisa abathunjiwe bakwaJuda nabaseJerusalema,+
2 ngiyoqoqa futhi zonke izizwe+ ngizehlisele ethafeni eliphansi likaJehoshafati;+ ngiyozibeka ekwahluleleni kanye nazo lapho ngenxa yabantu bami nefa lami u-Israyeli,+ ababahlakazile phakathi kwezizwe; bahlukanisa izwe lami.+
3 Babelokhu benza inkatho ngabantu bami;+ benana isifebe ngomntwana womfana,+ bethengisa umntwana wentombazane ukuze bathole iwayini, baphuze.
4 “Futhi, nihlangene ngani nami, Thire neSidoni+ nani nonke nina zifunda zaseFilistiya?+ Ingabe ningivuza ngale mpatho? Uma ningiphatha ngale ndlela, ngizoyibuyisela ngesivinini, ngokushesha, impatho yenu emakhanda enu.+
5 Ngoba nina nithathé isiliva lami negolide lami,+ niyisé izinto zami ezinhle ezifiselekayo emathempelini enu;+
6 nithengisé ngamadodana akwaJuda namadodana aseJerusalema+ emadodaneni amaGreki,+ ngenjongo yokuwadedisela kude nendawo yawo;+
7 bhekani ngiyawavusa ukuba asuke endaweni eniwathengiselé kuyo,+ impatho yenu ngizoyibuyisela emakhanda enu.+
8 Ngizothengisela esandleni samadodana kaJuda amadodana enu namadodakazi enu,+ futhi kumelwe bawathengisele esandleni samadoda aseSheba,+ esizweni esikude kakhulu;+ ngoba uJehova ukukhulumile.
9 “Memezelani lokhu, phakathi kwezizwe,+ ‘Ngcwelisani impi! Vusani amadoda anamandla!+ Mawasondele! Mawakhuphuke, wonke amadoda empi!+
10 Khandani amageja enu abe yizinkemba nocelemba benu+ babe yizijula. Obuthakathaka makathi: “Ngiyindoda enamandla.”+
11 Lekelelani, nize, nonke nina zizwe ezizungezile,+ niqoqane ndawonye.’”+
O Jehova, yehlisela abanamandla bakho kuleyo ndawo.+
12 “Makuvuswe izizwe zize ethafeni eliphansi likaJehoshafati;+ ngoba ngiyohlala lapho ukuze ngahlulele zonke izizwe ezizungezile.+
13 “Fakani isikela,+ ngoba isivuno sesivuthiwe.+ Wozani, yehlani, ngoba isikhamo sewayini sesigcwele.+ Imigodi yesikhamo empeleni iyachichima; ngoba ububi bazo bube buningi kakhulu.+
14 Izixuku, izixuku zisethafeni eliphansi lesinqumo,+ ngoba usuku lukaJehova luseduze ethafeni eliphansi lesinqumo.+
15 Ilanga nenyanga ngokuqinisekile kuyoba mnyama, futhi izinkanyezi empeleni ziyokuhoxisa ukukhanya kwazo.+
16 UJehova uyobhonga eseZiyoni, azwakalise izwi lakhe eseJerusalema.+ Ngokuqinisekile izulu nomhlaba kuyozamazama;+ kodwa uJehova uyoba yisiphephelo sabantu bakhe+ nenqaba yabantwana bakwa-Israyeli.+
17 Nina niyokwazi ukuthi nginguJehova uNkulunkulu wenu,+ ohlala eZiyoni intaba yami engcwele.+ IJerusalema liyoba yindawo engcwele;+ ngokuqondene nezihambi, ngeke zisadabula kulo.+
18 “Kuyothi ngalolo suku izintaba ziconse iwayini elimnandi,+ namagquma uqobo lwawo ageleze ubisi, neziqu zemifudlana yakwaJuda zonke zigeleze amanzi. Endlini kaJehova kuyoqhuma isiphethu,+ futhi kumelwe sinisele isigodi sesifufula seMithi Yomtholo.+
19 IGibhithe lona liyoba yihlane eliyincithakalo;+ i-Edomi, libe yihlane eliyincithakalo,+ ngenxa yobudlova obenziwe kubantwana bakwaJuda, okuchithwa igazi elingenacala ezweni labo.+
20 Kodwa elakwaJuda lona, liyohlalwa kuze kube nini nanini,+ neJerusalema izizukulwane ngezizukulwane.+
21 Igazi labo ebengingalibheki njengelingenacala ngiyolibheka njengelinecala;+ uJehova uyobe ehlala eZiyoni.”+
