Yini Engakusiza Ube Nekusasa Elilondekile?

IDLALE

Njengoba kuchaziwe ezihlokweni ezidlule, abantu baye bazama ukuba nekusasa elihle ngokukholelwe enkolelweni yokudalelwa, ngokuthembela emfundweni, engcebweni nangokuba umuntu onenhliziyo enhle. Nokho ukuzama ukuthola ikusasa elihle usebenzisa ezinye zalezi ndlela, kufana nokuya endaweni ongayazi usebenzisa ibalazwe elinenkinga. Ingabe lokhu kusho ukuthi akukho okungasisiza sithole ikusasa elihle? Cha!

ISIQONDISO ESIVELA EMTHONJENI OPHAKEME

Ngokuvamile lapho senza izinqumo, siye sibuze umuntu omdala nohlakaniphile kunathi. Ngendlela efanayo, singathola isiqondiso esingasethemba mayelana nekusasa kuMuntu omdala nohlakaniphe kakhulu kunathi. Singafunda ngeseluleko saKhe emiBhalweni Engcwele eyaqala ukubhalwa eminyakeni engaba ngu-3 500 edlule. Le miBhalo engcwele ibizwa ngokuthi iBhayibheli.

Kungani ungalethemba iBhayibheli? Ngenxa yokuthi uMlobi walo mdala kakhulu futhi unguMuntu ohlakaniphe kunawo wonke umuntu ezulwini nasemhlabeni. Uchazwe ngokuthi “oMdala Wezinsuku” obelokhu ekhona “kusukela phakade kuze kube phakade.” (Daniyeli 7:9; IHubo 90:2) Uyena “uMdali wamazulu, uNkulunkulu weqiniso, uMbumbi womhlaba.” (Isaya 45:18) Usitshela ukuthi igama lakhe uJehova.—IHubo 83:18.

Ngenxa yokuthi iBhayibheli livela kuMdali wesintu, akakhethi uhlanga noma amasiko njengangcono kunamanye. Iseluleko salo asiphelelwa isikhathi futhi siye sazuzisa abantu kuwo wonke amazwe. Litholakala ngezilimi eziningi futhi liye lasakazwa ngaphezu kwanoma iyiphi enye incwadi. a Lokhu kusho ukuthi abantu abaningi bangaliqonda kalula futhi baqondiswe yilo. La maqiniso asekela lokho okushiwo yiBhayibheli:

“UNkulunkulu akakhethi, kodwa ezizweni zonke umuntu omesabayo nowenza okulungile uyamukeleka kuye.”—IZENZO 10:34, 35.

Njengomzali onothando nosekela abantwana bakhe, uJehova uNkulunkulu unguBaba onothando. Uyasisiza esebenzisa iZwi lakhe, iBhayibheli. (2 Thimothewu 3:16) Ungalethemba iZwi lakhe ngoba nguye owasidala futhi uyakwazi okungasenza sijabule.

ISIQONDISO ESINGASETHEMBA

Singalethemba iBhayibheli ukuthi lingasinikeza isiqondiso esihle ngekusasa ngoba eminyakeni engaba ngu-2 000 edlule, labikezela ngezenzakalo nendlela abantu abazoziphatha ngayo njengoba sikubona namuhla.

IZENZAKALO

“Isizwe siyovukela isizwe, nombuso uvukele umbuso. Kuyoba khona ukuzamazama komhlaba okukhulu, ezindaweni ngezindawo kube khona ukusweleka kokudla nezifo eziwumshayabhuqe.”—LUKA 21:10, 11.

INDLELA ABANTU ABAZIPHATHA NGAYO

“Ezinsukwini zokugcina kuyofika izikhathi ezibucayi okunzima ukubhekana nazo. Ngoba abantu bayokuba abazithandayo, abathanda imali, abaqhoshayo, abazazisayo, abahlambalazi, abangalaleli abazali, abangabongi, abangathembekile, abangenalo uthando, abangafuni sivumelwano, abanyundeli, abangakwazi ukuzithiba, abanolaka, abangenalo uthando lokuhle, abakhapheli, abanenkani, abakhukhumele, abathanda injabulo kunokuba bathande uNkulunkulu.”—2 THIMOTHEWU 3:1-4.

Yini ophetha ngayo lapho ubona izinto iBhayibheli elazibikezela kudala zenzeka manje? Ngokuqinisekile uyavumelana noLeung waseHong Kong othi: “Iziprofetho zeBhayibheli zabhalwa kudala kakhulu. Akunakwenzeka ukuthi umuntu nje angabikezela lezi zinto ngokuthe ngqo. Kumele ukuba iBhayibheli livela kothile ohlakaniphe kakhulu kunathi.”

IBhayibheli lineziprofetho eziningi esezigcwalisekile. b Lokhu kufakazela ukuthi iBhayibheli liyiZwi likaNkulunkulu ngempela. UJehova uthi: “NginguNkulunkulu akekho ofana nami. Ngibikezela isiphetho kusukela ekuqaleni.” (Isaya 46:9, 10) Unesizathu esizwakalayo sokukwethemba lokho iBhayibheli elikushoyo mayelana nekusasa.

ISIQONDISO ESINGAKUZUZISA MANJE NAPHAKADE

Lapho ulalela isiqondiso esitholakala emiBhalweni Engcwele, uzizuzisa wena. Cabanga ngalezi zibonelo.

UMBONO OFANELE NGEMALI NOMSEBENZI

“Kungcono ukuphumula okuncane kunomsebenzi onzima omningi nokugijimisa umoya.”—UMSHUMAYELI 4:6.

UKUPHILA KOMNDENI

“Yilowo nalowo kini kumelwe athande umkakhe njengoba ezithanda yena; ngakolunye uhlangothi, umfazi kufanele amhloniphe ngokujulile umyeni wakhe.”—EFESU 5:33.

UKUZWANA NABANYE

“Hlukana nentukuthelo uyeke ulaka; ungacasuki bese wenza okubi.”—IHUBO 37:8.

Ukusebenzisa lokho iBhayibheli elikushoyo kukuzuzisa manje futhi kukuvulela namathuba okuba nekusasa eliqhakazile. EBhayibhelini, sithola isithembiso sikaNkulunkulu esihle mayelana nekusasa esihlanganisa

UKUTHULA NOKULONDEKA

“Bayothola injabulo enkulu ngenxa yokuthula okuchichimayo.”—IHUBO 37:11.

IZINDLU NOKUDLA OKWANELE

“Bayokwakha izindlu bahlale kuzo, bayotshala amasimu amagilebhisi badle izithelo zawo.”—ISAYA 65:21.

UKUGULA NOMA UKUFA KUZOPHELA

“Ukufa ngeke kusaba khona, noma ukulila noma ukukhala noma ubuhlungu ngeke kusaba khona.”—ISAMBULO 21:4.

Yini okudingeka uyenze ukuze uthole ikusasa elinje? Funda isihloko esilandelayo.

a Ukuze uthole ulwazi mayelana nokuhunyushwa nokusakazwa kweBhayibheli, ngena ku-www.pr418.com ngaphansi kwesihloko esithi IZIMFUNDISO ZEBHAYIBHELI > IBHAYIBHELI NOMLANDO.

b Ukuze uthole okwengeziwe, bheka isahluko 9 sencwadi ethi IBhayibheli—Izwi LikaNkulunkulu Noma Elomuntu? enyatheliswa oFakazi BakaJehova.