Ubungane busekelwe othandweni. Lapho ufunda okwengeziwe ngoJehova, uthando lwakho ngaye luyokhula. Njengoba lukhula uthando lwakho ngoNkulunkulu, nesifiso sakho sokumkhonza siyokhula. Lokhu kuyokushukumisela ukuba ube umfundi kaJesu Kristu. (Mathewu 28:19) Ngokuzibandakanya nomkhaya ojabulayo woFakazi BakaJehova, ungaba nobungane noNkulunkulu kuze kube phakade. Yini okumelwe uyenze?

Kumelwe ubonise uthando lwakho ngoNkulunkulu ngokulalela imithetho yakhe. “Yilokhu okushiwo uthando ngoNkulunkulu, ukuba sigcine imiyalo yakhe; futhi imiyalo yakhe ayiwona umthwalo osindayo.”—1 Johane 5:3.

Kusebenzise okufundayo. UJesu walandisa indaba echaza lokhu. Indoda ehlakaniphile yakha umuzi wayo phezu kwedwala. Indoda eyisiwula yakha umuzi wayo esihlabathini. Lapho kufika isiphepho esikhulu, umuzi owakhiwe phezu kwedwala awubhidlikanga, kodwa kwaba kukhulu ukuwa kowawakhiwe esihlabathini. UJesu wathi labo abezwa izimfundiso zakhe futhi bazenze bafana nendoda ehlakaniphile eyakha phezu kwedwala. Kodwa labo abezwa izimfundiso zakhe kodwa bangazenzi bafana nendoda eyisiwula eyakha esihlabathini. Ufuna ukufana nayiphi indoda?—Mathewu 7:24-27.

 Ukuzinikezela. Lokhu kusho ukuthi utshela uJehova ngomthandazo ukuthi ufuna ukwenza intando yakhe phakade. Ukwenza intando kaNkulunkulu kubonisa ukuthi ungumfundi kaJesu Kristu.—Mathewu 11:29.

Ubhapathizo. ‘Bhapathizwa futhi uhlanze izono zakho ngokubiza igama lakhe.’—IzEnzo 22:16.

Hlanganyela ngokugcwele ekukhonzeni uNkulunkulu. “Noma ngabe yini eniyenzayo, yisebenzeni ngomphefumulo wonke njengokungathi nenzela uJehova, hhayi abantu.”—Kolose 3:23.