Levitikusi 8:1-36
-
Ukumiswa kwabapristi bozalo luka-Aroni (1-36)
8 UJehova waqhubeka ekhuluma noMose, ethi:
2 “Thatha u-Aroni kanye namadodana akhe, + izingubo, + amafutha okugcoba, + inkunzi yomnikelo wesono, izinqama ezimbili nobhasikidi wesinkwa esingenamvubelo, +
3 uqoqele ndawonye yonke inhlangano emnyango wetende lokuhlangana.”
4 UMose wenza njengoba nje uJehova ayemyalile, inhlangano yaqoqana ndawonye emnyango wetende lokuhlangana.
5 UMose wathi enhlanganweni: “Yilokhu uJehova asiyale ukuba sikwenze.”
6 UMose wasondeza u-Aroni namadodana akhe wabageza ngamanzi. +
7 Ngemva kwalokho wamgqokisa ingubo, + wambhincisa ibhande lendwangu, *+ wamgqokisa ijazi elingenamikhono, + wamfaka i-efodi + wambhincisa nebhande elilukiwe + le-efodi walibopha laqina.
8 Wabe esemfaka isiqephu sesifuba + wafaka esiqeshini sesifuba i-Urimi neThumimi. +
9 Wamthwesa iduku lokushuqula, + wabeka ngaphambi kweduku lokushuqula ucwecwe olucwebezelayo lwegolide, uphawu olungcwele lokuzinikezela, *+ njengoba nje uJehova ayemyalile uMose.
10 UMose wabe esethatha amafutha okugcoba wagcoba itabernakele nakho konke okwakukulo, + wakungcwelisa.
11 Ngemva kwalokho wafafaza amanye awo e-altare kasikhombisa, wagcoba i-altare nazo zonke izinto zalo nendishi nento ehlala kuyo ukuze akungcwelise.
12 Ekugcineni wathela amanye amafutha okugcoba ekhanda lika-Aroni, wamgcoba ukuze amngcwelise. +
13 UMose wayesesondeza amadodana ka-Aroni wawagqokisa izingubo, wawabhincisa amabhande endwangu, wawashuqulisa, + njengoba nje uJehova ayemyalile uMose.
14 Wabe eseletha inkunzi yomnikelo wesono, u-Aroni namadodana akhe babeka izandla zabo enhloko yenkunzi yomnikelo wesono. +
15 UMose wayihlaba, wathatha igazi + ngomunwe walibheca ezimpondweni nxazonke ze-altare, wahlanza i-altare esonweni, kodwa lonke elinye igazi walithululela phansi e-altare ukuze alingcwelisele ukwenza isihlawulelo kulo.
16 Ngemva kwalokho, wathatha wonke amanoni asemathunjini, amafutha asesibindini, nezinso zombili namanoni azo, uMose wakushunqisa e-altare. +
17 Wayala ukuba ingxenye esele yenkunzi, isikhumba sayo, inyama yayo nomswani wayo kushiswe ngomlilo ngaphandle kwekamu, + njengoba nje uJehova ayemyalile uMose.
18 Wabe esesondeza inqama yomnikelo oshiswayo, u-Aroni namadodana akhe babeka izandla zabo enhloko yenqama. +
19 Ngemva kwalokho uMose wayihlaba, wafafaza igazi nxazonke ze-altare.
20 Wayihlahlela inqama ngokwezingxenye zayo, uMose washunqisa inhloko nalezi zingxenye nomhlwehlwe.*
21 Amathumbu namanqina wawageza ngamanzi, wayeseyishunqisa yonke le nqama e-altare. Yayingumnikelo oshiswayo oyiphunga elimnandi.* Yayingumnikelo oshiswa emlilweni oya kuJehova, njengoba nje uJehova ayemyalile uMose.
22 Wabe eseletha inqama yesibili, inqama yokumiswa kompristi, + u-Aroni namadodana akhe babeka izandla zabo enhloko yale nqama. +
23 UMose wayihlaba, wathatha elinye igazi layo waligcoba endlebeni ka-Aroni yesokudla nasesithupheni sesandla sakhe sokudla nakubhozo wonyawo lwakhe lwesokudla.
24 Ngemva kwalokho uMose waletha amadodana ka-Aroni wagcoba elinye igazi ezindlebeni zawo zesokudla nasezithupheni zezandla zawo zesokudla nakobhozo bezinyawo zawo zesokudla; kodwa uMose wafafaza lonke elinye igazi nxazonke ze-altare. +
25 Wathatha amanoni, umsila ononile, wonke amanoni asemathunjini, amafutha asesibindini, izinso zombili namafutha azo nomlenze wesokudla. +
26 Wathatha kubhasikidi wesinkwa esingenamvubelo owawuphambi kukaJehova ulofu owodwa wesinkwa omise okwesongo, + ulofu owodwa wesinkwa omise okwesongo oxutshwe namafutha, + nocezwana olulodwa lwesinkwa. Wayesekubeka phezu kwamaqatha anonile nomlenze wesokudla.
27 Ngemva kwalokho wakubeka konke ezandleni zika-Aroni nasezandleni zamadodana akhe, waqala ukukuzulisa njengomnikelo ozuliswayo phambi kukaJehova.
28 UMose wabe esekuthatha ezandleni zabo wakushunqisa e-altare phezu komnikelo oshiswayo. Kwakuwumhlatshelo wokumiswa kompristi oyiphunga elimnandi.* Kwakuwumnikelo oya kuJehova oshiswa emlilweni.
29 UMose wathatha isifuba wasizulisa njengomnikelo ozuliswayo phambi kukaJehova. + Kwaba esikaMose esivela emnikelweni wokumiswa kompristi, njengoba nje uJehova ayemyalile uMose. +
30 UMose wathatha amanye amafutha okugcoba + nelinye igazi elalise-altare walifafaza ku-Aroni nasezingutsheni zakhe nasemadodaneni akhe + nasezingutsheni zamadodana akhe. Ngakho wamngcwelisa u-Aroni nezingubo zakhe namadodana akhe nezingubo zawo. +
31 UMose wabe esethi ku-Aroni namadodana akhe: “Bilisani + inyama emnyango wetende lokuhlangana, nizoyidlela lapho nesinkwa esikubhasikidi wokumiswa kompristi, njengoba nje ngayalwa, kwathiwa, ‘U-Aroni namadodana akhe bayokudla.’ +
32 Inyama esele nesinkwa nizokushisa ngomlilo. +
33 Akumelwe niphume emnyango wetende lokuhlangana izinsuku eziyisikhombisa, kuze kuphele izinsuku zokumiswa kwenu njengabapristi, ngoba ukumiswa kwenu njengabapristi kuzothatha izinsuku eziyisikhombisa. +
34 UJehova wayala ukuba senze lokhu esikwenzile namhlanje ukuze nenzelwe isihlawulelo. +
35 Nizohlala emnyango wetende lokuhlangana ubusuku nemini izinsuku eziyisikhombisa, + nifeze isibopho senu kuJehova, + ukuze ningafi; ngoba ngiyalwe kanjalo.”
36 U-Aroni namadodana akhe bazenza zonke izinto uJehova ayeziyale ngoMose.
Imibhalo yaphansi
^ Noma, “ibhande lasokhalweni.”
^ Noma, “umqhele ongcwele.”
^ Noma, “namafutha azungeze izinso.”
^ Noma, “elanelisayo; elizolisayo.” NgesiHebheru, “elizolile.”
^ Noma, “elanelisayo; elizolisayo.” NgesiHebheru, “elizolile.”
