UBONA amehlo omuntu omfundelayo eqhakaza njengoba eqonda umBhalo enisanda kuwufunda. Usho ngokunensa: “Uqonde ukungitshela ukuthi iBhayibheli lifundisa ukuthi singaphila phakade ePharadesi—khona la emhlabeni?” Umuntu ohamba naye ensimini uyamoyizela athi: “Litheni iBhayibheli?” Ofundelwayo unikina ikhanda emangele, athi: “Angikholwa ukuthi angizange ngifundiswe le nto!” Uyakhumbula ukuthi nasemasontweni ambalwa adlule usho okufanayo lapho eqala ukuzwa ukuthi igama likaNkulunkulu uJehova.

Kuke kwenzeka kuwe lokho? Kwenzekile kubantu abaningi bakaNkulunkulu. Zimbalwa izinto ezisikhumbuza ngokucace kangaka isipho esiyigugu esisiphiwe—ulwazi lweqiniso! Awume kancane ucabange: Safika kanjani kuwe leso sipho? Sizoxoxa ngalowo mbuzo kule ngxenye. Indlela abantu bakaNkulunkulu abakuthole ngayo ukukhanyiselwa okuqhubekayo ngokomoya kuwubufakazi obucacile bokuthi uMbuso kaNkulunkulu ungokoqobo. Sekuphele ikhulu leminyaka iNkosi yawo, uJesu Kristu, iqikelela ukuthi abantu bakaNkulunkulu bafundiswa iqiniso.