1-2. Yini okumele siqhubeke siyenza ngemva kokubhapathizwa? Chaza.

 UVAME ukuyihlanza kaningi kangakanani indlu yakho? Mhlawumbe ngaphambi kokuba uhlale kuyo, wayikhuculula. Kuthiwani uma kwahamba kwahamba wangabe usayihlanza? Njengoba wazi, isheshe ingcole futhi ibe nezintuli. Ukuze uyigcine ibukeka kahle kudingeka uyihlanze njalo.

² Kudingeka umzamo othi awufane uma kuziwa ekucabangeni kwethu nasebuntwini bethu. Yiqiniso, ngaphambi kokuba sibhapathizwe sasebenza kanzima ukuze senze izinguquko ezidingekayo ekuphileni kwethu ukuze “sizihlanze kukho konke ukungcola kwenyama nokomoya.” (2 Kor. 7:1) Kodwa manje kudingeka silalele iseluleko sikamphostoli uPawulu sokuba ‘siqhubeke senziwa basha.’ (Efe. 4:23) Kungani kudingeka umzamo oqhubekayo? Kungenxa yokuthi singasheshe singcole ngaphakathi futhi sibe nezintuli zaleli zwe. Ukuze kungenzeki lokho futhi sizigcine sibukeka kahle phambi kukaJehova, kumele siyihlole njalo indlela esicabanga ngayo, ubuntu bethu nezifiso zethu.

3. Kusho ukuthini ‘ukushintsha ingqondo yenu’? (Roma 12:2)

³ Yini okudingeka siyenze ukuze sishintshe ingqondo yethu, okuwukuthi, sishintshe indlela esicabanga ngayo? (Funda eyabaseRoma 12:2.) Inkulumo yesiGreki ehunyushwe ngokuthi ‘ukushintsha ingqondo yenu’ ingahunyushwa ngokuthi “ukulungisa ingqondo yenu.” Ngakho-ke, asikwazi ukumane  senze izenzo ezimbalwa nje ezinhle. Kunalokho, kumele sizihlole ukuthi singabantu abanjani ngaphakathi ekujuleni, senze noma yiluphi ushintsho oludingekayo ukuze ukuphila kwethu kuvumelane nemithetho kaJehova. Akufanele sikwenze kanye lokho, kufanele sikwenze njalo.

4. Singakugwema kanjani ukulolongwa yileli zwe elibi?

⁴ Lapho singasenaso isono, siyokwazi ukuhlale sijabulisa uJehova kukho konke esikwenzayo. Okwamanje, kudingeka siqhubeke sisebenza kanzima ukuze sifinyelele lowo mgomo. Phawula indlela uPawulu ahlobanisa ngayo ukushintsha ingqondo nokwazi intando kaNkulunkulu, njengoba kubhalwe kweyabaseRoma 12:2. Esikhundleni sokuba sivele sizithele ngabandayo, sivumele leli zwe elibi lisilolonge, kumele siqale sizihlole ukuze sibone ukuthi sizimisele kangakanani ukuvumela indlela kaNkulunkulu yokucabanga ithonye imigomo nezinqumo zethu, singavumeli ukuthonywa ukucabanga kwaleli zwe.

5. Singayihlola kanjani indlela esicabanga ngayo mayelana nokuba seduze kosuku lukaJehova? (Bheka isithombe.)

⁵ Cabanga ngalesi sibonelo. UJehova ufuna ‘sikukhumbule njalo ukufika kosuku’ lwakhe. (2 Pet. 3:12) Zibuze: ‘Ingabe indlela engiphila ngayo ibonisa ukuthi ngiyabona ukuthi sekuseduze kangakanani ukuphela kwaleli zwe elibi? Izinqumo engizenzayo ngokuphathelene nemfundo nomsebenzi ziyabonisa yini ukuthi ukukhonza uJehova kubaluleke kunazo zonke izinto ekuphileni kwami? Nginalo yini ukholo lokuthi uJehova uzonginakekela mina nomndeni wami, noma ingabe ngihlale ngikhathazeke ngezinto engizidingayo?’ Cabanga indlela uJehova ajabula ngayo lapho esibona sizama ukuphila ngendlela evumelana nentando yakhe.​—Math. 6:25-27, 33; Fil. 4:12, 13.

6. Yini okudingeka siqhubeke siyenza?

 ⁶ Kudingeka siyihlole njalo indlela esicabanga ngayo bese senza noma iluphi ushintsho oludingekayo. UPawulu wathi kwabaseKorinte: “Qhubekani nihlola ukuthi nisokholweni yini; qhubekani nihlola lokho nina ngokwenu eniyikho.” (2 Kor. 13:5) Ukuba “sokholweni” kusho okungaphezu kokumane nje uye emihlanganweni yobuKristu nasenkonzweni ngezikhathi ezithile. Kuhlanganisa nendlela esicabanga ngayo, izifiso zethu nezisusa zethu. Ngakho, kudingeka siqhubeke sishintsha ingqondo yethu ngokufunda iZwi likaNkulunkulu, sifunde ukucabanga ngendlela acabanga ngayo, bese senza konke okudingeka sikwenze ukuze siphile ngokuvumelana nentando kaJehova.​—1 Kor. 2:14-16.

7. Ngokweyabase-Efesu 4:31, 32, yini enye okudingeka siyenze, futhi kungani kungase kube nzima?

⁷ Funda eyabase-Efesu 4:31, 32. Ngaphezu kokushintsha indlela esicabanga ngayo, kudingeka ‘sigqoke ubuntu obusha.’ (Efe. 4:24) Lokho kusho ukuthi kufanele senze okuthile. Phakathi kokunye, kumele sisebenze kanzima ukuze sinqobe izimfanelo ezimbi ezinjengenzondo, intukuthelo nolaka. Kungani kungase kube nzima lokho? Kungenxa yokuthi ezinye izimfanelo ezimbi zingene zajula kithi ngaphakathi. Ngokwesibonelo, iBhayibheli lithi abanye abantu ‘bacasuka kalula’ futhi ‘basheshe bathukuthele.’ (IzAga 29:22) Ukulawula izimfanelo ezimbi ezingene zajula kithi kungase kudinge umzamo oqhubekayo ngisho nangemva kokubhapathizwa, njengoba sizobona esibonelweni esilandelayo.

8-9. Isibonelo sikaStephen sisiveza kanjani isidingo sokulahla ubuntu obudala?

⁸ Umzalwane okuthiwa uStephen wayenenkinga yokulawula intukuthelo yakhe. Uthi, “Ngisho noma sengibhapathiziwe kwadingeka ngiqhubeke ngizama ukulawula intukuthelo yami. Ngokwesibonelo, ngelinye ilanga ngisendlini ngendlu, ngajaha isela elalisanda kuntshontsha umsakazo emotweni yami. Njengoba ngisondela kulo, lawulahla phansi umsakazo labaleka. Lapho ngixoxela abanye ukuthi ngiwuthole kanjani umsakazo wami, umdala owayelapho wangibuza, ‘Stephen, ubuzomenzani ukube ubumficile?’ Lowo mbuzo wangenza ngacabanga, wangikhuthaza ukuba ngiqhubeke ngizama ukuba nokuthula.” b

⁹ Njengoba isibonelo sikaStephen sibonisa, imfanelo embi ingavela kungalindelekile ngisho noma sicabanga ukuthi sesiyinqobile. Uma lokho kwenzeka kuwe, ungapheli amandla uphethe ngokuthi uyisehluleki. Ngisho nomphostoli uPawulu wavuma: “Lapho ngifisa ukwenza okuhle, kukhona okubi kimi.” (Roma 7:21-23) Wonke amaKristu anesono anazo izimfanelo ezimbi ezidamane zivela, kuhle kwezintuli nokungcola okuba khona emizini yethu. Kudingeka siqhubeke sisebenza kanzima ukuze sihlale sihlanzekile. Singakwenza kanjani lokho?

10. Singalwa kanjani nezimfanelo ezimbi? (1 Johane 5:14, 15)

¹⁰ Thandaza kuJehova umtshele ngemfanelo embi ekuhluphayo, uqiniseka ngokuthi uzokuzwa akusize. (Funda eyoku-1 Johane 5:14, 15.) Nakuba uJehova engeke ayiqede ngokuyisimangaliso leyo mfanelo, angakupha amandla ukuze ingakunqobi. (1 Pet. 5:10) Okwamanje, yenza ngokuvumelana nemithandazo yakho ngokungenzi izinto ezizovusa ubuntu bakho obudala. Ngokwesibonelo,  ungawabukeli amamuvi, izinhlelo zethelevishini noma ufunde izincwadi ezihlobisa izimfanelo ezimbi ozama ukuzinqoba. Ungayivumeli nengqondo yakho ihlale igxile ezifisweni ezingafanele.​—Fil. 4:8; Kol. 3:2.

11. Yini esingayenza ukuze siqhubeke sigqoka ubuntu obusha?

¹¹ Nakuba usubulahlile ubuntu obudala, kubalulekile ukuba uthuthukise ubuntu obusha. Ungakwenza kanjani lokho? Kwenze umgomo ukulingisa uJehova njengoba ufunda ngezimfanelo zakhe. (Efe. 5:1, 2) Ngokwesibonelo, lapho ufunda indaba eseBhayibhelini eqokomisa imfanelo kaJehova yokuthethelela, zibuze, ‘Ingabe mina ngiyabaxolela abanye?’ Lapho ufunda ngozwela lukaJehova alubonisa abahluphekayo, zibuze, ‘Ngiyabazwela yini mina engikholwa nabo abaswele, futhi ngiyakubonisa yini lokho ngezenzo?’ Qhubeka ushintsha ingqondo yakho ngokugqoka ubuntu obusha kodwa njengoba wenza kanjalo yiba nesineke.

12. Okwenzeka kuStephen kubonisa kanjani ukuthi iBhayibheli linamandla okushintsha ukuphila?

¹² UStephen, okukhulunywe ngaye ekuqaleni, kancane kancane wakwazi ukugqoka ubuntu obusha. Uthi: “Kusukela ngabhapathizwa, sekube nezikhathi eziningi lapho kwakuthi angimbambe ngimdedele umuntu. Sengafunda ukumane ngihambe ngibashiye abantu abazama ukungichukuluza noma ngisinqande ngandlela-thile isimo. Baningi abantu abaye bangincoma ngendlela engiye ngasingatha ngayo izimo ezinjengalezi, ngisho nomkami. Kwangimangaza kwamina lokho! Angizishayi isifuba ngoshintsho engilwenzile ebuntwini bami. Kunalokho, ngikholelwa ukuthi lolo shintsho luwubufakazi bokuthi iBhayibheli linamandla okushintsha ukuphila.”

13. Yini ezosisiza sibe nezifiso ezifanele? (Galathiya 5:16)

¹³ Funda eyabaseGalathiya 5:16. Ukuze uJehova asisize sinqobe empini yokwenza okulungile, usipha umoya wakhe ongcwele ngesandla esivulekile. Lapho sitadisha iZwi likaNkulunkulu, sivumela ukuba lowo moya usithonye. Siyawuthola lowo moya nalapho siya emihlanganweni. Kuleyo mihlangano yobuKristu, sichitha isikhathi nabafowethu nodadewethu abazama kanzima ukwenza okulungile njengathi, futhi lokho kuyasikhuthaza. (Heb. 10:24, 25; 13:7) Kanti lapho sithandaza kuJehova simcela ukuba asisize ngobuthakathaka obuthile, uzosinika umoya wakhe ongcwele ozosiqinisa sikwazi ukuqhubeka silwa. Nakuba ukwenza lezi zinto kungase kungaziqedi lezi zifiso ezimbi, kuzosisiza singenzi ngokuvumelana nazo. Njengoba eyabaseGalathiya 5:16 isho, labo abahamba ngomoya ‘ngeke neze bafeze izifiso zenyama.’

14. Kungani kubalulekile ukuqhubeka sihlakulela izifiso ezifanele?

¹⁴ Lapho sesinaso isimiso esihle sezinto ezingokomoya, kubalulekile ukuba sisilondoloze futhi siqhubeke sihlakulela izifiso ezifanele. Kungani? Kungoba kunesitha esingayeki ukulwa nathi. Leso sitha yisilingo sokwenza okungalungile. Ngisho noma sesibhapathiziwe kungenzeka sikhangwe yizo kanye izinto okufanele sizigweme, ezihlanganisa ukugembula, ukusebenzisa kabi utshwala noma ukubukela izithombe zocansi. (Efe. 5:3, 4) Enye insizwa engumKristu iyavuma: “Enye yezinto ezinzima kakhulu okudingeka ngilwe nayo ukukhangwa abantu bobulili obufana nobami. Ngangicabanga ukuthi yinto edlulayo nje, kodwa isangihlupha namanje leyo mizwa.” Yini engakusiza uma isifiso esingafanele sinamandla?

15. Kungani kukhuthaza ukwazi ukuthi izifiso ezingafanele ‘zivamile kubantu’? (Bheka isithombe.)

 ¹⁵ Njengoba ulwa nesifiso esingafanele, naso esilwa nawe, khumbula ukuthi awuwedwa. IBhayibheli lithi: “Asikho isilingo esinifikele ngaphandle kwalokho okuvamile kubantu.” (1 Kor. 10:13a) Enye inguqulo ilibeka kanje leli vesi: “Anificwanga isilingo esingavamile kubantu.” Lawo mazwi ayebhalelwe amaKristu esilisa nawesifazane ayehlala eKorinte. Amanye ayekade eyiziphingi, izitabane nezidakwa. (1 Kor. 6:9-11) Ucabanga ukuthi ngemva kokubhapathizwa, awazange abe nezifiso ezingafanele okwadingeka alwe nazo? Aba nazo. Yiqiniso, wonke ayegcotshiwe, kodwa futhi ayesengabantu abanesono. Akungabazeki ukuthi nawo kwakusadingeka alwe nezifiso ezingafanele ngezikhathi ezithile. Kufanele kusikhuthaze lokho. Kungani? Kungoba kubonisa ukuthi noma yisiphi isifiso esingafanele olwa naso, ukhona oseke walwa naso. Ngempela, ungakwazi ukuhlala ‘uqinile okholweni, wazi ukuthi izinhlupheko ezifanayo zehlela yonke inhlangano yabazalwane emhlabeni.’​—1 Pet. 5:9.

16. Iyiphi ingozi okufanele siyigweme, futhi kungani?

¹⁶ Gwema ingozi yokucabanga ukuthi akekho oqonda inselele ethile obhekene nayo. Ukucabanga kanjalo kungakwenza uphethe ngokuthi ayikho into engenziwa ngesimo obhekene naso nangokuthi awunawo amandla okulwa nezifiso ezingafanele. IBhayibheli lisho okuhlukile. Lithi: “UNkulunkulu uthembekile, ngeke avumele ukuba nilingwe ngaphezu kwalokho eningakuthwala, kodwa kanye naleso silingo uyokwenza nendlela yokuphuma ukuze nikwazi ukusikhuthazelela.” (1 Kor. 10:13b) Ngakho, ngisho noma isifiso esingafanele sinamandla, singakwazi ukusikhuthazelela ngokuphumelelayo. Ngosizo lukaJehova, ngeke senze ngokuvumelana naso.

17. Nakuba singase singakwazi ukugwema ukufikelwa izifiso ezingafanele, yini esingayenza?

 ¹⁷ Nakhu okufanele uhlale ukukhumbula: Njengoba unesono, ungase ungakwazi ukugwema ukuba izifiso ezingafanele zikufikele. Kodwa lapho zikufikela, ungakwazi ukuzenqaba ngokushesha, njengoba noJosefa enza ngesikhathi ebalekela umkaPotifari. (Gen. 39:12) Akudingeki wenze okufunwa izifiso ezingafanele!

18-19. Yimiphi imibuzo esingazibuza yona njengoba silwela ukushintsha ingqondo yethu?

¹⁸ Ukushintsha ingqondo yethu kudinga umzamo oqhubekayo wokwenza indlela esicabanga ngayo nezenzo zethu kuvumelane nentando kaJehova. Ukuze senze kanjalo, zibuze, ‘Ingabe ngenza izinto ngendlela ebonisa ukuthi ngiyaqaphela ukuthi siyaphuthuma isikhathi esiphila kuso? Ikhona yini intuthuko engiyenzayo ekugqokeni ubuntu obusha? Ngiyawuvumela yini umoya kaJehova ukuba ungiqondise ekuphileni ukuze ngilwe nezifiso zenyama?’

¹⁹ Njengoba uzihlola, ungalindeli ukuthi uzokwenza izinto ngendlela engenaphutha, kodwa bheka intuthuko oyenzayo. Uma ubona ukuthi kukhona lapho kufanele uthuthukise khona, ungapheli amandla. Kunalokho, lalela iseluleko esikweyabaseFilipi 3:16: “Ngezinga esesithuthuke ngalo, masiqhubeke sihamba ngokuhlelekile ngalo mzila ofanayo.” Lapho wenza kanjalo, qiniseka ukuthi uJehova uzoyibusisa imizamo yakho yokuqhubeka ushintsha ingqondo.