Izwe Labhujiswa Lonke!

Bheka izwe elikuzungezile, amadolobha alo, amasiko alo, impumelelo yalo kwezesayensi, nabantu balo abayizinkulungwane zezigidi. Kulula ukuba likuhlabe umxhwele njengoba libonakala lizinzile, akunjalo? Uke ucabange yini ukuthi ngolunye usuku leli zwe liyoshabalala ngokuphelele? Kungaba nzima ukukubona ngeso lengqondo loko. Nokho, ngokomthombo othembekile, ubuwazi yini ukuthi kwakukhona izwe ngaphambi kwaleli futhi labhujiswa ngokuphelele?

ASIKHULUMI ngezwe elinezizwana eziqhuba amasiko asendulo. Izwe elabhubha laliphucukile, linamadolobha, liphumelela kwezobuciko, linolwazi kwezesayensi. Nakuba kunjalo, ukulandisa kweBhayibheli kusitshela ukuthi ngokuphazima kweso, ngomhla ka-17 ngenyanga yesibili, eminyakeni engaba ngu-352 ngaphambi kokuba inzalamizi u-Abrahama izalwe, kwaqala isikhukhula esacekela phansi wonke umhlaba. *

 Ingabe lowo mbhalo ogciniwe unembile? Ingabe isigameko esinjalo senzeka ngempela? Lalikhona ngempela yini izwe lamandulo elalichuma nelashatshalaliswa ngaphambi kwelamanje? Uma kunjalo, kungani laphela? Konakalaphi? Futhi ingabe sikhona isifundo esingasifunda ekuqothulweni kwalo?

Ingabe Labhujiswa Ngempela Izwe Lamandulo?

Uma inhlekelele enjalo esabisayo yenzeka ngempela, akumelwe ngabe seyalibaleka ngokuphelele. Yingakho ezizweni eziningi kunezikhumbuzo zalokho kubhujiswa. Ngokwesibonelo, cabangela usuku oluthe ngqó olulotshwe emiBhalweni. Inyanga yesibili ekhalendeni lasendulo yayiqala enyangeni esiyibiza ngo-October iphele maphakathi no-November. Ngakho-ke umhla ka-17 cishe wawungosuku lokuqala ku-November. Akunakumane nje kuqondane ukuthi emazweni amaningi imikhosi yasebafa igujwa ngaleso sikhathi sonyaka.

Obunye ubufakazi bukaZamcolo bugcwele emasikweni esintu. Cishe bonke abantu bamandulo banenganekwane ngokhokho babo abasinda esikhukhuleni sembulunga yonke. AbaThwa base-Afrika, ama-Celt aseYurophu, ama-Inca aseNingizimu Melika—banezinganekwane ezifanayo bonke, njengoba kunjalo nangabantu base-Alaska, e-Australia, eChina, eNdiya, eLithuania, eMexico, eMicronesia, eNew Zealand, nasezingxenyeni zeNyakatho Melika, uma sibala ezimbalwa nje.

Yiqiniso, lezo zinganekwane ziye zanokondiswa, kodwa zonke zinemininingwane ebonisa ukuthi umsuka wazo uyefana: uNkulunkulu wanengwa ububi besintu. Waletha isikhukhula esikhulu. Sonke isintu sabhujiswa. Nokho, abambalwa abalungile balondolozwa. Bakha umkhumbi okwasindiswa kuwo abantu nezilwane. Ngesikhathi esifanele kwathunyelwa izinyoni ukuyohlola ukuthi ikhona yini indawo eyomile. Ekugcineni, umkhumbi wama phezu kwentaba. Lapho abasindile behla, benza umhlatshelo.

Kufakazelani lokhu? Ukufana akunakwenzeka ngengozi. Bubonke lobu bufakazi balezi zinganekwane busekela ubufakazi bamandulo beBhayibheli bokuthi bonke abantu badabuka kulabo abasinda kuzamcolo owabhubhisa izwe lesintu. Ngakho, akudingeki sithembele ezinganekwaneni noma ezinsumansumaneni ukuze sazi okwenzeka. EmiBhalweni YesiHeberu sinombhalo weBhayibheli olondolozwe ngokucophelela.—Genesise izahluko 6-8.

IBhayibheli liqukethe umbhalo ophefumulelwe  ongokomlando ohlehlela emuva ekuqaleni kokuphila. Nokho, ubufakazi bubonisa ukuthi ungaphezu nje kokuba umlando. Isiprofetho sawo esingageji nokuhlakanipha kwawo okujulile kubonisa ukuthi uyikho kanye lokho othi uyikho—indlela uNkulunkulu akhuluma ngayo nesintu. Ngokungafani nezinsumansumane, iBhayibheli linamagama, izinsuku kanye nohlu lozalo, nemininingwane yokuma kwendawo ezindabeni ezingokomlando. Lisenza sibone ukuthi ukuphila kwakunjani ngaphambi kweSikhukhula, libuye liveze nokuthi kungani umhlaba wonke waphela kungazelelwe.

Konakalaphi kulowo mphakathi wangaphambi kwesikhukhula? Isihloko esilandelayo sizophendula lowo mbuzo. Lo mbuzo ubalulekile kulabo abazibuza ukuthi ikusasa lempucuko yethu yamanje lilondeke kangakanani.

[Umbhalo waphansi]

[Ishadi ekhasini 4]

(Ukuze ubone ukuthi indaba ihlelwe kanjani, bheka encwadini)

Izinganekwane NgeSikhukhula Emhlabeni Wonke

Izwe Ukuxhumana 1 2 3 4 5 6 7 8 9 10

EGrisi 7 ◆ ◆ ◆ ◆ ◆ ◆ ◆

ERome 6 ◆ ◆ ◆ ◆ ◆ ◆

ELithuania 6 ◆ ◆ ◆ ◆ ◆ ◆

E-Asiriya 9 ◆ ◆ ◆ ◆ ◆ ◆ ◆ ◆ ◆

ETanzania 7 ◆ ◆ ◆ ◆ ◆ ◆ ◆

ENdiya - AmaHindu 6 ◆ ◆ ◆ ◆ ◆ ◆

ENew Zealand - AmaMaori 5 ◆ ◆ ◆ ◆ ◆

EMicronesia 7 ◆ ◆ ◆ ◆ ◆ ◆ ◆

EWashington U.S.A.- AmaYakima 7 ◆ ◆ ◆ ◆ ◆ ◆ ◆

EMississippi U.S.A. - AmaChoctaw 7 ◆ ◆ ◆ ◆ ◆ ◆ ◆

EMexico - AmaMichoaca 5 ◆ ◆ ◆ ◆ ◆

ENingizimu Melika - AmaQuechua 4 ◆ ◆ ◆ ◆

EBolivia - AmaChiringuano 5 ◆ ◆ ◆ ◆ ◆

EGuyana - Ama-Arawak 6 ◆ ◆ ◆ ◆ ◆ ◆

1: UNkulunkulu wacunulwa ububi

2: Imbubhiso ngeSikhukhula

3: Yavela kuNkulunkulu

4: Kwakhishwa isixwayiso saphezulu

5: Abambalwa besintu bayasinda

6: Basindiswa besemkhunjini

7: Izilwane zasindiswa

8: Kwathunyelwa inyoni noma esinye isilwane

9: Ekugcineni baphumula entabeni

10: Benza umhlatshelo