KwabaseKolose 3:1-25
3 Nokho, uma nenziwa naphila ngoKristu, + qhubekani nifuna izinto zaphezulu, lapho uKristu ehlezi khona ngakwesokudla sikaNkulunkulu. +
2 Gcinani izingqondo zenu zigxile ezintweni zaphezulu, + hhayi ezintweni ezisemhlabeni. +
3 Ngoba nafa, futhi ukuphila kwenu kusezandleni zikaKristu emunye noNkulunkulu.
4 Lapho uKristu, owukuphila kwethu, + ebonisa amandla akhe, khona-ke nani niyowabonisa kanye naye enkazimulweni. +
5 Ngakho-ke, bulalani amalunga emizimba yenu + asemhlabeni ngokuqondene nokuziphatha kabi ngokocansi,* ukungcola, inkanuko yokuya ocansini engalawuleki, + isifiso esilimazayo, nokuhaha, okuwukukhonza izithixo.
6 Ulaka lukaNkulunkulu luyeza ngenxa yalezo zinto.
7 Nani naniziphatha* kanjalo ekuphileni kwenu kwangaphambili. *+
8 Kodwa manje kumelwe nilahle kude nani: ulaka, intukuthelo, ububi, + inkulumo elimazayo, + nenkulumo eyichilo + ephuma emlonyeni wenu.
9 Ningaqambi amanga omunye komunye. + Hlubulani ubuntu obudala + nemikhuba yabo,*
10 nigqoke ubuntu obusha, + obenziwa bube busha ngolwazi olunembile ukuze bubonakalise ubuntu baLowo owabudala. +
11 Ubuntu obusha abuhlukanisi phakathi komGreki nomJuda, ukusoka noma ukungasoki, owezizwe, umSkithe,* isigqila, noma okhululekile; kodwa uKristu uyikho konke, ukubo bonke. +
12 Ngakho, njengabakhethiwe bakaNkulunkulu, + abangcwele nabathandwayo, gqokani uzwela nothando, + umusa, ukuthobeka, *+ ubumnene + nokubekezela. +
13 Qhubekani nibekezelelana futhi nithethelelana ngokukhululekile, + ngisho noma umuntu enesizathu sokukhononda ngomunye. + Njengoba nje uJehova* anithethelela ngokukhululekile, nani kumelwe nenze kanjalo. +
14 Kodwa ngaphezu kwazo zonke lezi zinto, gqokani uthando, + ngoba lwenza abantu babe nobunye ngokuphelele. +
15 Ngaphezu kwalokho, ukuthula kukaKristu makubuse* ezinhliziyweni zenu, + ngoba nabizelwa kulokho kuthula nimzimba munye. Yibani ngababongayo.
16 Izwi likaKristu malihlale ngokugcwele kini ngakho konke ukuhlakanipha. Qhubekani nifundisana futhi nikhuthazana* ngamahubo, + ngezindumiso zikaNkulunkulu, ngezingoma zokudumisa eziculwa ngokubonga,* nihubela uJehova* ezinhliziyweni zenu. +
17 Noma ngabe yini eniyenza ngezwi noma ngesenzo, konke kwenzeni ngegama leNkosi uJesu, nibonga uNkulunkulu uYise ngaye. +
18 Nina bafazi, zithobeni kubayeni benu, + ngoba kuyafaneleka eNkosini.
19 Nina madoda, qhubekani nithanda omkenu + futhi ningabathukutheleli kakhulu. *+
20 Nina bantwana, lalelani abazali benu kukho konke, + ngoba lokhu kuyajabulisa kakhulu eNkosini.
21 Nina bobaba, ningabathukuthelisi* abantwana benu, + ukuze bangadangali.*
22 Nina zigqila, balaleleni kukho konke labo abangamakhosi enu angabantu, *+ kungabi ngokuthenga amehlo, ukuze nje nijabulise abantu, kodwa ngobuqotho benhliziyo, ngokwesaba uJehova.*
23 Noma yini eniyenzayo, yenzeni ngomphefumulo* wonke njengokungathi nenzela uJehova, *+ hhayi abantu,
24 ngoba niyazi ukuthi niyothola ifa eliwumvuzo kuJehova. *+ Yibani izinceku zeNkosi, uKristu.
25 Lowo owenza okungalungile uyojeziswa nakanjani ngenxa yokungalungile akwenzile, + futhi akukho ukukhetha. +
Imibhalo yaphansi
^ NgesiGreki, i-por·neiʹa. Bheka uHlu Lwezincazelo Zamagama.
^ Noma, “nanihamba.”
^ Noma, “ngesikhathi nisaphila ngaleyo ndlela.”
^ NgesiGreki, “umuntu omdala nemikhuba yakhe.”
^ Elithi “umSkithe” lalisho umuntu ongaphucuzekile.
^ Noma, “ukuzehlisa.”
^ Bheka iSithasiselo A5.
^ Noma, “makulawule.”
^ Noma, “niyalana.”
^ Noma, “ngokwazisa.”
^ Bheka iSithasiselo A5.
^ Noma, “ningabakhahli.”
^ Noma, “ningabachukuluzi; ningabacasuli.”
^ Noma, “bangadikibali.”
^ NgesiGreki, “angokwenyama.”
^ Bheka iSithasiselo A5.
^ Bheka uHlu Lwezincazelo Zamagama, “Umphefumulo.”
^ Bheka iSithasiselo A5.
^ Bheka iSithasiselo A5.
