Ake ucabange ngalokhu: UMthunzi ushayela endaweni angayazi. Izimpawu zomgwaqo nezinto azibona endleleni zibonisa ukuthi akekho lapho okufanele ngabe ukhona manje. Uyabona ukuthi ulahlekile. Kumelwe ukuba ujike endaweni obekungafanele ajike kuyo.

Ukube ubunguMthunzi, ubuzokwenzenjani?

Kuningana ongakhetha ukukwenza:

1. Ungabuza indlela.

2. Ungabheka ibalazwe noma usebenzise i-GPS.

3. Ungaqhubeka uhamba ngemoto, unethemba lokuthi ngandlela-thile uzoyithola indlela.

Kusobala ukuthi lokhu kwesithathu ngeke kuphumelele.

Okwesibili kungcono kunokokuqala. Phela lizobe likhona ibalazwe noma i-GPS njengoba usendleleni, likusiza ukuba uhambe ngendlela okuyiyona yona.

IBhayibheli lingakusiza ngendlela efanayo!

Le ncwadi edayiswa ngaphezu kwezinye

• ingakubonisa indlela yokubhekana nezinkinga zokuphila

• ingakusiza ukuba uzazi wena futhi ube umuntu ongcono

• ingakubonisa indlela yokuthola ukuphila okungcono

Kusukela siqala ukukhuluma, sibuza imibuzo.

• Kungani isibhakabhaka siluhlaza?

• Zenziwe ngani izinkanyezi?

Ngokuhamba kwesikhathi sibuza imibuzo ephathelene nesikubona emhlabeni.

• Kungani kwenzeka izinto ezimbi?

• Kungani abantu befa?

Ungathini uma ungathola ukuthi izimpendulo zale mibuzo bezilokhu zikhona eBhayibhelini?

Abantu abaningi bathi iBhayibheli ligcwele izinganekwane, bathi liyisidala noma kunzima ukuliqonda. Kodwa ingabe yiBhayibheli ngempela eliyinkinga, noma yilokho abantu abakuzwile ngalo? Kungenzeka yini ukuthi batshelwe amanga ngalo?

Ngokwesibonelo, abantu bacabanga ukuthi iBhayibheli lithi uNkulunkulu uyena olawula umhlaba. Kodwa kungenzeka kanjani lokho? Lo mhlaba awusalawuleki! Ugcwele ubuhlungu nokuhlupheka, ukugula nokufa, indlala nezinhlekelele. Kungenzeka kanjani kube uNkulunkulu onothando owenza zonke lezi zinto?

Ungathanda yini ukwazi impendulo? Lokho iBhayibheli elikushoyo ngokuthi ubani olawula umhlaba kungase kukumangaze!

Cishe uyabona ukuthi iseluleko esikule ncwajana sisekelwe eBhayibhelini. OFakazi BakaJehova bakholelwa ukuthi iBhayibheli linikeza isiqondiso esingasethemba. Lokho kubangelwa ukuthi “liphefumulelwe uNkulunkulu futhi linenzuzo yokufundisa, yokusola neyokuqondisa izinto.” (2 Thimothewu 3:16, 17) Kuzokusiza ukuhlola le ncwadi yasendulo kodwa esebenzayo esikhathini samanje!