Njengoba silungiselela ukutadisha, singase sizibuze, ‘Yini engilindele ukuyifunda?’ Nokho, senza kahle ngokuqaphela ukuthi lokho esilindele ukukufunda kungasenzi singakunaki lokho uJehova asifundisa kona. Yini esingayenza ukuze silungele ukufunda izinto ezintsha lapho sitadisha?

Thandaza ucele ukuhlakanipha. Cela uJehova akusize uqonde lokho afuna ukukufundisa kona manje. (Jak. 1:5) Gwema ukuthembela kuphela kulokho osukwazi kakade.—IzAga 3:​5, 6.

Vumela amandla eZwi likaNkulunkulu asebenze ekuphileni kwakho. “Izwi likaNkulunkulu liyaphila.” (Heb. 4:12) “Izwi” likaNkulunkulu eliphilayo lingasithinta ngezindlela ezihlukahlukene isikhathi ngasinye lapho sifunda iBhayibheli—kodwa lokho kuyokwenzeka kuphela uma sizimisele ukuzuza noma ukufunda kulo.

Bonisa ukubonga ngakho konke okusetafuleni likaJehova. Ukudla okungokomoya asinika kona kufana ‘nedili lezibiliboco.’ (Isaya 25:6) Gwema ukweqa izihloko ocabanga ukuthi ngeke uzijabulele. Ngokwenza kanjalo ngeke nje ugcine ngokuzuza, kodwa uyokujabulela kakhulu lokho uNkulunkulu akunika kona!