Numeri 11:1-35
11 Manje abantu baba njengabantu abanokuthile okubi kokukhononda ngakho ezindlebeni zikaJehova.+ Lapho uJehova ekuzwa, intukuthelo yakhe yavutha, futhi umlilo kaJehova wabavuthela, waqothula abanye emkhawulweni wekamu.+
2 Lapho abantu bekhala kuMose, wabe esenxusa uJehova,+ futhi umlilo wabohla.
3 Igama laleyo ndawo kwathiwa iThabehera,+ ngoba umlilo kaJehova wawubavuthele.
4 Isixuku esiyingxubevange+ esasiphakathi kwabo sezwakalisa ukulangazela kobugovu,+ abantwana bakwa-Israyeli nabo baqala ukukhala futhi bathi: “Ubani ozosinika inyama ukuba sidle?+
5 Yeka ukuthi sizikhumbula kanjani izinhlanzi esasizidla eGibhithe mahhala,+ amakhukhamba namakhabe namalikhi no-anyanisi nesweli!
6 Kodwa manje umphefumulo wethu womile. Amehlo ethu awaboni lutho ngaphandle kwaleli mana.”+
7 Imana+ lalinjengembewu yekhoriyenda,+ ukubukeka kwalo kwakunjengokubukeka kwenhlaka yebhedola.+
8 Abantu babesakazeka balibuthe+ baligaye ematsheni okugaya noma baligqule esigqulweni, futhi babelibilisa ezimbizeni+ zokupheka noma benze ngalo amaqebelengwane ayizindilinga, ukunambitheka kwalo kwakunjengokunambitheka kweqebelengwane elinandisiwe elinamafutha.+
9 Futhi lapho amazolo ehlela phezu kwekamu ebusuku, imana lalehlela phezu kwawo.+
10 UMose wezwa abantu bekhala emikhayeni yabo, umuntu ngamunye emnyango wetende lakhe. Intukuthelo kaJehova yaqala ukuvutha kakhulu,+ futhi kwakukubi emehlweni kaMose.+
11 Khona-ke uMose wathi kuJehova: “Kungani uye wabangela ububi encekwini yakho, futhi kungani ngingazange ngithole umusa emehlweni akho, ngokuba ubeke umthwalo waso sonke lesi sizwe phezu kwami?+
12 Ingabe yimi owakhulelwa sonke lesi sizwe? Yimi yini osizele, ukuba uthi kimi, ‘Sithwale ngesifuba sakho,+ njengoba nje umzanyana wesilisa ethwala osancela,’+ usiyise enhlabathini owafunga ngayo kokhokho baso?+
13 Ngingayithathaphi inyama yokunika sonke lesi sizwe? Ngoba silokhu sikhala kimi, sithi, ‘Sinike inyama, sidle!’
14 Angikwazi ukuthwala sonke lesi sizwe ngokwami, ngoba siyesinda kakhulu kimi.+
15 Ngakho, uma le kuyindlela owenza ngayo kimi, siza ungibulale ngokuphelele,+ uma kuwukuthi ngithole umusa emehlweni akho, ngingayiboni inhlekelele yami.”
16 UJehova yena wathi kuMose: “Ngibuthele amadoda angamashumi ayisikhombisa emadodeni amadala akwa-Israyeli,+ owaziyo ukuthi angamadoda amadala abantu nezikhulu zabo,+ uwayise etendeni lokuhlangana, ame lapho kanye nawe.
17 Kuzomelwe ngehle+ futhi ngikhulume nawe lapho;+ kuzomelwe ngithathe omunye umoya+ kophezu kwakho ngiwubeke phezu kwawo, akusize ekuthwaleni umthwalo wabantu ukuze ungawuthwali uwedwa nje kuphela.+
18 Futhi kufanele uthi kubantu, ‘Zingcweliseleni usuku lwakusasa,+ njengoba ngokuqinisekile nizodla inyama, ngoba niye nakhala ezindlebeni zikaJehova,+ nithi: “Ubani ozosinika inyama ukuba sidle, ngoba kwakukuhle ngathi eGibhithe?”+ UJehova ngokuqinisekile uzoninika inyama, nizoyidla ngempela.+
19 Nizoyidla, hhayi usuku olulodwa noma izinsuku ezimbili noma izinsuku ezinhlanu noma izinsuku eziyishumi noma izinsuku ezingamashumi amabili,
20 kodwa izinsuku eziyinyanga, ize iphume ngamakhala enu futhi ibe yinto enyanyekayo kini,+ ngenxa nje yokuthi niye namala uJehova, ophakathi kwenu, futhi niye nakhala phambi kwakhe nathi: “Siphumeleni eGibhithe?”’”+
21 Khona-ke uMose wathi: “Abantu engiphakathi kwabo bangamadoda ayizinkulungwane ezingamakhulu ayisithupha+ ahamba ngezinyawo, nokho wena—wena uthé, ‘Ngizobanika inyama, futhi ngokuqinisekile bazoyidla izinsuku eziyinyanga’!
22 Ingabe bazohlatshelwa imihlambi yezimvu neyezinkomo, ukuze ibanele?+ Noma bazobanjelwa zonke izinhlanzi zolwandle, ukuze zibanele?”
23 Kulokho uJehova wathi kuMose: “Ingabe isandla sikaJehova sifinyeziwe?+ Manje uzobona ukuthi engikushilo kuzokwehlela yini noma cha.”+
24 Ngemva kwalokho uMose waphuma wakhuluma nabantu amazwi kaJehova. Wabe esebutha amadoda angamashumi ayisikhombisa emadodeni amadala abantu wawamisa azungeza itende.+
25 Khona-ke uJehova wehla ngefu+ wakhuluma naye+ futhi wathatha omunye umoya+ kowawuphezu kwakhe wawubeka phezu kwaleyo naleyo ndoda endala kwangamashumi ayisikhombisa. Futhi kwathi ngokushesha nje lapho umoya uhlala phezu kwawo, enza njengabaprofethi; kodwa awaphindanga futhi.+
26 Manje kwakukhona amabili emadodeni ayesele ekamu. Igama lenye kwakungu-Elidadi, negama lenye kunguMedadi. Futhi umoya waqala ukuhlala phezu kwawo, njengoba ayephakathi kwalawo ayelotshwe phansi, kodwa engaphumanga ukuya etendeni. Ngakho enza njengabaprofethi ekamu.
27 Insizwa ethile yagijima yabikela uMose yathi: “O-Elidadi noMedadi benza njengabaprofethi ekamu!”
28 Khona-ke uJoshuwa indodana kaNuni, isikhonzi+ sikaMose kusukela ebunsizweni bakhe kuqhubeke, wasabela wathi: “Nkosi yami Mose, bavimbele!”+
29 Nokho, uMose wathi kuye: “Ingabe unesikhwele ngami? Cha, ngifisa sengathi bonke abantu bakaJehova bebengabaprofethi, ngoba uJehova ubeyobeka umoya wakhe phezu kwabo!”+
30 Kamuva uMose waya ekamu, yena namadoda amadala akwa-Israyeli.
31 Kwavuka umoya+ uvela kuJehova futhi waqhuba izigwaca zivela olwandle+ wazehlisela phezu kwekamu cishe uhambo losuku ngapha nohambo losuku ngapha, nxazonke zekamu, cishe izingalo ezimbili ngaphezu kobuso bomhlaba.
32 Khona-ke abantu basukuma lonke lolo suku nabo bonke ubusuku nalo lonke usuku olulandelayo futhi baqhubeka bebutha izigwaca. Owayeqoqe okuncane kunabo bonke wayebuthe amahomere+ ayishumi, futhi baqhubeka bezinekela zona endaweni ebanzi nxazonke zekamu.
33 Inyama yayisesemazinyweni abo,+ ingakahlafunwa lapho intukuthelo kaJehova ibavuthela+ abantu, futhi uJehova waqala ukubabulala abantu ngokuceka okukhulu kakhulu.+
34 Igama laleyo ndawo labizwa ngokuthi iKibiroti-hathawa,+ ngoba yilapho bangcwaba khona abantu ababonisa ukunxanela kobugovu.+
35 Ukusuka eKibiroti-hathawa abantu baya eHazeroti,+ futhi baqhubeka behleli eHazeroti isikhathi esithile.
