Incwadi efundwa esikoleni esiphakeme ethi World Religions in Denmark, eyanyatheliswa ngo-2007, yachaza oFakazi BakaJehova ngokuthi bangamaKristu ayiqembu elincane elinamathela kulokho okufundiswa yiBhayibheli. Eqinisweni, inkolo yoFakazi BakaJehova ingeyesithathu ngobukhulu ezinkolweni zaseDenmark.

Nokho, umbhishobhi we-Danish National Church wasigxeka kakhulu isinqumo salo mbhali sokufaka oFakazi encwadini yakhe. Kungani? Lo mbhishobhi wathi: “Asikho isazi semfundiso yenkolo esibheka [oFakazi BakaJehova] njengamaKristu. Bayamphika uZiqu-zintathu, owumgogodla wenkolo yobuKristu.”

Umbhali waleyo ncwadi oyisazi senkolo nokuhlalisana kwabantu, u-Annika Hvithamar, wathi lapho abantu bebuzwa ukuthi yisiphi isizathu esibenza bazibheke njengamaKristu, kuyaqabukela bephendula ngokuthi kungenxa yokukholelwa ukuthi uNkulunkulu unguZiqu-zintathu. Ngaphezu kwalokho, ingxenye ethile yencwadi enesihloko esithi “Ingabe UngumKristu? [Are You a Christian?]” ithi: “Imfundiso kaZiqu-zintathu ingenye yezimfundiso eziyinkinga kakhulu emfundisweni yobuKristu.” Iyanezela: “Selokhu kwathi nhlo, kunzima ukuchazela amaKristu angayanga ezikoleni zokufundela inkolo ukuthi kungani uNkulunkulu wamaKristu esalokhu engunkulunkulu oyedwa, kunokuba babe bathathu.”

Okufundiswa yiBhayibheli ngoNkulunkulu nangoJesu kucacile futhi kulula. Akunzima ukukuqonda. Kwalona igama elithi “uZiqu-zintathu” noma umqondo nje onjalo akukho eZwini likaNkulunkulu. IBhayibheli lisho ngokucacile ukuthi uJesu Kristu uyiNdodana kaNkulunkulu eyizibulo. (Kolose 1:15) Limchaza nangokuthi ‘umlamuleli oyedwa phakathi kukaNkulunkulu nabantu.’ (1 Thimothewu 2:5) Nakhu elikushoyo ngoYise: “Ukuze abantu bazi ukuthi wena, ogama lakho linguJehova, wena wedwa ungoPhezukonke emhlabeni wonke.”—IHubo 83:18.

OFakazi BakaJehova bakholelwa ukuthi ukuba nokholo kuJesu kusemqoka. (Johane 3:16) Yingakho bewubheka njengobalulekile umyalo wakhe othi: “Kulotshiwe ukuthi, ‘NguJehova uNkulunkulu wakho okumelwe umkhulekele, futhi nguye yedwa okumelwe unikele kuye inkonzo engcwele.’” (Mathewu 4:10) Ngokuqinisekile, umuntu owenza konke okusemandleni ukuze alalele imiyalo kaJesu angabizwa ngokuthi ungumKristu.