Yimani Niphelele, Ninokuqiniseka Okuqinile

INququlo Yezwe Elisha Yaziswa Yizigidi Emhlabeni Wonke

KWATHATHA iminyaka engu-12, izinyanga ezintathu nezinsuku ezingu-11 kusetshenzwa ngenkuthalo. Nokho, ngo-March 13, 1960, ingxenye yokugcina yombhalo wenguqulo entsha yeBhayibheli yaqedwa. Yabizwa ngokuthi i-New World Translation of the Holy Scriptures.

Ngemva konyaka, oFakazi BakaJehova bayinyathelisa le nguqulo isiwumqulu owodwa. Kwanyatheliswa amakhophi ayisigidi alolo hlelo luka-1961. Namuhla, inani lamakhophi asenyathelisiwe selingaphezu kwezigidi eziyikhulu, okwenza INguqulo Yezwe Elisha ibe ngelinye lamaBhayibheli asakazwa kabanzi kunawo wonke. Nokho, yini eyenza oFakazi benza le nguqulo?

Kungani Kwakudingeka Inguqulo Entsha YeBhayibheli?

Ukuze baqonde futhi bamemezele isigijimi semiBhalo Engcwele, oFakazi BakaJehova babeye basebenzisa izinguqulo eziningi ezihlukene zamaBhayibheli esiNgisi phakathi neminyaka edlule. Nakuba lezi zinguqulo zinezici zazo ezinhle, ngokuvamile zithonywa amasiko enkolo nezimfundiso zeLobukholwa. (Mathewu 15:6) Ngakho-ke, oFakazi BakaJehova babona kunesidingo senguqulo yeBhayibheli ekudlulisela ngokwethembeka lokho okusemibhalweni yokuqala ephefumulelwe.

Isinyathelo sokuqala ekwaneliseni lesi sidingo sathathwa ngo-October 1946 lapho uNathan H. Knorr, ilungu leNdikimba Ebusayo YoFakazi BakaJehova, ephakamisa ukuba kwenziwe inguqulo entsha yeBhayibheli. Ngo-December 2, 1947, iKomiti Yokuhumusha IBhayibheli Lezwe Elisha yaqala ukwenza inguqulo eyayiyonamathela embhalweni wokuqala, ihlanganise izinto izazi ezazisanda kuzithola emibhalweni yeBhayibheli yesandla, futhi isebenzise ulimi abafundi banamuhla ababeyoluqonda kalula.

Lapho kunyatheliswa umqulu wokuqala ngo-1950—INguqulo Yezwe Elisha YemiBhalo YamaKristu YesiGreki—kwaba sobala ukuthi abahumushi babeyifinyelele imigomo yabo. Imibhalo yeBhayibheli ngaphambili eyayiqondwa kalufifi yakhanya bhá. Ngokwesibonelo, cabanga ngombhalo odidayo okuMathewu 5:3, othi: “Babusisiwe abampofu emoyeni.” (IBhayibheli lesiZulu elivamile) Wahunyushwa ngokuthi: “Bayajabula abaqaphela isidingo sabo esingokomoya.” Amazwi abafundi bakaJesu akhuluma ‘ngesibonakaliso sokuza’ kwakhe (IBhayibheli lesiZulu elivamile) ahunyushwa ngokuthi “isibonakaliso sokuba khona” kwakhe. (Mathewu 24:3) “Imfihlakalo yokukhonza uNkulunkulu” (IBhayibheli lesiZulu elivamile) yahunyushwa ngokuthi ‘imfihlo engcwele yokuzinikela kokuhlonipha uNkulunkulu.’ (1 Thimothewu 3:16) Akubuzwa ukuthi INguqulo Yezwe Elisha yénza kwaqondwa izinto ezazingaqondakali ngaphambili.

Izazi ezihlukahlukene zahlabeka umxhwele. Ngokwesibonelo, isazi seBhayibheli  saseBrithani u-Alexander Thomson sathi INguqulo Yezwe Elisha ivelele ekuhumusheni ngokunembile inkathi yamanje yesiGreki. Ngokwesibonelo: Eyabase-Efesu 5:25 ithi “Madoda, qhubekani nithanda omkenu” kunokuba imane ithi “Madoda, thandani omkenu.” (IBhayibheli lesiZulu elivamile) “Ayikho enye inguqulo okubonakala isivezé kahle ngokugcwele futhi kaningi kangaka lesi sici esihle,” kusho uThomson mayelana ne-Nguqulo Yezwe Elisha.

Esinye isici esivelele se-Nguqulo Yezwe Elisha ukusebenzisa kwayo igama likaNkulunkulu siqu elithi Jehova kokubili ezingxenyeni zesiHeberu nezesiGreki zemiBhalo. Njengoba leli gama likaNkulunkulu lesiHeberu livela cishe izikhathi ezingu-7 000 kulokho okuthiwa yiTestamente Elidala lilodwa, kusobala ukuthi uMdali wethu ufuna abakhulekeli bakhe balisebenzise igama lakhe futhi bamazi njengomuntu. (Eksodusi 34:6, 7) INguqulo Yezwe Elisha iye yasiza izigidi zabantu ukuba zenze njalo.

INguqulo Yezwe Elisha Ihunyushwa Ngezilimi Eziningi

Kusukela INguqulo Yezwe Elisha yaba khona ngesiNgisi, oFakazi BakaJehova emhlabeni wonke bálangazela ukuyithola ngolimi lwabo—futhi kufanele. Kwamanye amazwe, kwakunzima ukuthola izinguqulo zezilimi zendawo ngoba abameleli beziNhlangano ZamaBhayibheli ababewasakaza babengakujabuleli ukubona amaBhayibheli abo ephelela koFakazi BakaJehova. Ngaphezu kwalokho, lawo maBhayibheli ngokuvamile ayefihla izimfundiso ezibalulekile. Isibonelo esivamile esenguqulo ethile yolimi lwaseningizimu yeYurophu efihla indawo ebalulekile ebhekisela egameni likaNkulunkulu, ngokuba esikhundleni samazwi kaJesu athi “Malingcweliswe igama lakho” ithi “Mawudunyiswe abantu.”—Mathewu 6:9.

Ngo-1961, abahumushi baqala ukuwuhumushela kwezinye izilimi umbhalo wesiNgisi we-Nguqulo Yezwe Elisha. Eminyakeni emibili nje kamuva, INguqulo Yezwe Elisha YemiBhalo YamaKristu YesiGreki yaphothulwa ngezilimi eziyisithupha ezengeziwe. Ngaleso sikhathi, oFakazi abathathu kwabane emhlabeni wonke base bekwazi ukufunda leli Bhayibheli ngolimi lwabo. Nokho, mkhulu umsebenzi okwakusamelwe wenziwe ukuze oFakazi BakaJehova benze izigidi eziningi zabantu zithole ikhophi yaleli Bhayibheli.

Ngo-1989 lowo mgomo kwase kufana nokuthi usukhathuliwe lapho kumiswa uMnyango Wezinkonzo Zokuhumusha endlunkulu yomhlaba wonke yoFakazi BakaJehova. Lowo mnyango wakha isimiso sokuhumusha esihlanganisa ukucwaningwa kwamagama eBhayibheli nobuchwepheshe bama-computer. Ukusebenzisa lesi simiso kuye kwenza kwenzeka ukuba imiBhalo YamaKristu YesiGreki ihunyushelwe ezilimini ezithile ngonyaka owodwa futhi imiBhalo YesiHeberu ihunyushwe ngeminyaka emibili—okuyisikhathi esincane kakhulu kunesidingekayo ngokuvamile ukuze kuhunyushwe iBhayibheli. Kusukela yasungulwa le ndlela, sekuhunyushwe izinhlelo ezingu-29 ze-Nguqulo Yezwe Elisha zisuselwa esiNgisini futhi zakhululwa ngezilimi ezikhulunywa abantu abangaphezu kwezigidi eziyizinkulungwane ezimbili. Umsebenzi usaqhubeka ngezinye izilimi ezingu-12. Kuze kube namuhla, INguqulo Yezwe Elisha yesiNgisi isihunyushelwe ezilimini ezingu-41, iphelele noma iyingxenye.

Manje sekudlule iminyaka engaphezu kwengu-50 kusukela kwakhululwa ingxenye yokuqala ye-Nguqulo Yezwe Elisha ngo-August 3, 1950, eMhlanganweni Wokwanda KoMbuso Wasezulwini woFakazi BakaJehova owawuseDolobheni laseNew York. Kuleso senzakalo, uNathan H. Knorr wanxusa ababekhona emhlanganweni: “Yithatheni le nguqulo. Niyifunde yonke, nizoyijabulela. Yitadisheni,  ngoba iyonisiza ukuba nithuthukise ukuqonda kwenu iZwi likaNkulunkulu. Niyiyise nakwabanye.” Sikukhuthaza ukuba ulifunde nsuku zonke iBhayibheli, ngoba umyalezo walo ungakusiza ukuba ‘ume uphelele futhi unokuqiniseka okuqinile kuyo yonke intando kaNkulunkulu.’—Kolose 4:12.

[Ama-graph/Izithombe ekashini 8, 9]

(Ukuze ubone ukuthi indaba ihlelwe kanjani, bheka encwadini)

“Ukukhululwa Kwe-Nguqulo Yezwe Elisha”

Yakhululwa okokuqala ngesiNgisi, manje INguqulo Yezwe Elisha isitholakala ngezilimi ezingu-41 ezengeziwe iphelele noma iyingxenye.

ImiBhalo YamaKristu

YesiGreki IBhayibheli Eliphelele

1950 1

1960-69 6 5

1970-79 4 2

1980-89 2 2

1990-Kuze Kube Manje 29 19