UYAYAZI into yokuqala eyenziwa uNowa lapho yena nomkhaya wakhe bephuma emkhunjini? Wenza umnikelo noma isipho kuNkulunkulu. Ungase umbone enza lokhu esithombeni esingezansi. UNowa wanikela ngalesi sipho sezilwane ukuba abonge uNkulunkulu ngokusindisa umkhaya wakhe kuzamcolo omkhulu.

Ucabanga ukuthi uJehova wasijabulela lesi sipho? Yebo, wajabula. Ngakho-ke wathembisa uNowa ukuthi wayengeke aphinde abhubhise umhlaba ngozamcolo.

Ngokushesha umhlaba woma wonke, futhi uNowa nomkhaya wakhe baqala ukuphila okusha ngaphandle komkhumbi. UNkulunkulu wababusisa wathi kubo: ‘Zalani nande, abantu bagcwale emhlabeni wonke.’

Kodwa kamuva, uma abantu bengezwa ngozamcolo omkhulu, babengase besabe ukuthi uzamcolo ofana nalowo wawungafika futhi. Ngakho uNkulunkulu wanikeza isibonakaliso sokukhumbuza abantu ngesithembiso sakhe sokungaphinde akhukhule umhlaba wonke. Uyazi ukuthi wabanikani ukuze abakhumbuze? Kwakuwuthingo.

Uthingo ngokuvamile lubonakala esibhakabhakeni uma kukhanya ilanga ngemva kwemvula. Uthingo lungase lube nemibala eminingi emihle. Wake walubona? Uyalubona lolu olusesithombeni?

UNkulunkulu wathi: ‘Ngiyathembisa ukuthi akusenakuphinde futhi abantu nezilwane kubhujiswe uzamcolo. Ngibeka uthingo lwami emafwini. Futhi uma luvela, ngiyolubona ngisikhumbule lesi sithembiso sami.’

Ngakho-ke uma ubona uthingo, kufanele lukukhumbuzeni? Yebo, isithembiso sikaNkulunkulu sokuthi akanakuphinde abhubhise izwe ngozamcolo.