Uyayibona yini imisebenzi yoMdali lapho ubuka imbali emibalabala, isibhakabhaka esinezinkanyezi eziningi noma impophoma ehazayo? Indalo esiyibonayo ibembula kahle ubuntu bukaJehova nakuba singamboni. (Ro 1:20) Uma sima kancane sicabange ngalokhu esikubonayo, siyakwazi ukubona amandla kaJehova, uthando, ukuhlakanipha, ubulungisa kanye nokuphana kwakhe.—IHu 104:24.

Yimiphi eminye yemisebenzi kaJehova emihle oyibonayo usuku ngalunye? Ngisho nalapho uhlala edolobheni, ungase uzibone izinyoni nezihlahla. Ukubukisisa indalo kaJehova kungasisiza sinciphise ukukhathazeka, kusisize singagxili ezinkingeni esinazo futhi kusenze simethembe nakakhulu uJehova ukuthi uzokwazi ukusinakekela kuze kube phakade. (Math 6:25-32) Uma unezingane, zisize zibubone ubuntu bukaJehova obungenakuqhathaniswa. Lapho siya ngokuya siyithanda indalo esiyibonayo, sizosondela nakakhulu kuMdali.—IHu 8:3, 4.

BUKELA IVIDIYO ETHI UBUHLE BENDALO BEMBULA INKAZIMULO KANKULUNKULU—UKUKHANYA NOMBALA, BESE UPHENDULA LE MIBUZO ELANDELAYO:

• Amakhemikhali abizwa ngokuthi ama-pigment asisiza kanjani ukuba sibone imibala?

• Yini eyenza into ibonakale imibalabala futhi icwebezela?

• Kungani sibona imibala ehlukahlukene esibhakabhakeni?

• Imiphi imibala ekhangayo yendalo oyibone ngalapho ohlala khona?

• Kungani kufanele siziphe isikhathi sokubukisisa indalo?