Imifanekiso Evela EZweni Lesithembiso

IGerizimu—‘Sasikhulekela Kulentaba’

OWESIFAZANE waseSamariya usemthonjeni. Ingabe lowomshwana awukukhumbuzi ukulandisa okuthinta inhliziyo kokufakaza ngokwethukela kukaJesu kowesifazane ‘emthonjeni kaJakobe’ eSikhari, umuzi waseSamariya? Ingabe ungathanda ukuthuthukisa umbono wakho ngalesosenzakalo esibalulekile?—Johane 4:5-14.

Phawula lezintaba ezimbili ngenhla, cishe ezingamakhilimitha angu-50 enyakatho yeJerusalema. * Ngakwesobunxele, (eningizimu) kuneGerizimu embozwe yizihlahla; iziphethu eziningi zinengxenye ekuvundeni nasebuhleni bayo. Ngakwesokudla (enyakatho) kune-Ebali, ethé ukuphakama kodwa enamadwala futhi engavundile.

Phakathi kwazo kunesigodi esivundile saseShekemi. Khumbula ukuthi lapho umngane kaNkulunkulu uAbrama (kamuva owabizwa ngokuthi uAbrahama) ehla enqamula eZweni Lesithembiso, waphumula eShekemi. Lapha wakhela uJehova ialtare, owayesanda kubonakala kuye futhi wathembisa ukulinikeza inzalo yakhe lelizwe. (Genesise 12:5-7) Yeka ukuthi yindawo efaneleke kanjani yokwenza isithembiso esinjalo, enkabeni yalo izwe elalithenjisiwe! Isesiqongweni seGerizimu noma iEbali, inzalamizi yayingabona izingxenye ezinkulu zeZwe Lesithembiso. Umuzi waseShekemi (iNablus yanamuhla) wawuyisikhungo esibalulekile semisebenzi, njengoba wawusemgwaqweni osentabeni odabula usuka enyakatho uqonde eningizimu eduze nomgwaqo odabula usuka empumalanga uqonde entshonalanga phakathi kogu neSigodi saseJordani.

Ialtare lika-Abrahama kwakuwukuphela kwesakhiwo senkolo esiphawulekayo lapha. Kamuva, uJakobe wathenga indawo kulendawo futhi waqhuba ikukhulekela kweqiniso. Futhi wamba noma wakhokhela ukumba umthombo ojulile, cishe ngaphansi kweGerizimu. Amakhulu eminyaka kamuva owesifazane waseSamariya watshela uJesu: ‘Ubaba uJakobe owasinika lomthombo, waphuza kuwo,’ Kungenzeka ukuthi amanzi awo ayephuma esiphethwini, okungachaza ukuthi kungani u mphostoli uJohane awubiza ngokuthi ‘umthombo kaJakobe.”

 Lapho kukhulunywa ngokukhulekela kweqiniso ngokuphathelene neGerizimu ne-Ebali kungase futhi kukukhumbuze ukuthi uJoshuwa waletha uIsrayeli lapha, njengoba uMose ayeqondisile. UJoshuwa wakha ialtare phezu kweEbali. Cabanga ingxenye yabantu imi phambi kweGerizimu nenye ingxenye imi phambi kwe-Ebali njengoba uJoshuwa efunda ‘umthetho nesibusiso nesiqalekiso.’ (Joshuwa 8:30-35; Duteronomi 11:29) Eminyakeni eithile kamuva, uJoshuwa wabuya futhi lapho ebaxwayisa okokugcina wathi: “Mina nendlu yami siyakumkhonza uJehova.” Abantu benza isivumelwano sokuthi babeyokwenza okufanayo. (Joshuwa 24:1, 15-18, 25) Kodwa, ingabe babeyokwenza ngempela?

Impendulo ingase ikusize ukuba uqonde ingxoxo kaJesu nowesifazane waseSamariya. Uyabona, ukukhulekela kweqiniso okwakulandelwa uAbrahama, uJakobe, noJoshuwa akuzange kuqhubeke lapha eSamariya.

Ngemva kokuba izizwe eziyishumi zasenyakatho zizehlukanisile, zaphendukela ekukhulekeleni ithole. Ngakho uJehova wavumela ama-Asiriya ukuba ayinqobe lendawo ngo-740 B.C.E. Ahamba nabantu abiningi, aletha abantu ababezothatha indawo bevela kwenye indawo eMbusweni waseAsiriya, abakhulekeli bonkulunkulu abangaziwa. Amanye alawomaqaba ngokunokwenzeka ashada namaIsrayeli futhi afunda ezinye zezimfundiso zokukhulekela kweqiniso, ezinjengokusoka. Kodwa uhlobo lokukhulekela kwaseSamariya olwaba umphumela ngokuqinisekile lwalungamjabulisi ngokugcwele uNkulunkulu.—2 AmaKhosi 17:7-33.

Ekukhulekeleni kwawo ikuyingxubvange, amaSamariya amukela kuphela izincwadi Ezinhlanu zokuqala zikaMose, okuthiwa yiPentateuch, njengeziwumBhalo. Cishe ngekhulu lesine leminyaka B.C.E., enza ithempeli phezu kweNtaba iGerizimu, encintisana nethempeli likaNkulunkulu eliseJerusalema. Ngokuhamba kwesikhathi ithempeli laseGerizimu lanikezelwa kuZeus (noma, uJupiter) futhi ekugcineni labhujiswa. Nokho, iGerizumu yaqhubeka iyisikhungo sokukhulekela saseSamariya.

Kuze kube namuhla, amaSamariya agubha iPhasika laminyaka yonke eGerizimu. Kuhlatshwa amawundlu amaningana. Izidumbu zawo zifakwa emigqonyeni yamanzi abilayo ukuze uvolo uzisukele, bese kuphekwa inyama emigodini amahora amaningi. Phakathi kwamabili amakhulu amaSamariya, amaningi avela eJerusalema, adla ukudla kwephasika. Ngakwesobunxele, ungambona umpristi omkhulu waseSamariya, ikhanda lakhe limboziwe, ekhonza njengompristi emkhosini wePhasika eNtabeni iGerizimu.

Khumbulu lokho owesifazane waseSamariya akutshela uJesu: “Okhokho bethu babekhulekela kulentaba.” UJesu wanikeza yena kanye nathi incazelo eqondile: “Isikhathi siyeza, lapho ningasayikukhuleka kuBaba nakulentaba naseJerusalema . . . Kodwa isikhathi siyeza, sesikhona namanje, lapho abakhulekayo abaqinisileyo beyakukhuleka kuBaba ngomoya nangeqiniso; ngokuba uBaba ufuna abakhuleka kuye abanjalo. UNkulunkulu unguMoya; abakhuleka kuye bafanele ukukhuleka ngomoya nangeqiniso.”—Johane 4:20-24.

[Umbhalo waphansi]

[Umthombo Wesithombe ekhasini 24

Pictorial Archive (Near Eastern History) Est.

[Imithombo Yezithombe ekhasini 25

Garo Nalbandian

Garo Nalbandian