HLALANI NILINDILE!
Umphakathi Wona Uzosizwa Ubani?—Lithini IBhayibheli?
INhlangano Yezizwe ibike ukuthi:
Kusukela ngomhla ka-7 kuya ku-23 Okthoba 2023, impi ephakathi kwabaseGaza nabakwa-Israyeli isibulale abantu abangaphezu kuka-6 400, kwalimala abangu-15 200, iningi labo amalungu omphakathi. Ngaphezu kwalokho, amakhulu ezinkulungwane zabantu aye aphoqeleka ukuba ashiye amakhaya.
Ngomhla ka-24 Septhemba 2023, e-Ukraine kwase kufe amalungu omphakathi angu-9 701, engu-17 748 alimele ngenxa yempi ephakathi kweRussia ne-Ukraine.
IBhayibheli linaliphi ithemba kubantu abathelwe amachaphazelo lapho kunezimpi?
Isizathu sokuba nethemba
IBhayibheli lisitshela ukuthi uNkulunkulu ‘uzoqeda izimpi emhlabeni wonke.’ (IHubo 46:9) Uzosebenzisa uhulumeni noma umbuso wasezulwini, ozongena esikhundleni sabo bonke ohulumeni babantu. (Daniyeli 2:44) UMbuso kaNkulunkulu uzoletha impumuzo kubantu.
Phawula lezi zinto ezizokwenziwa uJesu Kristu, oyiNkosi YoMbuso KaNkulunkulu:
“[INkosi uJesu Kristu] iyokhulula ompofu okhalela usizo, nohluphekile nanoma ubani ongenamsizi. Iyohawukela ophansi noswele, iyosindisa ukuphila kwabampofu. Iyobakhulula ekucindezelweni nasebudloveni.”—IHubo 72:12-14.
Esebenzisa uMbuso wakhe, uNkulunkulu uzoziqeda ziphele nya zonke izinsizi nokuhlupheka okubangelwe izimpi nodlame.
“Uyosula zonke izinyembezi emehlweni abo, ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zakudala sezidlulile.”—IsAmbulo 21:4.
Maduze, uMbuso kaNkulunkulu uzokwenza ushintsho olukhulu emhlabeni. IBhayibheli lathi siyokuzwa “ngezimpi nemibiko yezimpi,” okuyizinto ezenzeka phambi kwamehlo ethu namuhla. (Mathewu 24:6) Lezi zinto kanye nezinye izigameko, kufakazela ukuthi siphila “ezinsukwini zokugcina” zokubusa kwabantu.—2 Thimothewu 3:1.