Sisho Ukuthini Kuwe ISidlo SeNkosi Sakusihlwa?
Sisho Ukuthini Kuwe ISidlo SeNkosi Sakusihlwa?
“Noma ubani odla isinkwa noma aphuze indebe yeNkosi ngokungafanele uyoba necala ngokuqondene nomzimba negazi leNkosi.”—1 KORINTE 11:27.
1. Isiphi isenzakalo esibaluleke kunazo zonke esihlelelwe unyaka ka-2003, futhi uyini umsuka waso?
ISENZAKALO esibaluleke kunazo zonke esihlelelwe unyaka ka-2003 sizoba ngemva kokushona kwelanga ngo-April 16. Ngaleso sikhathi, oFakazi BakaJehova bayohlangana ukuze bagcine iSikhumbuzo sokufa kukaJesu Kristu. Njengoba kuboniswe esihlokweni esandulele, uJesu wamisa lo mkhosi, obizwa nangokuthi iSidlo SeNkosi Sakusihlwa, ngemva kokuba yena nabaphostoli bakhe begubhe iPhasika ngo-Nisani 14, 33 C.E. Izifanekiselo zeSikhumbuzo eziyisinkwa esingenamvubelo newayini elibomvu zifanekisela umzimba kaKristu ongenasono negazi lakhe elachitheka—umhlatshelo okuwukuphela kwawo ongahlenga isintu esonweni nasekufeni okuwufuzo.—Roma 5:12; 6:23.
2. Isiphi isixwayiso esikweyoku-1 Korinte 11:27?
2 Labo abadla izifanekiselo zeSikhumbuzo kumelwe bazidle ngokufanele. Umphostoli uPawulu wakwenza kwacaca lokho lapho ebhalela amaKristu aseKorinte lasendulo, lapho iSidlo SeNkosi Sakusihlwa sasingagcinwa khona ngendlela efanele. (1 Korinte 11:20-22) UPawulu wabhala: “Noma ubani odla isinkwa noma aphuze indebe yeNkosi ngokungafanele uyoba necala ngokuqondene nomzimba negazi leNkosi.” (1 Korinte 11:27) Asho ukuthini lawo mazwi?
Abanye Babesigcina Ngokungafanele
3. AmaKristu amaningi aseKorinte ayeziphatha kanjani emikhosini yeSidlo SeNkosi Sakusihlwa?
3 AmaKristu amaningi aseKorinte ayedla ngokungafanele eSikhumbuzweni. Kwakunokuhlukana phakathi kwawo, futhi okungenani isikhathi esithile, abanye babefika nokudla kwabo kwakusihlwa badle ngaphambi komkhosi noma phakathi nawo, ngokuvamile beqisa ekudleni nasekuphuzeni. Babelele engqondweni nangokomoya. Lokhu kwabenza baba “necala ngokuqondene nomzimba negazi leNkosi.” Labo ababesuke bengadlanga kusihlwa babelambile, bese bephazamiseka. Yebo, abaningi babedla bengenanhlonipho futhi bengakuqapheli ngokugcwele ukubaluleka kwalesi senzakalo. Shono bazilethela ukwahlulelwa!—1 Korinte 11:27-34.
4, 5. Kungani ukuzihlola kubalulekile kubo bonke abadla izifanekiselo zeSikhumbuzo?
4 Unyaka ngamunye lapho kusondela iSikhumbuzo, kubalulekile ukuba labo abavame ukudla izifanekiselo bazihlole. Ukuze bahlanganyele ngokufanele kulesi sidlo senhlanganyelo, kumelwe babe abaphile kahle ngokomoya. Noma ubani ongawuhloniphi umhlatshelo kaJesu, nowudelelayo imbala, uyoba sengozini ‘yokunqunywa kubantu bakaNkulunkulu,’ njengomIsrayeli owayedla isidlo senhlanganyelo engcolile.—Levitikusi 7:20; Hebheru 10:28-31.
5 UPawulu wafanisa iSikhumbuzo nesidlo senhlanganyelo kwa-Israyeli wasendulo. Wakhuluma ngabadlayo abahlanganyela kuKristu wayesethi: “Anikwazi ukuphuza indebe kaJehova nibe niphuza indebe yamademoni; anikwazi ukudla ‘etafuleni likaJehova’ nibe nidla etafuleni lamademoni.” (1 Korinte 10:16-21) Uma umuntu oye adle izifanekiselo zeSikhumbuzo enza isono esingathí sina, kufanele asivume leso sono kuJehova futhi afune usizo olungokomoya lwamadoda amadala ebandla. (IzAga 28:13; Jakobe 5:13-16) Uma ephenduka ngempela futhi eveza izithelo ezifanela ukuphenduka, uyobe engadli ngokungafanele.—Luka 3:8.
Ukuba Khona Njengezibukeli Ezihloniphayo
6. UNkulunkulu uligcinele obani ilungelo lokudla eSidlweni SeNkosi Sakusihlwa?
6 Ingabe labo abenza okuhle manje ensalini yabafowabo bakaKristu abangu-144 000 kufanele badle eSidlweni SeNkosi Sakusihlwa? (Mathewu 25:31-40; IsAmbulo 14:1) Cha. Lelo lungelo uNkulunkulu uligcinele abantu abagcobe ngomoya ongcwele ukuba babe “izindlalifa ezikanye noKristu.” (Roma 8:14-18; 1 Johane 2:20) Bamiphi-ke labo abanethemba lokuphila phakade epharadesi lomhlaba wonke ngaphansi kokubusa koMbuso? (Luka 23:43; IsAmbulo 21:3, 4) Njengoba bengezona izindlalifa ezikanye noJesu ezinethemba lasezulwini, baba khona eSikhumbuzweni njengezibukeli ezihloniphayo.—Roma 6:3-5.
7. Kungani amaKristu ekhulu lokuqala ayazi ukuthi kufanele adle izifanekiselo zeSikhumbuzo?
7 AmaKristu eqiniso ekhulwini lokuqala ayegcotshwe ngomoya ongcwele. Amaningi awo ayekwazi ukusebenzisa isipho somoya esiyisimangaliso esisodwa noma ngaphezulu, njengokukhuluma ngezilimi. Ngakho-ke, kwakungeke kube nzima kubantu abanjalo ukwazi ukuthi bagcotshwe ngomoya nokuthi kufanele badle izifanekiselo zeSikhumbuzo. Nokho, esikhathini sethu, lokhu kungabonakala ngesisekelo samazwi aphefumulelwe anjengalawa: “Bonke abaholwa ngumoya kaNkulunkulu, laba bangamadodana kaNkulunkulu. Ngoba anamukelanga umoya wobugqila obangela ukwesaba futhi, kodwa namukela umoya wokutholwa njengamadodana, umoya esikhamuluka ngawo sithi: ‘Abha, Baba!’”—Roma 8:14, 15.
8. Obani abamelelwa “ukolweni” “nokhula” okukhulunywa ngakho kuMathewu isahluko 13?
8 Phakathi namakhulu eminyaka, abagcotshiwe bangempela banda ‘njengokolweni’ ensimini ‘yokhula,’ noma amaKristu amanga. (Mathewu 13:24-30, 36-43) Kusukela ngawo-1870, “ukolweni” waya ubonakala nakakhulu, futhi eminyakeni ethile kamuva ababonisi abangamaKristu agcotshiwe batshelwa: “Abadala . . . kufanele babavezele le mibandela labo ababuthanela [iSikhumbuzo],—(1) ukholo egazini [likaKristu]; (2) ukuzinikezela eNkosini nasenkonzweni yayo, kuze kube ngisho nasekufeni. Kufanele babe sebemema bonke abanalokhu kuthambekela futhi abazinikezele ngale ndlela ukuba bahlanganyele ekugubheni ukufa kweNkosi.”—Studies in the Scriptures, UMqulu VI, The New Creation, ikhasi 473. *
Ukufuna “Ezinye Izimvu”
9. Ngo-1935 kwacaciswa kanjani ukuthi singobani “isixuku esikhulu,” futhi lokhu kwabathinta kanjani abanye ababedla izifanekiselo zeSikhumbuzo?
9 Ngokuhamba kwesikhathi, inhlangano kaJehova yaqala ukugxila kwabanye ngaphezu kwabalandeli bakaKristu abagcotshiwe. Phakathi nawo-1930 kwenzeka ushintsho oluphawulekayo kulokhu. Ngaphambi kwaleso sikhathi, abantu bakaNkulunkulu babebheka “isixuku esikhulu” sesAmbulo 7:9 njengesigaba sesibili esingokomoya esasiyoba sezulwini nabagcotshiwe abangu-144 000 abavusiwe—njengezimpelesi noma abangane bomlobokazi kaKristu. (IHubo 45:14, 15; IsAmbulo 7:4; 21:2, 9) Kodwa ngo-May 31, 1935, enkulumweni eyanikezwa emhlanganweni woFakazi BakaJehova eWashington, D.C., e-U.S.A., kwachazwa ngemiBhalo ukuthi “isixuku esikhulu” sibhekisela ‘kwezinye izimvu’ eziphila esikhathini sokuphela. (Johane 10:16) Ngemva kwalowo mhlangano, abanye ngaphambili ababezidla izifanekiselo zeSikhumbuzo bayeka ukuzidla ngoba beqaphela ukuthi bona banethemba lasemhlabeni, hhayi elasezulwini.
10. Ungalichaza kanjani ithemba nemithwalo yemfanelo ‘yezinye izimvu’ zanamuhla?
10 Ikakhulu kusukela ngo-1935, kuye kwafunwa labo ababa “ezinye izimvu,” abanokholo esihlengweni, bazinikezele kuNkulunkulu futhi basekele ‘umhlambi omncane’ ogcotshiwe emsebenzini wokushumayela ngoMbuso. (Luka 12:32) Lezi ezinye izimvu zinethemba lokuphila phakade emhlabeni, kodwa kuzo zonke ezinye izici, ziyafana nensali yanamuhla yezindlalifa zoMbuso. Njengabafokazi bakwa-Israyeli wasendulo ababekhulekela uJehova futhi bezithoba eMthethweni, ezinye izimvu zanamuhla zamukela imithwalo yemfanelo yobuKristu, njengokushumayela izindaba ezinhle namalungu ka-Israyeli ongokomoya. (Galathiya 6:16) Nokho, njengoba nje kwakungekho mfokazi owayengaba inkosi yakwa-Israyeli noma umpristi, nezinye izimvu azikwazi ukubusa eMbusweni wasezulwini noma zibe abapristi.—Duteronomi 17:15.
11. Kungani isikhathi umuntu abhapathizwa ngaso singase sithinte ithemba analo?
11 Khona-ke, ngawo-1930 kwase kucaca ukuthi iningi labesigaba sasezulwini lase likhethiwe. Sekungamashumi eminyaka manje kufunwa ezinye izimvu, ezinethemba lasemhlabeni. Uma ogcotshiwe eba ongathembekile, cishe kuyobizwa umuntu osenesikhathi eside ekhonza uNkulunkulu ngokwethembeka njengomunye wezinye izimvu ukuze agcwalise isikhala esivulekile kwabangu-144 000.
Okwenza Abanye Benze Iphutha Lokucabanga Ukuthi Bakhethiwe
12. Iziphi izimo okufanele zenze umuntu ayeke ukudla izifanekiselo zeSikhumbuzo, futhi ngani?
12 AmaKristu agcotshiwe aqiniseka ngokugcwele ukuthi anobizo lwasezulwini. Kodwa kuthiwani uma abantu abathile abangenalo lolu bizo bebelokhu bedla izifanekiselo zeSikhumbuzo? Njengoba manje sebeqaphela ukuthi abakaze babe nethemba lasezulwini, ngokuqinisekile unembeza wabo uyobaphoqa ukuba bayeke ukudla. UNkulunkulu ngeke amenamela umuntu ozishaya obizelwe ukuyoba inkosi nompristi wasezulwini ebe azi ukuthi empeleni akanalo lolo bizo. (Roma 9:16; IsAmbulo 20:6) UJehova wambhubhisa umLevi onguKhora ngokugabadela kwakhe afune ubupristi buka-Aroni. (Eksodusi 28:1; Numeri 16:4-11, 31-35) Uma umKristu eqaphela ukuthi uye wadla izifanekiselo zeSikhumbuzo kungafanele, kufanele ayeke ukudla futhi athandazele intethelelo kaJehova ngokuthobeka.—IHubo 19:13.
13, 14. Kungani abanye bengase benze iphutha lokucabanga ukuthi banobizo lwasezulwini?
13 Kungani abanye bengase benze iphutha lokucabanga ukuthi banobizo lwasezulwini? Ukushonelwa umngane womshado, noma enye inhlekelele, kungase kubenze baphelelwe uthando lokuphila kwasemhlabeni. Noma kungenzeka bafisa ukuba nethemba elifanayo nelomngane oseduze othi ungumKristu ogcotshiwe. Yebo, uNkulunkulu akabelanga muntu ukuba ajoyinise abanye kuleli lungelo. Futhi izindlalifa zoMbuso akazigcobi ngokuzenza zizwe amazwi azitshela ukuthi zigcotshiwe.
14 Umbono wenkolo ongamanga wokuthi bonke abantu abalungileyo baya ezulwini ungase wenze abanye bacabange ukuthi banobizo lwasezulwini. Ngakho, kudingeka siqaphe ukuba singathonywa imibono eyiphutha yesikhathi esidlule noma ezinye izici. Ngokwesibonelo, abanye bangase bazibuze: ‘Ikhona yini imithi yokwelapha engiyisebenzisayo ethonya imizwelo yami? Ingabe ngithambekele ekubeni nemizwelo ejulile engingase ngiyiqonde ngokungeyikho?’
15, 16. Kungani abanye abambalwa bengase bacabange ukuthi bagcotshiwe kube kungenjalo?
15 Abambalwa bangase bazibuze: ‘Ingabe ngifuna ukuvelela? Ingabe nginxanela igunya manje noma njengendlalifa ekanye noKristu esikhathini esizayo?’ Lapho izindlalifa zoMbuso zithola ubizo ekhulwini lokuqala, akuzona zonke ezazinezikhundla zomthwalo wemfanelo ebandleni. Futhi abantu ngabanye abanobizo lwasezulwini abafuni ukuvelela noma baqhoshe ngokugcotshwa kwabo. Babonisa ukuthobeka okulindeleke kulabo ‘abanomqondo kaKristu.’—1 Korinte 2:16.
16 Abanye kungenzeka baye baphetha ngokuthi banobizo lwasezulwini ngoba belazi kakhulu iBhayibheli. Kodwa ukugcotshwa ngomoya akumenzi umuntu abe nokuqonda okungaphezu kokuvamile, phela uPawulu kwadingeka afundise futhi eluleke abathile abagcotshiwe. (1 Korinte 3:1-3; Hebheru 5:11-14) UNkulunkulu unelungiselelo lokunika bonke abantu bakhe ukudla okungokomoya. (Mathewu 24:45-47) Ngakho akekho okufanele acabange ukuthi ukuba umKristu ogcotshiwe kumnika ukuhlakanipha okungaphezu kokwalabo abanethemba lasemhlabeni. Ukugcotshwa ngomoya akuboniswa yikhono lokuphendula imibuzo engokomBhalo, lokushumayela, noma lokunikeza izinkulumo zeBhayibheli. NamaKristu anethemba lasemhlabeni ayaba namakhono amahle kulezi zici.
17. Ukugcotshwa ngomoya kuxhomekephi nakubani?
17 Uma esikholwa naye ebuza ngobizo lwasezulwini, umdala noma omunye umKristu ovuthiwe angaxoxa naye ngale ndaba. Nokho, umuntu akanakumenzela omunye lesi sinqumo. Umuntu onalo ngempela lolu bizo akudingeki aze abuze abanye ukuthi unalo yini ithemba elinjalo. Abagcotshiwe ‘baye bazalwa kabusha, hhayi ngembewu enokonakala, kodwa ngembewu engenakonakala, ngezwi likaNkulunkulu ophilayo nohlala njalo.’ (1 Petru 1:23) Ngomoya wakhe neZwi lakhe, uNkulunkulu ufaka ‘imbewu’ eyenza umuntu abe “indalo entsha,” enethemba lasezulwini. (2 Korinte 5:17) Futhi nguJehova okhethayo. Ukugcotshwa “akuncikile kulowo ofisayo noma kulowo ogijimayo, kodwa kuNkulunkulu.” (Roma 9:16) Pho umuntu angaqiniseka kanjani ukuthi unalo ubizo lwasezulwini?
Okubenza Baqiniseke
18. Umoya kaNkulunkulu ufakazelana kanjani nomoya wabagcotshiwe?
18 AmaKristu agcotshiwe aqinisekiswa ubufakazi bomoya kaNkulunkulu ukuthi anethemba lasezulwini. Umphostoli uPawulu wabhala: “Namukela umoya wokutholwa njengamadodana, umoya esikhamuluka ngawo sithi: ‘Abha, Baba!’ Umoya ngokwawo ufakazelana nomoya wethu ukuthi singabantwana bakaNkulunkulu. Khona-ke, uma singabantwana, siyizindlalifa futhi: ngempela izindlalifa zikaNkulunkulu, kodwa izindlalifa ezikanye noKristu, uma kodwa sihlupheka kanye naye ukuze sikhazinyuliswe kanye naye.” (Roma 8:15-17) Ngaphansi kwethonya lomoya ongcwele, umoya, noma isimo sengqondo esivelele sabangcwele, sibaqhuba ukuba bakubhekise kubo lokho okushiwo yimiBhalo ngabantwana bakaJehova abangokomoya. (1 Johane 3:2) Umoya kaNkulunkulu ubenza bazizwe bengamadodana akhe futhi ubanika ithemba elihlukile. (Galathiya 4:6, 7) Yebo, ukuphila phakade emhlabeni njengabantu abaphelele bekanye nomkhaya nabangane kungaba mnandi, kodwa akulona lelo ithemba abalinikwe uNkulunkulu. Ngomoya wakhe, uNkulunkulu uye wakha kubo ithemba lasezulwini elinamandla kangangokuthi bazimisele ukudela bonke ubuhlobo namathemba asemhlabeni.—2 Korinte 5:1-5, 8; 2 Petru 1:13, 14.
19. Isivumelwano esisha sifeza yiphi indima ekuphileni komKristu ogcotshiwe?
19 AmaKristu agcotshiwe ayaqiniseka ngethemba lawo lasezulwini, ngokufakwa kwawo esivumelwaneni esisha. UJesu wakhuluma ngaso lapho emisa iSikhumbuzo, wathi: “Le ndebe isho isivumelwano esisha esenziwa ngegazi lami, elizothululwa ngenxa yenu.” (Luka 22:20) Abahlanganyela esivumelwaneni esisha nguNkulunkulu nabagcotshiwe. (Jeremiya 31:31-34; Hebheru 12:22-24) UJesu ungumlamuleli. Njengoba igazi likaKristu elachitheka lasenza sasebenza, isivumelwano esisha asisithathanga kumaJuda kuphela isizwe segama likaJehova, kodwa nasezizweni, sasenza ingxenye ‘yenzalo’ ka-Abrahama. (Galathiya 3:26-29; IzEnzo 15:14) Lesi “sivumelwano esiphakade” senza wonke ama-Israyeli angokomoya akwazi ukuvuselwa ekuphileni okungenakufa ezulwini.—Hebheru 13:20.
20. Abagcotshiwe bangeniswa kusiphi isivumelwano noKristu?
20 Abagcotshiwe bayaqiniseka ngethemba labo. Baye bangeniswa kwesinye futhi isivumelwano, isivumelwano soMbuso. Mayelana nokuhlanganyela kwabo noKristu, uJesu wathi: “Aningishiyanga ekulingweni kwami; ngenza isivumelwano nani, njengoba nje uBaba enze isivumelwano sombuso nami.” (Luka 22:28-30) Lesi sivumelwano phakathi kukaKristu namakhosi akanye nawo sihlala sisebenza phakade.—IsAmbulo 22:5.
Inkathi YeSikhumbuzo—Isikhathi Esibusisekile
21. Yini esingayenza ukuze sizuze kakhulu enkathini yeSikhumbuzo?
21 Ziningi izibusiso zenkathi yeSikhumbuzo. Singazuza ekufundweni kweBhayibheli okuhlelelwe le nkathi. Iyithuba elikahle kakhulu futhi lokuthandaza, lokuzindla ngokuphila kukaJesu emhlabeni nokufa kwakhe, nelokuhlanganyela emsebenzini wokushumayela ngoMbuso. (IHubo 77:12; Filipi 4:6, 7) Umkhosi ngokwawo usikhumbuza uthando olwaboniswa nguNkulunkulu noKristu ngomhlatshelo kaJesu wesihlengo. (Mathewu 20:28; Johane 3:16) Leli lungiselelo lisinika ithemba nenduduzo futhi kufanele liqinise ukuzimisela kwethu ukuphishekela inkambo enjengekaKristu. (Eksodusi 34:6; Hebheru 12:3) ISikhumbuzo kufanele futhi sisiqinisele ukufeza ukuzinikezela kwethu njengezinceku zikaNkulunkulu nokuba sibe abalandeli abaqotho beNdodana yakhe ethandekayo.
22. Isiphi isipho esikhulu kunazo zonke uNkulunkulu azinike isintu, futhi iyiphi enye yezindlela zokubonisa ukusazisa?
22 Yeka ubuhle bezipho uJehova asinika zona! (Jakobe 1:17) Sinesiqondiso seZwi lakhe, usizo lomoya wakhe, nethemba lokuphila okuphakade. Isipho sikaNkulunkulu esikhulu kunazo zonke umhlatshelo kaJesu wezono zabangcwele nabo bonke abanye ababonisa ukholo. (1 Johane 2:1, 2) Kubaluleke kangakanani-ke kuwe ukufa kukaJesu? Ingabe uzoba phakathi kwalabo ababonisa ukubonga ngako ngokubuthana ngemva kokushona kwelanga ngo-April 16, 2003, ukuze bagcine iSidlo SeNkosi Sakusihlwa?
[Umbhalo waphansi]
^ par. 8 Zazinyatheliswa oFakazi BakaJehova kodwa manje azisanyatheliswa.
Zithini Izimpendulo Zakho?
• Obani okufanele badle izifanekiselo zeSikhumbuzo?
• Kungani “ezinye izimvu” ziba khona njengezibukeli ezihloniphayo kuphela eSidlweni SeNkosi Sakusihlwa?
• AmaKristu agcotshiwe azi kanjani ukuthi kufanele adle isinkwa newayini eSikhumbuzweni sokufa kukaKristu?
• Inkathi yeSikhumbuzo iyithuba elikahle lokwenzani?
[Imibuzo Yesifundo]
[Igrafu/Isithombe ekhasini 18]
(Ukuze ubone ukuthi indaba ihlelwe kanjani, bheka encwadini)
Ababekhona ESikhumbuzweni
NGEZIGIDI
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Isithombe ekhasini 18]
Uzoba khona yini eSidlweni SeNkosi Sakusihlwa kulo nyaka?
[Izithombe ekhasini 21]
Inkathi yeSikhumbuzo iyisikhathi esikahle sokulifunda nakakhulu iBhayibheli nokuhlanganyela ngokwengeziwe emsebenzini wokushumayela ngoMbuso