Duteronomi 27:1-26
27 UMose ekanye namadoda amadala akwa-Israyeli wayala abantu, wathi: “Gcinani yonke imiyalo engininika yona namuhla.
2 Ngosuku eniyowela ngalo iJordani ningene ezweni uJehova uNkulunkulu wenu aninika lona, kufanele nimise amatshe amakhulu niwacake. *+
3 Ngemva kwalokho nibhale kuwo wonke amazwi alo Mthetho lapho seniwelile, ukuze ningene ezweni uJehova uNkulunkulu wenu aninika lona, izwe eligeleza ubisi noju, njengoba nje uJehova, uNkulunkulu wokhokho benu, enithembisile. +
4 Lapho seniliwelile iJordani, kufanele nimise la matshe eNtabeni i-Ebhali, + niwacake,* njengoba nje nginiyala namuhla.
5 Kufanele nakhele uJehova uNkulunkulu wenu i-altare lapho, i-altare lamatshe. Akufanele nisebenzise amathuluzi ensimbi kulawo matshe. +
6 Kufanele nakhe i-altare likaJehova uNkulunkulu wenu ngamatshe aphelele, ninikele kulo iminikelo eshiswayo eya kuJehova uNkulunkulu wenu.
7 Kufanele ninikele imihlatshelo ehlanganyelwayo + niyidlele khona, + nijabule phambi kukaJehova uNkulunkulu wenu. +
8 Wonke amazwi alo Mthetho kumelwe niwabhale ngokucacile kula matshe.” +
9 UMose nabapristi abangamaLevi babe sebekhuluma nawo wonke u-Israyeli, bathi: “O Israyeli, thula ulalele. Namuhla ube yisizwe sikaJehova uNkulunkulu wakho. +
10 Kumelwe ulalele izwi likaJehova uNkulunkulu wakho, ufeze nemiyalo yakhe + neziqondiso zakhe engikuyala ngazo namhlanje.”
11 Ngalolo suku uMose wayala abantu, wathi:
12 “Izizwe ezilandelayo ziyokuma eNtabeni iGerizimu + zibusise abantu lapho seniwele iJordani: USimeyoni, uLevi, uJuda, u-Isakare, uJosefa noBhenjamini.
13 Lezi ezilandelayo ziyokuma eNtabeni i-Ebhali + zikhiphe isiqalekiso: URubeni, uGadi, u-Asheri, uZebhuloni, uDani noNafetali.
14 AmaLevi ayophendula wonke umuntu wakwa-Israyeli ngezwi elikhulu, athi: +
15 “‘Uqalekisiwe umuntu owenza umfanekiso obaziwe + noma isithombe sensimbi, *+ okuyinto enengekayo kuJehova, + ewumsebenzi wengcweti,* wabe esekufihla.’ (Bonke abantu bayophendula bathi, ‘Amen!’*)
16 “‘Uqalekisiwe umuntu odelela uyise noma unina.’ + (Bonke abantu bayothi, ‘Amen!’)
17 “‘Uqalekisiwe ogudluza uphawu lomngcele womuntu wakubo.’ + (Bonke abantu bayothi, ‘Amen!’)
18 “‘Uqalekisiwe odukisa impumputhe endleleni.’ + (Bonke abantu bayothi, ‘Amen!’)
19 “‘Uqalekisiwe owahlulela isifiki, intandane* noma umfelokazi + ngendlela engenabulungisa.’ + (Bonke abantu bayothi, ‘Amen!’)
20 “‘Uqalekisiwe olala nomkayise ngoba uthele uyise ngehlazo.’ *+ (Bonke abantu bayothi, ‘Amen!’)
21 “‘Uqalekisiwe olala nanoma isiphi isilwane.’ + (Bonke abantu bayothi, ‘Amen!’)
22 “‘Uqalekisiwe olala nodadewabo, indodakazi kayise noma indodakazi kanina.’ + (Bonke abantu bayothi, ‘Amen!’)
23 “‘Uqalekisiwe olala nomkhwekazi wakhe.’ + (Bonke abantu bayothi, ‘Amen!’)
24 “‘Uqalekisiwe obulala umakhelwane wakhe esendaweni ecashile.’ + (Bonke abantu bayothi, ‘Amen!’)
25 “‘Uqalekisiwe owamukela isifumbathiso ukuze abulale* umuntu ongenacala.’ *+ (Bonke abantu bayothi, ‘Amen!’)
26 “‘Uqalekisiwe ongeke awagcine amazwi alo Mthetho.’ + (Bonke abantu bayothi, ‘Amen!’)
Imibhalo yaphansi
^ Noma, “niwacake ngomcako.”
^ Noma, “niwacake ngomcako.”
^ Noma, “Makube njalo!”
^ Noma, “wesisebenzi esisebenza ngokhuni noma ngensimbi.”
^ Noma, “esenziwe ngokuncibilikisiwe.”
^ Noma, “ingane engenababa.”
^ NgesiHebheru, “wembule ingubo kayise.”
^ Noma, “ashaye.”
^ Noma, “umphefumulo wegazi elingenacala.”
